نهائي الحلم... المجد والتاريخ

  
النهارده يوم مش عادي... النهارده يوم بيستناه كل متابعي كره القدم كل أربع سنين عشان نشوف مين اللي هيحمل لقب كأس العالم ويتقال عليه بطل العالم في الاربع سنين الجايه. النهارده أخر أحداث كأس العالم ٢٠١٤ في البرازيل وماتش بين امريكا الجنوبية وأوروبا... ماتش بين المهاره الفردية والأداء الجماعي... ماتش بين الاحلام برمز جديد للبلد والثقة في كل جيل إنه يصنع المستحيل... ماتش بين فترة كروية مزدهرة والإستمرارية على مدى ٧ عقود... النهارده نهائي بيتكرر لثالث مره في تاريخ كأس العالم بين الارجنتين وألمانيا.

نهائي النهارده هو النهائي رقم ٢٠ في تاريخ كأس العالم... منتخبات أوروبا  فازت باللقب ١٠ مرات منهم مقابل ٩ مرات لمنتخبات أمريكا الجنوبية فهل تساوي الارجنتين الألقاب بين القارتين ولا ألمانيا توسع الفرق لصالح أوروبا...

اقيمت نهائيات كأس العالم ٧ مرات على أرض أمريكا الجنوبية منهم ٥ مرات بين كان النهائي بين منتخب من أوروبا ومنتخب من أمريكا الجنوبية... وطبعاً ولا مره فاز فيهم منتخب من أوروبا ودي الاسطوره اللي عمرها من عمر كأس العالم... نهائي ٢٠١٤ هو العاشر في كل نهائيات كأس العالم اللي بيجمع منتخبين احدهم من أوروبا والآخر من أمريكا الجنوبية وفي ال ٩ مباريات السابقه أوروبا فازت مرتين فقط عام ١٩٩٠ في إيطاليا وعام ١٩٩٨ في فرنسا.

نهائي ٢٠١٤ بيجمع بطلين سابقين للعالم... المانيا النهارده هتكون أكثر المنتخبات ظهوراً في نهائي كأس العالم لأن ده هو النهائي رقم ٨ لالمانيا اللي فازت ب ٣ القاب وهو النهائي الخامس للارجنتين  اللي فازت بلقبين ... أخر لقب لألمانيا كان ١٩٩٠ (١-٠) بقيادة لوثر ماثيوس، رودي فولر وكلينسمان على حساب الارجنتين في النهائي... وأيضاً أخر لقب للارجنتين كان على حساب ألمانيا عام ١٩٨٦ (٣-٢) بقيادة الملك مارادونا و خورخي فالدانو ... ودول كانوا المرتين الوحيدين اللي اتقابل فيها المنتخبين في مباراه نهائي كأس العالم.

لكن المنتخبين لعبوا ٢٠ ماتش مع بعض ما بين ودي ورسمي فازت ألمانيا في ٦ مباريات والارجنتين فازت ب ٩... والمنتخبين سجلوا نفس عدد الاهداف (٢٨)... ولكن في منافسات كأس العالم المنتخبين لعبوا ٦ ماتشات، الارجنتين فازت بماتش واحد منهم في حين ألمانيا فازت ب ٤ ماتشات منهم.

أكبر نتيجه بين المنتخبين كانت مباراة ربع نهائي بطولة ٢٠١٠ واللي أكيد الارجنتين مش عايزه تفتكرها لما ألمانيا عملت معاهم "البوفتيكة" ٤-٠ ومارادونا كان بيتفرج على الخط ومش عارف يعمل حاجة.

الارجنتين خلال البطولة قدمت أداء متصاعد وكل مرحلة كان ليها نجمها... في دور المجموعات أهداف ميسي كانت السبب في تصدرهم المجموعة وفي دور ال ١٦ دي ماريا انقذهم في أخر دقايق الوقت الإضافي... وربع النهائي هيجواين "على غير العادة" كان هو البطل اللي أهلهم لنصف النهائي... وجه دور ماسكيرانو اللي حقه في مكان في خط الوسط في برشلونة وسيطر على معركة خط الوسط في نصف نهائي صعب... كل ده بيأكد إعتماد الارجنتين على بروز مهارة لاعب في كل ماتش عشان يشيل الفريق... على عكس منتخب ألمانيا اللي قوته موجودة في لعبهم الجماعي وتألق الفريق كله... منتخب ألمانيا بعد بداية مروعه للمنافسين بالفوز على البرتغال قدم بطوله عادية وهادية وكان بيكسب باقل مجهود لحد ما إنفجر في مذبحة بيلو هوريزونتي أمام البرازيل.

المنتخبين غيروا خطة لعبهم خلال البطوله نتيجه لإكتشاف عيوب أو نتيجه لغيابات... الارجنتين بدأت البطوله ب ٤٤٢ وفي دور المجموعات قرار الخاندرو باسيلا إنه يغير ل ٤٢٣١ ويعتمد على ميسي كصانع لعب عشان يزود عدد خط الوسط... وللأمانة التحول دى فرق في شكل الارجنتين وخلاهم متمسكين دفاعياً أكتر بدليل عدم استقبالهم أي أهداف من بعد دور المجموعات اللي إتسجل فيهم ٣ أهداف... والارجنتين أكتر منتخب في البطوله حافظ على نظافة شباكه في ٤ مباريات.

أما ألمانيا فبدأت البطولة بخطة ٤٣٣ (False 9) بإستخدام مولر أو ماريو جوتزه كمهاجم وهمي... وضح جداً في ماتش الجزائر إن الخطة دي مش ماشية ومش هتاكل عيش مع فرق أقوي... فبكل تواضع غيرها خواكيم لوف ل ٤٤٣ برضه بس بمهاجم صريح وبدأ يستخدم كلوزه بدلاً من جوتزه... وفعلاً التغيير جاب نتيجة وعبروا فرنسا بسهولة وعملوا الصح مع البرازيل... وعلى الجانب الدفاعي ألمانيا استقبلت ٤ أهداف في المونديال حتى الآن.

المنتخبين بيتميزوا بعدد التسديدات الكبير على مرمى ب ٦١ و ٦٤ تسديده للارجنتين وألمانيا على ترتيب وإن كانت ألمانيا تسديدته من عدد محاولات أقل... لعب الارجنتين بيعتمد أكتر على الهجوم من أطراف الملعب والكرات العرضية وان قل اعتمادهم عليها في آخر ماتشين... الارجنتين نفذت ١٦٠ كرة عرضية في ٦ مباريات في المونديال نجاح منهم ١٨٪ فقط... أما ألمانيا هجومها متنوع وبيعتمد على ثلاثي خط الوسط انهم يبدؤا الهجمات ويوزعوها على كل أنحاء الملعب بتمريرات قصيرة متقنه... ألمانيا نسبة نجاح تمريراتها ٨٢٪ وهي تاني أعلى معدل في البطوله في مقابل ٧٨٪ للارجنتين... حتى في الكرات العرضية ألمانيا تمتلك نسبة نجاح أعلى ب ٢٣٪  من ١٢١ كرة عرضية في ٦ مباريات.

ألمانيا بلا شك تتفوق بدنياً بدليل تصدر ٣ لاعبين منها لقائمة الاكثر ركضاً من بين اللاعبين المشاركين في النهائي النهارده (مولر، كروس ولام)... ولكن الارجنتين تمتلك ماسكيرانو صاحب أكبر عدد من التمريرات في المونديال وصاحب تاني أكبر عدد من المحاولات الناجحة لإستخلاص الكره في المونديال.

حارسي المرمى نقطة قوة للمنتخبين... روميرو اللي مستواه تصاعد بشده خلال المونديال وكان بطل ضربات الترجيح في ماتش هولندا... و نوير بثاني أعلى عدد تصديات في المونديال وثقه لا متناهية في التغطية خلف دفاعه... كفايه نعرف إن نوير جري ٣١ كيلومتر لتغطيته المستمره لخط دفاعه في حين روميرو جري ٢٠ كيلومتر بس في نفس عدد الماتشات.

المتوقع النهارده إن المنتخبين هيلعبوا بنفس تشكيل مباراة نصف النهائي بدون أي تغيير... بالتأكيد غياب دي ماريا للاصابه مازال مؤثر في هجوم الارجنتين وأن كان في إشاعات حول لحاقه بالماتش النهارده ولكن انزو بيريز كان بديل جيد خصوصاً دفاعياً ولكن إنتاجه الهجومي محدود أو بالأصح من غير إبداع... ولكن مش محتاجين يدوروا على إبداع لو ميسي كان في يومه وقدر يقود هجوم الارجنتين أمام نوير ودفاع ألمانيا.

ألمانيا لم خسرت شكردان مصطافي للإصابة كسبت واحد من أحسن اللي لعبوا في مركز الظهير الايمن "فيليب لام" إنه يرجع يلعب في مركزه الاصلي تاني... وبوجود خضيرة الاتوبيس وكروس ووراهم شفاينشتيجر فخط وسط ألمانيا يعتبر الاقوى في البطولة بالتأكيد... أما مولر فهو مصدر إلهام ألمانيا الهجومي في البطوله ب ٥ أهداف و ٣ تمريرات حاسمه.

الارجنتين حلمها بالفوز والتتويج بكأس العالم جي امنيتهم بصنع ملك جديد للارجنتين خليفة لمارادونا وهو ليونيل ميسي اللي ناقصه الفوز بكأس العالم عشان يكون فاز بكل الالقاب الممكنه وبالتالي الارجنتين النهارده وكل محبي ميسي أملهم إنه يكون في يومه ويصنع الفارق عشان يستحق لقب ملك الارجنتين الجديد.

ألمانيا ببساطه تمثل الإستمرارية في عالم كرة القدم... ٢٠١٤ هي رابع بطوله على التوالي توصل فيها ألمانيا المربع الذهبي... ألمانيا هي المنتخب الوحيد اللي ظهر في نهائي كأس العالم مره على الاقل في كل عقد من الزمان في السبعة عقود الأخيرة... ألمانيا هي أكثر منتخب ظهر في نصف النهائي أو النهائي عل مار التاريخ (أكثر حتى من البرازيل صاحبة الرقم القياسي في الفوز بالبطوله)... كل ده بسبب الإيمان إن كل جيل في ألمانيا قدر على صنع المستحيل "المستحيل ليس ألماني"... وبالتالي كل محبي الكرة العملية والجماعية في الاداء هيكون أملهم إن ألمانيا كلها تكون في يومها وتكمل استمراريتها بتتويج رابع لكأس العالم.

الأرقام بتقول إن ألمانيا فرصتها أكبر للفوز وخصوصاً بعد الدفعة المعنوية الكبيره اللي خدوها من ماتش البرازيل... ولكن ميسي وحظ الارجنتين بيعادل الفرص في الماتش... لو شفاينشتيجر وهوملز سيطروا على تحركات ميسي فالارجنتين فرصتها معدومة في الماتش.

ولكن اتوقع فوز ألمانيا في الماتش بسهولة نظراً لأداهم الهجومي الفعال واللي لا يؤثر على تركيزهم الدفاعي في مقابل الارجنتين اللي تركيزهم الدفاعي بيحد من مساندة الهجوم وخصوصاً في غياب دي ماريا ولياقتهم البدنية مش هتساعدهم يأدوا الماتش كله بنفس الوتيره.

تابعوني على:

·         تويتر Twitter     @MO_ELSADEK

·         فيس بوك Facebook   www.facebook.com/FootballCollage

Follow @MO_Elsadek