الدوري الانجليزي – الأسبوع الثالث

أسبوع جديد وتحليل جديد من Football COLLAGE لأقوي دوري في العالم بلا منازع... حامل اللقب بيتعرض لصدمة غير متوقعة وتعثر جديد لأرسنال ومانشستر... أسبوع شهد واحدة من أجمل وأقوي مباريات الموسم حتي الان ومن أكثر المواجهات غزارة في الأهداف في تاريخ الدوري الانجليزي وعودة ليفربول للانتصارات في أرض توتنهام.

مانشستر يونايتد و بيرنلي (0-0):

أول ظهور لأغلي صفقة في تاريخ الدوري الانجليزي "دي ماريا" في واحد من أكثر مباريات الدوري مللا حتي الاّن... مانشستر يونايتد نقطتين من 3 مباريات... حصيلة لم يتخيلها أكثر مشجعي الفريق تشائما... بالتأكيد نتيجة عادلة في ظل أداء باهت من الشياطين الحمر باستثناء دي ماريا وماتا ودي خيا اللي انقذ الفريق من خسارة ثانية مذلة.

تخيل جناحي مانشستر في المباراة "أشلي يونج" و"أنتونيو فالنسيا" صنعوا 18 كرة عرضية لم تنجح منهم الا واحدة بس!! تخيل ان روني كابتن الفريق سدد تسديدة واحدة فط علي المرمي خلال 90 دقيقة!! تخيل ان مانشستر كله سدد اقل من بيرنلي علي المرمي!! دي ماريا بارقة الأمل في خط الوسط وجد نفسه محشور بين ماتا و بين أشلي يونج ولم يجد المساحات لابراز مهاراته وفي بعض اللمحات الفنية اللي ظهرت لم تجد من يترجمها في المرمي... فان بيرسي مازال بعيد جدا عن مستواه وأعتقد مازال محتاج للراحة الكافية خصوصا انه لعب كأس العالم للنهاية... أداء مانشستر كان ممل وباهت لدرجة ان الاب الروحي للفريق سير اليكس فيرجسون كان بيتاوب في المدرجات.

علي الجانب الآخر فالتعادل كان نتيجة ممتازة لبيرنلي اللي حقق نقطة مهمة هتساعده في رحلة تفادي الهبوط... تعاملوا مع الماتش بكل هدوء وتمكنوا من احتواء روني وابعاده عن منطقة جزائهم تماما... وبالتأكيد دفاعهم لم يكن مثالي لكن الفرص اللي سنحت لمانشستر ضاعت انا ببراعة الحارس أو بسبب رعونة مهاجمي مانشستر... وفي حين ان النتيجة كانت التعادل السلبي فمانشستر نجا من هزيمة بعد عدة فرص لبيرنلي بعد سرحان وعدم تركيز من مدافعي مانشستر وأنقذهم دي خيا في كل مرة.

فان جال مازال مصر علي 352 في وجود ثلاثي دفاعي "حمصي"... هو طلب ان الجماهير تصبر عليه فترة عشان هو بيبني فريق من جديد... الصراحة عنده حق في موضوع الصبر ده... ولكن بعد 10 ماتشات بالمنظر ده مانشستر هيكون فاته ثلث الدوري وهيكون بيصارع علي مركز في وسط الجدول... وبعدين لو حضرتك هتبني يبقي جزء من خطتك كان انك تخاطب الجماهير من يوم ما مسكت ادارة الفريق وتوضح الأمور علي بلاطة عشان طموحاتهم ماتطلعش في السما.

خلاصة الكلام: الحكم علي فان جال وطريقة 352 اللي اختارها هيكون قاطع بعد عودة كل المصابين زي لوك شاو و اندير هيريرا وانتهاء موسم الانتقالات... وان كان المستوي حاليا لايبشر بأي خير... لو كان الدفاع هو المشكلة الواضحة في مانشستر في الثلاث مباريات السابقة فعدم وجود حلول هجومية في الماتش ده كان مشكلة أكبر ولكن مع وجود فالكاو ودي ماريا وعودة فان بيرسي لمستواه أكيد في كلام تاني. ساعات فكرة انك تسجل أكتر عشان مهما دخل فيك أهداف بتنفع "ساعات مش دايما".

رجل المباراة: جاسون شاكيل (مدافع وكابتن بيرنلي).

معلومات سريعة:

·         ده أول ماتش رسمي من بداية الموسم مانشستر يحافظ علي نظافة شباكه... ودي كارثة ان جملة زي دي تتقال علي مانشستر يونايتد.

·         اخر مرة مانشستر يونايتد حقق نقطتين من أول 3 مباريات في الدوري كان في موسم 08/2007 وفي اخر الموسم فاز مانشستر بالدوري ودوري أبطال أوروبا.

·         ده كان التعادل السلبي الأول لبيرنلي في تاريخة في الدوري الإنجليزي الممتاز (41 مباراة).

·         في أربع مباريات فقط تمكن بيرنلي من الحفاظ علي نظافة شباكه في الدوري الانجليزي الممتاز... ولكن منهم مرتين أمام مانشستر يونايتد.

مانشستر سيتي و ستوك سيتي (0-1):

صدمة قوية لحامل اللقب في ثالث أسابيع الدوري وتنازل بسرعة غير متوقعة عن صدارة الجدول... ماتش عدت أول ساعة منه في انتظار أول هدف للسيتيزن عشان نتفرج علي السيرك بعده ولكن "مام ضيوف" تقمص شخصية كريستيانو رونالدو وانطلق بكرة من حدود منطقة جزاء ستوك سيتي بطول الملعب وجنبه كولاروف بيأمن له الطريق وماقابلوش غير فيرناندينهو اللي "برول" ومعرفش يعمل ايه فقرر يقف ويدعي انها تضيع ولكن "ضيوف" بتركيز يحسد عليه بعد المشوار ده سددها بكل بين رجلين جو هارت اللي من هول الهجمة والمشوار ماخرجش من مرماه واستني القدر.

لو في جملة تلخص الماتش ده فهي "قضاء وقدر"... مانشستر سيتي عمل كل ما يمكن فعله لاحراز هدف... لاحراز أهداف كمان ولكن القضاء والقدر أعطي مام ضيوف كل الظروف المواتية انه يحرز هدف خيالي ماكانش يحلم بيه بعد 3 سنين و7 شهور صيام عن التهديف... ولكن تنظيم ستوك سيتي الدفاعي قبل الهدف وهدوئهم في الملعب بعد الهدف ساعدهم بشكل كبير علي الخروج بالفوز ده وخصوصا ان لاعبي مانشستر سيتي كانوا في حالة صدمة بعد الهدف لخبطت كل حساباتهم وفقدوا أي تركيز ليهم في الملعب.

مانويل بيلليجريني أدي واحدة من أسوء مبارياته كمدير فني... قرر يريح زاباليتا وكليشي اللي بيأمنوا له الدفاع ويريح دزيكو نجم الهجوم في الفترة الأخيرة ويبدأ بأجويرو غير المكتمل الشفاء... أجويرو يفضل أجويرو بكل خطورته ومهاراته وكاد يفتتح التسجيل للسيتيزين في أكتر من مرة ولكن بين كل هجمة والتانية بيقع والدكتور يدخل له... أما سانيا وكولاروف اللي بدأوا في مركزي الظهيرين كانوا زي عدمهم بالظبط... بكاري سانيا صنع عرضية واحدة صحيحة طوال الماتش وغير كده ماحدش شافه أما كولاروف فكفاية نقول انه كان ال بودي جارد بتاع مام ضيوف خلال رحلة تسجيله للهدف من قبل نص الملعب ولحد ما الكرة دخلت بالسلامة مرمي هارت. بيلليجريني مافكرش في حلول الا بعد الهدف ما دخل مرماه وفكر انه ممكن يستغل نافاس أو دزيكو.

خلاصة الكلام: مانشستر سيتي الموسم اللي فات خطف الدوري أكيد بسبب مجهوده بس الأكتر انه بسبب ان منافسه ليفربول ضيع الدوري من ايده... السنه دي عنده بدل المنافس اتنين "ليفربول وتشيلسي"... وأي نقطة هتضيع هيكون صعب تعويضها... مانجالا لازم ياخد مكانه الطبيعي علي حساب ديميكيلس... ونافاس لازم يستغل في دور أكتر من دور بديل اخر نص ساعة ده.

رجل المباراة: من غير كلام "مام ضيوف"

معلومات سريعة:

·         مانشستر سيتي الموسم الماضي فشل في التسجيل علي أرضه مرة واحده فقط.

·         المباراة دي كانت المناسبة الثانية فقط لمانشستر سيتي اللي يفشل فيها في التسجيل في اخر 71 مباراة علي أرضه.

·         في أخر 10 مباريات له في الدوري سجل مانشستر سيتي هدفين علي الأقل ولكنه فشل أما ستوك سيتي.

تشيلسي و ايفرتون (6-3):

أمتع مباراة في الأسبوع الثالث... مباراة هجومية ب 9 أهداف... ومباراة فنية بين اتنين من أحسن مدربي الدوري الإنجليزي... مباراة قوية مليئة بالأحداث من أول دقيقة لخر دقيقة... خطة مورينهو انه يقتل الماتش في الشوط الأول فشلت مع أخر دقيقة في الشوط... مع كل محاولات ايفرتون تشيلسي كان دائما الطرف الأقوي... مورينهو أكيد هيمسك مدافعيه السلك عريان بعد الماتش بسبب الثلاث أهداف ولكن أكيد مطمئن جدا ان عنده قوة هجومية مرعبة احرزت حتي الان 11 هدف في 3 مبارايات في الدوري.

تشيلسي بدأ الماتش بتغييرين عن مباراة مباراة ليستير سيتي "راميريس مكان أوسكار و ويليان مكان شورلي" و بعد أول 3 دقايق في المباراة اعتقد الكل ان المباراة انتهت فعليا بهدفين كوستا وايفانوفيتش... ولكن إيفرتون بعد محاولات مستميتة أحرز هدفه المعتاد في الدقيقة 45 عشان ينعنش الماتش من تاني... ولكن ماكينة هجوم تشيلسي في الشوط التاني لم تعطي أي فرصة أو أمل لإيفرتون رغم تسجيله لهدفين... أرقام مرعبة لفعالية هجوم تشيلسي (سدد 10 كرات منها 9 علي المرمي وأحرز منها 6 أهداف).

لولا النتيجة العريضة لكان في عيوب ظهرت في تشيلسي "ويليان والدفاع"... ويليان كان شبه مش موجود في الكلعب ولا يقارن بأي حال مع شورلي... ويليان لم يسدد ولا مرة خلال الماتش وأيضا صنع كرتين فقط عرضيتين غير ناجحتين... أما في الدفاع رغم التفاهم الكبير في التغطية بين تيري وكاهيل ولكن كل واحد فيهم غلط مرة واحدة في مراقبة لاعب في كرة عرضية اتسببت بهدفين و أيضا أزبيلكويتا لم يكن في أحسن حالاته وفشل في التعامل مع انطلاقات كولمان من ناحيته.

من ناحية تانية راميريس مع كل الشائعات حول رحيله ولكنه أثبت انه لاعب قوي في وسط الميدان... أحرز هدف في وقت حاسم وكان متفاهم بشكل معقول مع ماتيتش وفابريجاس وصنع هدفين ولكنه حقق أسوء نسبة تمريرات صحيحة (68%) بين كل لاعبي تشيلسي.

إيفرتون غير محظوظ بالمرة انه يقابل فريقين من كبار الدوري في أول 3 مباريات في الدوري واستقبلت شباكه 10 أهداف فيهم... روبيرتو مارتينيز مدرب محترم وعمل فرق في أداء الفريق بعد فترة مويس... وتدعيماته خلال الصيف كانت في محلها ولكن محتاج تنظيم دفاعي أكتر يساعد بيه تيم هوارد اللي فشل في تكرار أداءه في كاس العالم. اما هجزميا فعودة باركلي هتفرق جدا مع الفريق.

خلاصة الكلام: أخطاء دفاع تشيلسي في المباراة دي غير متكررة ولكن مورينهو محتاج يتداركها سريعا في فترة التوقف من أجل الحفاظ علي أحد نقاط قوة الفريق علي مدار المواسم السابقة... أما هجوم تشيلسي فلاخوف عليه في ظل وجود كوستا في حالته حتي بعد رحيل توريس ولكن كل الخوف لو أصيب كوستا!!؟؟ الماتش ده يثبت مدي امكانية تشيلسي الموسم ده علي اقتناص الدوري الانجليزي اللي حاليا بيتصدره مع سوانزي.

رجل المباراة: دييجو كوستا

معلومات سريعة:

·         هدف صامويل ايتو في المباراة هو العشر له في الدوري الانجليزي والأول خارج ملعب ستامفورد بريدج.

·         لاعبين فقط من تشيلسي سجلوا أهداف في أول ثلاث مباريات لهم في الدوري "ادريان موتو" و "دييجو كوستا".

·         في أخر 5 مباريات له في الدوري الانجليزي صنع سيسك فابريجاس هدف علي الأقل في كل مباراة.

·         راميريس الموسم الماضي كله صنع هدفين فقط وهو نفس العدد اللي صنعه في الماتش ده.

·         فرناندو توريس سجل أول أربع أهداف في الدوري لتشيلسي بعد مرور 39 مبارة وهو الأامر اللي استغرق دييجو كوستا 3 مباريات فقط.

·         إيفرتون سجل هدف في الدقيقة 45 في كل مبارياته الثلاث في الدوري حتي الان.

·         ايفرتون هو صاحب أكبر عدد من "الأهداف الخطأ في المرمي Own Goals" في تاريخ الدوري الانجليزي.

·         إيفرتون استقبل 10 أهداف حتي الان في أول 3 مباريات في الدوري وده اتكرر مع إيفرتون في 3 سنوات سابقة فقط (1893، 1926، 1956).

·         الماتش ده هو رقم 19 في تاريخ الدوري الانجليزي اللي يتم تسجيل 9 أهداف أو أكثر فيه.

ليفربول و توتنهام (3-0):

في مباراته رقم 100 كمدير فني لليفربول، فاز بريندن رودجرز علي توتنهام في واي هار لاين بأداء قوي ونتيجة كبيرة في مباراة شهدت مكاسب كتير لليفربول... استعادة ليفربول لثقتهم بنفسهم بعد خسارة كبيرة أمام مانشستر سيتي الأسبوع اللي فات... بداية قوية لبالوتيللي اللي هيفرق كتير مع شكل الفريق الموسم ده... مورينو بعد أداء كارثي في مباراته الأولي أمام مانشسترسيتي بيعطي لمحة لجماهير الفريق عن امكانياته اللي هيقدمها للفريق الموسم ده.

ليفربول لم يعطي الوقت لتوتنهام انه يمشي الماتش علي مزاجه واستغرق الوقت 8 دقايق عشان رحيم ستيرلينج أحد نجوم الدوري انه يحرز هدف بعد مجهود رائع من ستوريدج وصناعة سلسة من هندرسون... الهدف تلقائيا أجبر توتنهام انه يفتح الملعب ويبدأ يهاجم وده كان سبب في ان النتيجة توصل ل 3-0... ومع ان النتيجة كبيرة ولكن توتنهام كان ليه تواجد هجومي مش بطال في الماتش وكام فرصة كان ممكن يغيروا شكل الماتش لولا العناية الالهية واستهتار أديبايور.

الماتش في حد ذاته صدمة لتوتنهام وجماهيره ومهم عشان يفوقهم من وهم انهم خلاص هينافسوا بكل بساطة علي المربع الذهبي بعد فوزين في أول الدوري علي كوينز بارك رينجرز وويستهام... توتنهام قدم عروض كويسة في بداية الدوري ولكن مع أول اختبار حقيقي فشل دفاعيا فشل ذريع... وده معناه ان مدربهم بوتشيتي قدامه مهمة صعبة لتنظيم دفاعه قبل ما يفكر في فعالية هجومه أمام الفرق الكبيرة.

بالوتيللي من وجهة نظري من أنجح 5 صفقات في موسم الانتقالات السنة دي... بالرغم من التحفظ علي سلوكه وايصالات الأمانة اللي ليفربول كتبها عليه عشان يضمنه فهو لاعب تقيل في اي فرقة وهداف... بالوتيللي وجد مكانه المثالي في ليفربول "داخل منطقة الجزاء"... بالوتيللي من نوع اللاعيبة اللي ممكن يفضل هادي طول الماتش ولكن من فرصة واحدة ممكن يخلص (أقرب مثال ماتش إيطاليا وانجلترا)... بالوتيللي أتاح الفرصة لستوريدج "اللي مش رأس حربة" انه يرجه مكانه المفضل ويهاجم من أطراف الملعب وده أعطي شكل أخطر لليفربول لأن كل شغل ستوريدج ورحيم وخط الوسط لقي اللي يستغله في منطقة الجزاء... وكان من الممكن يسجل بداية الحلم لو سجل ضربة الرأس اللي في أول الماتش.

خلاصة الكلام: الماتش ده دليل علي ان لاعب واحد ممكن يفرق مع الفريق... مش بمهارته ولكن بإنه يساعد المدرب يظبط خطة الفريق... وجود بالوتيللي بالوتيللي رجع شكل الثلاثي الهجومي لليفربول زي الموسم اللي فات مع سواريز... في انتظار عودة لالانا لمزيد من الابداع في خط وسط ليفربول... الماتش كان فرصة لرودجرز في اعطاء فرصة لعب لساخو اللي بالتأكيد مش هيكون أسوء من سكيرتل بالعكس كان نقطة قوة في دفاع ليفربول في المباراة.

رجل المباراة: رحيم ستيرلينج

معلومات سريعة:

·         ده ثالث ماتش لتوتنهام علي التوالي أمام ليفربول لا يسجلوا أي هدف. الماتشين اللي فاتوا 5-0 و 4-0

·         في عام 2014 سجل ليفربول 60 هدف في الدوري الانجليزي كأكثر الفرق تهديفا في 2014.

·         129 هدف تم تسجيلهم في تاريخ مواجهات ليفربول و توتنهام...و هي أكثر المواجهات تهديفا في تاريخ الدوري الانجليزي بالتساوي مع مواجهات ليفربول ونيوكاسل.

·         هدف ستيفن جيرارد هو رقم 29 له من ضربات الجزاء... الثالث في ترتيب الأكثر تهديفا من ضربات الجزاء في تاريخ الدوري الإنجليزي بعد لامبارد (43) وألان شيرار (56).

أرسنال و ليستر سيتي (1-1):

بعد الزمالك فالمعني الحقيقي للمعاناة الكروية يتجسد في فريق أرسنال... مافيش أسبوعين بيعدوا من غير نكد علي الجماهير... فبعد فرحة بالتأهل للمرة ال 17 علي التوالي لدوري أبطال أوروبا مالحقتش الجماهير تفرح وأرسنال خسر نقطتين في ماتش نظريا كان المفروض انه في متناول اليد.

النتيجة غير عادلة بالنسبة لليستر سيتي اللي صنع اخطر فرص اللقاء وكان ممكن في أي لحظة يخطف الفوز... ليستر سيتي الموسم ده عازم انه يعيد فترة من فتراته القوية اللي كان بيلعب فيها جاري لينيكر في صفوفه... فريق منظم جدا في الدفاع أمام حارس ممتاز و هجمة مرتدة مابتهزرش ولعب جماعي رائع... رياض محرز لو ركز شوية في انهاء الهجمات ممكن يلاقي نفسه في فريق أكبر في فترة انتقالات الشتاء وممكن في أرسنال نفسه.

أرسنال عنده Overdose Attacking Midfield جرعة خط وسط مهاجم زيادة... لاعيبة كتير في نفس المركز وبتعمل نفس الحاجة ولما ابداعهم بيظهر بيهدر علي حدود منطقة الجزاء... وحتي الابداع ده اتبخر في اخر نص ساعة من الماتش ومبقاش فيه فرص بتصنع اصلا... وأليكسيس سانشيز بالرغم من مجهوده الوفير الا انه تايه في الملعب ومش عارف هو المفروض جناح ولا مهاجم ويلعب انه يخترق من الجنب ولا انه يرفع عرضيات ولو اعتمد علي العريضيات مين هيستقبلها؟ سانوجو؟ هو سانوجو ده ينفع يلعب في ليستر سيتي أصلا؟

أما في الناحية الدفاعية، فمن غير المعقول ان كل هجمة عليك بتكون هجمة مرتدة صريحة أو فيها تهديد صريح للمرمي... طب هتعمل ايه مع فرقة زي تشيلسي ولا ليفربول وسرعة ناس زي رحيم ستيرلينج؟... كوشيلني غير مكتمل الشفاء وماينفعش في مركز مهم زي ده تخاطر وده اتسبب في هدف التعادل... وميرتساكر مع خبرته الكبيرة فهو من أبطئ المدافعين في العالم يعني "أحمد جعفر" ممكن يعدي منه عادي... وأمامهم فاقد الذاكرة الكروية "فلاميني"... هو فلاميني فعلا مقنع لفينجر وجمشجعي أرسنال انه خط وسط مدافع؟؟ يعني ده امتداد فييرا وجيلبرتو سيلفا؟ ده الند ليايا توريه وماتيتش وجيرارد ولا حتي فليتشر؟

خلاصة الكلام: الدنيا كلها عارفه ان مفيش مهاجم عدل في الفريق ماعدا أرسين فينجر اللي قرر يروح يحكم ماتش ودي في روما في أخر أيام موسم الانتقالات ولا علي باله ان في مصيبة في فريقه... انتهاء فترة الانتقالات من غير مهاجم و غياب جيرود حتي للثلاث شهور القادمين غالبا هتكون ايام سوااااد علي مشجعي أرسنال الا لو دور فينجر في دفاتر عبقريته وطلع بخطة تنقذ الفريق وده هناقشه معكم في مقال منفرد.

رجل المباراة: ويستلي مورجان (قلب دفاع ليستر سيتي).

معلومات سريعة:

·         من 5 تسديدات علي مرماه، استقبل أرسنال 4 أهداف في الموسم حتي الان.

·         أليكسيس سانشيز هو اللاعب رقم 100 اللي يسجل لأرسنال في الدوري.

·         أوزيل صنع هدف واحد فقط في أخر 10 مباريات في الدوري.

·         في أخر 16 مباراة علي أرضهم، سجل فريق ليستر سيتي علي الأقل مرة.

تابعوني على:

·         تويتر Twitter     @MO_ELSADEK

·         فيس بوك Facebook   www.facebook.com/FootballCollage

Follow @MO_Elsadek