الدوري الأسباني – الجولة الأولي

ملخص الجولة الأولي في الدوري الأسباني هيتكلم علي الفرق ال 3 الكبيرة (أتليتيكو مدريد، برشلونة، ريال مدريد) في محاول لطرح وجهة نظر بسيطة في أداء الفرق واللعيبة أكتر من سرد أحداث الماتش...

برشلونة و التشي (3-0):

أول ثلاث نقط في سباق برشلونة لاستعادة هيبته والمنافسة الطويلة علي الدوري... أداء هجومي مقنع وقوي... ميسي فايق ورايق ورمي كأس العالم ورا ظهره... منير الحدادي مستقبل باهر لهجوم برشلونة وغالبا هيقعد بيدرو احتياطي مدة طويلة... خط الدفاع لسه عليه كلام في ظل استمرار اهتزاز وبطء ماثيو... وكابتن برشلونة "شافي" مالوش مكان في التشكيلة الأساسية

ميسي بكل سهولة أحرز هدفين وكانوا قابلين للزيادة لولا سوء الحظ... ملهم برشلونة ظهر Fresh وكأنه نسي خسارة نهائي كأس العالم تماما وارتاح الراحة الكافية... ميسي قاد الحدادي ورافينا لحبس التشي في منطقة ال 18 طوال الماتش تقريبا... انيستا كالعادة محدش بيقدر يوقفه وقاد بكل هدوء خط وسط برشلونة مع راكيتيتش وبوسكتس للسيطرة تماما علي مجري اللعب والوصول بنسبة الاستحواذ علي الكرة ل 79% في بعض أوقات اللقاء... تمريرات انيستا وراكيتيتش هي سلاح برشلونة الموسم الحالي.

 

لويس إنريكي قرر يبدأ البداية الاّمنة ب 433 بعد ما كان قال في الصحافة انه هيعتمد علي 3232 كخطة الأساسية في الموسم الجديد... ولكن واضح ان إنريكي لم يشاهد كاس العالم وأصر يلعب بماسكيرانو في قلب الدفاع بالرغم من أداءه المذهل في مركزه الأصلي في كأس العالم... وكالمتوقع ظهر جيريمي ماثيو بمستوي عادي بايقاع بطئ والبطء ده اللي كلف برشلونة طرد ماسكيرانو اللي انقذ انفراد حصل بسبب بطأ ماثيو في التغطية... أعتقد ماثيو هيترمي علي الدكة مع عودة بيكي أوفيرمايلين.

التشي عن جدارة هيهبط الموسم ده بالتأكيد... فريق ضعيف و مافيش في أي بارقة أمل وخسارة فيه الكلام.

خلاصة الكلام: برشلونة بدا مهمة صعبة الموسم ده بفوز سهل ومريح علي فريق كان لازم يخسر بنتيجة أكبر من كده... واطمن علي استعداد ميسي وانسيتا للموسم الجديد... منير الحدادي اثبت نفسه في المباراة بقوة وان الصف الثاني في برشلونة علي استعداد كامل لتدعيم الفريق في الهجوم... ولكن مع انتهاء عقوبة سواريز وشفاء نيمار هيلاقي نفسه زبون مستديم للدكة و أعتقد لويس إنريكي لازم يعطيله الفرصة من وقت للتاني عشان ماينتهيش بيه الحال في اعارة مستديمة لفرق في قاع الجدول.

رجل المباراة: ميسي.

ريال مدريد و كوردوبا (2-0):

في واحدة من أسوء مباريات ريال مدريد يتمكن من الفوز علي فريق متواضع... 3 مباريات في 7 أيام في بداية موسم اكيد فترة مرهقة لاي فريق خصوصا ان ريال مدريد كان بيلعب وبينافس علي كل البطولات الموسم اللي فات لحد اخر لحظة وبعدين معظم لاعيبته اشتركوا في كأس العالم ولم يحصلوا علي الراحة الكافية... ولكن ريال مدريد اخذ المطلوب من اللقاء بغض النظر عن الأداء.

ماتش هادي جدا لريال مدريد وازداد هدوء بغرابة بعد هدف بنزيمة اللي أحرز اول اهدافه مع ريال مدريد بعد اخر هدف اللي كان في بايرن ميونيخ الموسم الماضي... باستثناء مودريتش وكروس وبنزيمة كل لاعبي ريال مدريد ظهروا في غير حالتهم تماما... أخطاء دفاعية غريبة وسوء تغطية أغرب من أربيلوا و مارسيلو أمام فرقة من المفترض انها متواضعة هجوميا... هدوء غير عادي من بيل وحالة توهان غريبة... خايمس لسه قدامه كتير علي التأقلم انه مش نجم الفريق ولازم يعمل مجهود أكثر من كده ويكون خفيف الحركة أكتر من كده... كريستيانو رونالدو قضي الماتش في محاولات مستمرة ولكنه وقع في التسلل برقم قياسي في تاريخه علي ما اعتقد... كريستيانو حاول مساعدة الفريق علي قد ما يقدر في ظل حالة الهدوء المسيطرة ولكن الواضح انه مش في أحسن حالاته البدنية والأحسن انه يرتاح أسبوعين كاملين عشان يرجع في قمة مستواه... ولكن حتي وهو في مش في حالته استطاع احراز هدف ماركة مسجلة بتسديدة من 25 ياردة انهت الماتش عمليا.

أنشيلوتي واضح انه لم يستقر حتي الان علي الثلاثي الأساسي في خط الوسط... دي ثالث مرة يتغير الثلاثي في أربع مباريات رسمية حتي الان ولكن الأكيد ان مودريتش وكروس مكانهم محفوظ وثابت والكلام كله هيكون التغيير بين ألونسو أو خايمس أو خضيرة والابقاء علي ايسكو كبديل... وان كان ايسكو لما نزل بديل لرودريجيز قلب الملعب وأصبح ريال مدريد نشيط أكتر بكتير لأن في الماتشات المقفولة اللي زي ده محتاج لاعب مهارته الفنية عالية جدا زي ايسكو اللي بيقدر يرقص اي حد ويعدي ويعمل تمريرات حاسمة في لحظة وده لسه مش متوفر في خايمس.

أنشيلوتي محتاج ينسي أربيلوا تماما الفترة القادمة لأنه احد أسباب اهتزاز دفاع ريال مدريد... أيضا راموس اللي كان بطل ريال مدريد في نهاية الموسم الماضي مش في قمة تركيزه حاليا ومحتاج يركز أكتر انه يقود الدفاع بدلا من محاولة احراز الاهداف أو صناعة التمريرات العالية الطولية اللي مش بتفع في الماتشات دي خالص... أما مارسيلو فهو مفتاح هجومي مهم جدا لريال مدريد ولكنه في نفس الوقت خرم دفاعي لا يستهان بيه في الفريق... ما ينقص مارسيلو هو مزيد من التركيز والتدريب علي الضغط الدفاعي لأنه سريع فا هيقدر يرتد بسرعة من الهجوم ولسه صغير (26 سنة) وعنده فرصة انه يتعلم.

خلاصة الكلام: ريال مدريد مازال يعاني كل ما واجه فرقة بتقفل دفاعيا والحلول بتكون محدودة جدا بالنظر لمهارات وامكانيات اللاعيبة اللي عنده... ريال مدريد السنة اللي فاتت خسر الدوري بسبب النوعية دي من الفرق اللي لو كان كسبها كان حقق الثاثية التاريخية... وذروة تألق ريال مدريد كانت أمام الفرق الكبيرة اللي بتهاجم وتدافع بطبيعيه وفاتحه الملعب... تحدي جديد لأنشيلوتي الموسم ده انه يلاقي حل ينجح مع الفرق اللي بتقفل دفاعها.

رجل المباراة: بنزيمة.

أتليتيكو مدريد و رايوفايكانو (0-0):

أول دربي للعاصمة الموسم ده انتهي بالتعادل... نفس اللي حصل في ماتش ريال مدريد حصل في ماتش أتليتيكو مدريد... فريق منهك بدنيا وبيحاول يستغل الفرص اللي صنعها ولكن رعونة لاعيبته ضيعتها وضيعت نقطتين سهلين في سباق شرس علي الليجا الموسم ده وكان ممكن الثلاث نقط كلها تضيع لولا براعة مويا وعدم استغلال رايوفايكانو للفرص القليلة اللي جتلهم.

دييجو سيميوني شاهد من المدرجات بعد عقابه لمدة 8 مباريات من الاتحاد الاسباني بعد احتكاكه بحكم مباراة كأس السوبر... سيميوني اتفاجأ زي معظم الجماهير بالتعادل وبمستوي معظم اللاعيبة خصوصا خط الهجوم اللي ظهر في حالة سيئة... ماندزوكيتش انضم للروخيبلانكوس لخلافة مهاجم سجل 30 هدف في الموسم الماضي في الدوري وكان بيستغل اقل فرصة وبالتالي لازم يكون علي مستوي طموحات جماهيره... ماندزوكيتش لم يستطع استغلال فرصتين كان ممكن ينهوا اللقاء تماما ويكسب أتليتيكو الثلاث نقط بكل سهولة.

وهنا يجي السؤال، سيميوني في الماتش ده اتحط في موقف مشابه لنهاية الموسم اللي فات لما كوستا اتصاب وماكانش في بديل علي نفس المستوي... هل سيميوني عنده مهاجم بديل بنفس قوة ماندزوكيتش لظروف ان ماندزوكيتش مستواع يكون سئ في ماتش أو اصيب حتي؟

خط وسط الروخيبلانكوس مفتقد بشدة للسلطان سليم التاني "أردا توران"... حامل اللقب حقق 71% معدل تمريرات سليمة في اللقاء، معدل ماتعملوش فرقة بتنافس علي الهبوط (رايوفايكانو حقق 80% تمريرات سليمة)... توران هو وحش اخر في وسط الملعب جنب كوكي... طاقة لاتنتهي من الدفاع والهجوم... دفاع بفن مش بعنف وهجوم بمهارة مش مساندة بالروح بس.

أنسالدي و سيكويرا في المباريات الرسمية حتي الان لم يقنعوا دفاعيا ولكن يظل أنسالدي أكثر فعالية هجومية وأعتقد سيميوني لسه لم يجد البديل الكفئ لفيليبي لويس ومحتاج يكتشف حد من ناشئين النادي يكون بديل جيد ويؤهله للمستقبل.

خلاصة الكلام: أتليتيكو مدريد فاز بالسوبر الأسباني عن جدارة بكل تأكيد ولكن فوزه كان بسبب دفاعه المستميت وبسبب هبوط مستوي ريال مدريد في نفس الوقت... ولكن في الدوري الوضع يختلف، سيميوني محتاج يطور العقلية الهجومية للفريق لأن الدفاع مش شرط انه هينجح مع كل فرق الليجا الا مع برشلونة وريال مدريد... (الموسم الماضي الروخيبلانكوس فازوا بالدوري باحراز 77 هدف... أقل ب 23 هدف من برشلونة الوصيف)... التجانس بين جريزمان ومادزوكيتش وخط الوسط لسه مش في أحسن الحالات ودي مهمة سيميوني انه يدمج خط هجومه الجديد في الفريق.

رجل المباراة: ألفاريز "حارس رايوفايكانو".

ملحوظة: الحالة البدنية اللي ظهر عليها أتليتيكو مدريد و من قبله ريال مدريد بتطرح تساؤل مهم عن موعد اقامة مبارتي كأس السوبر... علي الأقل لازم تتلعب أسبوع قبل بداية الدوري ويستحسن تكون من مباراة واحدة زي انجلترا والمانيا.

تابعونا على:

·         فيس بوك Facebook   www.facebook.com/FootballCollage