البرازيل بعد
كارثة بيلو هوريزونتي أمام ألمانيا عايزين يطلعوا بأي حاجة عشان الجمهور اللي تاني
مره يتصدم على أرضه ولو إن مفيش حاجة تعوضهم عن الفوز بكأس العالم... وهولندا بعد بطولة
قويه من جانبهم بدون هزيمه حتى الآن عايزين يكسبوا مركز ولو حتى شرفي في المونديال
بعد فشلهم في الفوز ببطوله كانت هي المرشح الاقوى لها من معظم متابعي البطولة خاصة
بعد ادائهم القوي في دور المجموعات.
تاريخ مواجهات
هولندا والبرازيل متساوي بشكل كبير... ١١ مباراه جمعت المنتخبين، ٣ انتهت بفوز هولندا
و ٣ انتهت بفوز البرازيل... ومفيش ماتش إنتهى بنتيجه أكبر من فارق هدفين أو تماك ناي
فريق من تسجيل أكثر من ٣ أهداف في مباراه واحده... في ال ١١ لقاء تم تسجيل ٣٠ هدف مناصفةً
بين المنتخبين... في كأس العالم كل منتخب فاز مرتين في مواجهاتهم المباشرة اخرها كان
فوز هولندا ٢-١ في ٢٠١٠
هولندا هي تاني
أقوى هجوم في البطولة بعد ألمانيا طبعاً ولكنها لم تحرز أي أهداف في ماتشين ربع ونصف
النهائي... وفان بيرسي هداف هولندا التاريخي لما يحرز أي أهداف بعد دور المجموعات...
أما البرازيل فدخلت ماتشها مع ألمانيا بأحد أقوى خطوط الدفاع في البطوله، خرجت من الماتش
بأضعف خط دفاع في البطوله بإستقبال ١١ هدف.
البرازيل هي
أكثر المنتخبات تسديداً على المرمى في البطوله ب ٦٧ تسديدة مقارنةً ب ٥٩ لهولندا...
ولكن من ناحية التمرير فالبرازيل على غير سمعتهم فنسبة نجاح تمريراتهم أقل نوعاً ما
من هولندا... واعتمادهم أكتر على اللعب من أطراف الملعب في صنع الهجمات على عكس هولندا
اللي بتعتمد أكثر على اللعب المباشر وإستغلال سرعة روبن... المتخبين هم الأعنف في البطوله
من حيث إرتكاب الاخطاء ب ١٠٦ و ١٠٧ خطأ لهولندا والبرازيل على الترتيب.
تشكيل المنتخبين للماتش ده متوقع يكون في تغيرات سواء لإرضاء الجماهير
من جانب البرازيل أو لإراحة بعد اللاعبين وإعطاء شرف المشاركة في كأس العالم للاعبين
اخرين من جانب هولندا.
الحاج أنور
سلامة "سكولاري" لو بدأ النهارده بفريد تاني يبقى يستحق جايزة أغبي مدرب
فالبطولة بلا منازع... المتوقع إنه يبدأ بجو كمهاجم على الاقل لإرضاء الجماهير اللي
صفرت ضد فريد خلال ماتش ألمانيا... أيضاً فرناندينهو بعدم انضباطه الدفاعي منفعش أمام
ألمانيا وبالتالي مش هياكل أمام هولندا... هيرنانيس مرشح إنه يبدأ جانب لويس جوستافو
واكيد وليان هيبدأ على الجناح لتعويض نيمار بعد ما فشل برنارد... وأكيد طبعاً تياجو
سيلفا هيلعب جانب ديفيد لويز بعد أداء دانتي في ماتش ألمانيا... خطة ٤٢٣١ محتاجة مهاجم
متميز عشان تنجح هجومياً ومحتاجة جناحين يغطوا على ظهيرين الجنب... والبرازيل لا عندها
ده ولا ده... بس تظل هي الخطة اللي هيبدأ بها سكولاري لاقتناعه بها.
أما فان جال
فمتوقع إنه يعطي فرصة لحارس المرمى فورم عشان يكون نال شرف المشاركة لأول مرة في كأس
العالم ولكن إختيار أو تبديل تيم كرول ممكن يظهر في حالة الوصول لضربات الجزاء... أيضاً
المفروض إنه هيريح فان بيرسي اللي لعب ماتشين بالوقت الإضافي متواصلين وكان منهك تماماً
في أخر ماتش الارجنتين فبالتالي ممكن يبدأ بهونتلار...أيضاً ظهور كلاسي بدلاً من دي
يونج اللي خرج خوفاً من اصابته في ماتش الارجنتين إحتمال وارد... وخطة ٣٥٢ هي الاكيدة
اللي هيبدأ بها منتخب هولندا.
ماتش النهارده
هوو ماتش لحفظ ماء الوجه وبعض الكبرياء بالنسبة للبرازيل أما بالنسبه لهولندا فهو الحصول
على مركز شرفي وتوديع المونديال بدون هزيمه.
هولندا مش هتلاقي صعوبة في الحصول على المركز الثالث لأن اللي حصل للبرازيل
أمام ألمانيا إنهيار صعب التعافي منه في أيام وأن كان عودة سيلفا هتصلح كتير من أخطاء
الدفاع بس لسه هيفتقدوا الإلهام الهجومي اللي كان نيمار بيعمله.
تابعوني على:
No comments:
Post a Comment