أنشيلوتي... عبقري ولا كفتجي؟

أسئلة كتير ظهرت بعد الأداء المهين لريال مدريد في الماتش التاني من كأس السوبر الأسباني و اخيرا المهزلة اللي حصلت في ملعب أنويتا امام ريال سوسيداد... هو ريال مدريد فعلا اتأثر برحيل دي ماريا و ألونسو؟ طب وهو كروس وخايمس ماعملوش أي فرق ولو حتي بسيط؟ ليه الفريق كان اداءه شبه منتخب مصر كده؟ هو كاسياس لسه متأثر بكأس العالم؟ ده كان لسه من 3 شهور من نجوم الفريق ومن أسباب فوز الريال بدوري الأبطال... طب هي المشكلة في الدفاع ولا في الهجوم؟ في ماتش أتليتيكو المشكلة كانت هجومية وفي ماتش سوسيداد المشكلة كانت دفاعية... طب هو المشكلة في أنشيلوتي؟ هو مدرب جامد ولا مدرب اي كلام؟ طب ماهو كان عامل فريق اسطورة في أي سي ميلان وراح خد الدوري مع تشيلسي وباريس سان جيرمان وهو اللي كسِب الريال الكأس العاشرة اللي عجز عنها 10 مدربين قبله وفاز علي برشلونة في نهائي الكأس من غير رونالدو ومسح بكرامة حامل لقب دوري أبطال أوروبا "بايرن ميونيخ" الأرض في أرضه... بس قصاد كده خسر الدوري السنة اللي فاتت بخسارته ماتشين برشلونة في الدوري والخوف من المجازفة امام الفرق الكومبارس اللي اتجرات عليه في الدوري و خسر بسببها وبدايته للدوري الموسم ده غير مبشرة بالمرة... فهل كارلو أنشيلوتي عبقري ولا كفتجي؟

وجهة نظر... أنشيلوتي كفتجي

أنشيلوتي بعد تاريخ حوالي 17 سنة تدريب نقدر نقول انه مدرب كويس وعنده عدد من البطولات مش بطال ولكن مانقدرش نضمه لقائمة أحسن 10 مدربين في التاريخ أو في أخر 20 سنة حتي... هو متخصص في بطولات الكؤوس علي عكس انه كسب 3 بطولات دوري فقط في ال 17 سنة تدريب (1 مع ميلان 2004 و 1 مع تشيلسي 2010 و اخيرا مع باريس سان جيرمان في 2013) في حين علي سبيل المثال جوزيه مورينهو فاز ب 7 بطولات دوري في 13 سنة تدريب وفابيو كابيللو فاز ب 7 بطولات دوري أيضا ولكن في 22 سنة.

الموسم اللي فات ريال مدريد خسر الدوري بسبب عدم مجازفة وغباء وخوف أنشيلوتي في المباريات اللي كان ترتيبها بين مباريات دوري الأبطال وكانت أمام فرق صغيرة... الظروف خدمت أنشيلوتي انه ما لم يحرق جاريث بيل في بدايته مع ريال مدريد انه اتصاب... لأنه لما اعتمد عليه في أول كام ماتش بدون ما يكون جاهز وكان أداءه سئ للغاية وللمرة التانية بيكرر أنشيلوتي نفس الغلطة ويبدأ بخايمس رودريجيز أساسي بعد أيام من انضمامه للفريق وبرضه أداءه سئ جدا... أنشيلوتي هو الوحيد في العالم اللي مقتنع ان كروس ومودريتش وخايمس هيقدموا خط وسط متوازن لريال مدريد علي عكس جميع معتقدات كرة القدم وأبسط الأراء فيها... أبسط مشجع للفريق فاهم ان الثلاثة مش هيقدموا المساندة الدفاعية اللي تأمن الفريق بالشكل المطلوب.

ومن ناحية تانية، لو في ماتش اتجه في سيناريو غير مرغوب فيه بالنسبة للفريق فنادر جدا نشوف أنشيلوتي بيقلب الماتش بتغيير أو كلام حماسي بين الشوطين للاعيبه... كل ما وضع الماتش يسوء كل اللي بيحصل ان خدوده بتدلدل أكتر بس... أما من ناحية الصفقات فأنشيلوتي عبارة عن "زكي قدره إيطالي"... ادبح يا زكي قدره، يدبح زكي قدره... اشترينا ده يا زكي قدره، يرحب بيه زكي قدره... هنبيع ده يا زكي قدره، يودعه زكي قدره... لعب ده يا زكي قدره عشان نبيع تشيرتاته، يلعبه زكي قدره... بيريز فرر يبيع دي ماريا في أحد أغبي القرارات اللي أخدها في فترة رئاسة للنادي بدون أي معارضة حقيقية من أنشيلوتي يالنسبة للاعب كسبه البطولتين... ويطلع أنشيلوتي يقول انه مقتنع ببنزيمه ومش محتاج مهاجم تاني وموسم الانتقالات انتهي وبعدها بأسبوع يتعاقد فلورينتينو بيريز مع خافيير هيرنانديز.

وجهة نظر... أنشيلوتي عبقري

كارلو أنشيلوتي هو ملك المدربين في دوري أبطال أوروبا... هو أحد 2 مدربين فقط فازوا بالبطولة 3 مرات "بوب بايزلي مع ليفربول" وحل مرة واحدة في مركز الوصيف بعد النهائي التاريخي أمام ليفربول في اسطنبول 2005... أنشيلوتي فاز ب 16 بطولة منهم 13 بطولة كأس ومن هنا اكتسب شهرته بالتخصص في بطولات الكأس واللي أكدها بقيادته للفريق الملكي للفوز بلقب انتظروه 12 سنة.

بعد موسم من قيادته لريال مدريد، حطم أنشيلوتي جميع أرقامه مع الأندية اللي دربها قبل كده... أنشيلوتي حقق تاني أعلي نسبة فوز لمدرب في ريال مدريد ب 74% (بعد مانويل بيلليجريني ب 75% في 48 مباراة)...أيضا حقق اعلي متوسط لإحراز الأهداف في تاريخه التدريبي حيث احرز الفريق 168 هدف في 65 مباراة فقط في حين أحرز مع باريس سان جيرمان 177 هدف في موسم ونصف و 241 مع تشيلسي في موسمين... ومن الناحية الدفاعية فأنشيلوتي سجل تاني أقل متوسط أهداف استقبلها فريقه ب 55 هدف في 65 مباراة.

يحسب لأنشيلوتي انه بكل تواضع وذكاء برضه أكمل ما بناه مورينهو قبله في ريال مدريد وماقررش انه يبدأ من الصفر وقرر يحتفظ بكل أعمدة الفريق الرئيسية وطور مستواهم بشكل ملحوظ بالذات دي ماريا ومودريتش وراموس...بدأ الموسم بموقف عصيب من الإصابات في أول الموسم الماضي بإصابة ألونسو وخضيرة في نفس الوقت، راهن علي توظيف دي ماريا في مركز لاعب خط الوسط المهاجم والاستفادة من مروغاته وسرعته الي جانب بيل ورونالدو... أنشيلوتي بخطته دي حول دي ماريا لواحد من أهم 5 صناع للعب في العالم تقريبا.

في غياب مؤثر لكريستيانو رونالدو في نهائي كأس الملك، أنشيلوتي أظهر لمحة من الذكاء انه سيطر علي برشلونة وميسي في جميع فترات اللقاء وأظهر شخصية قوية لريال مدريد لم تتأثر بهدف بارترا المتأخر اللي رد عليه بيل بهدف عقاب لبارترا اللي مقدرش يكمل نص المشوار مع بيل... وبعد تخلص ريال مدريد من عقدة الأراضي الألمانية علي يد أنشيلوتي امام شالكة ومن بعده دورتموند، كارلو أنشيلوتي قرر يأكد مسح العقدة دي تماما في مواجهة تاريخية أمام أقوي فرق أوروبا في الوقت ده وحامل لقب دوري الأبطال... علي مدار 180 دقيقة أفشل أنشيلوتي كل محاولات بايرن ميونيخ في احراز هدف أو حتي تشكيل تهديد حقيقي علي مرمي كاسياس بالعكس هزمهم بنتيجة مهينة في أرضهم... و أنهي الموسم نهاية من الأحلام بفوز بدوري الأبطال... اه أتليتيكو مدريد كان كسبان لحد الدقيقة 92 و48 ثانية ولكن تماسك الفريق واصراره واستغلال نقاط قوته بالتأكيد يحسب الفوز بالبطولة لأنشيلوتي.

أما عن رحيل دي ماريا وألونسو وموراتا... فرحيل اللاعبين مهما كانت أهميتهم مش مقياس علي ذكاء أو غباء المدرب ولنا في بروسيا دورتموند و أتليتيكو مدريد وتشيلسي و ليفربول عبرة.

وجهتين نظر مختلفين تماما... ولكن الأكيد ان كارلو أنشيلوتي حاليا من أحسن 5 مدربين في أوروبا لأنه قضي موسم ناجح جدا مع ريال مدريد اللي كان تحت قيادته أقوي فريق في أوروبا الموسم الماضي... هدوءه غير العادي هو نقطة قوة من وجهة نظره بسيطر بيها علي فريق ملئ بالنجوم... أنشيلوتي من المدربين اللي بيعتمد اعتماد شبه كلي علي الخطة اللي بيحطها قبل الماتش أما لو حصل سيناريو تاني في الماتش ففي معظم الأحيان بيقف يتفرج زينا زيه... كل مدرب ليه أيام سودا بيشوفها وأعتقد أنشيلوتي بيحمد ربنا انه شاف الايام دي بدري في الموسم عشان يقف مع نفسه كده ويحاول يكمل المسيرة الناجحة اللي بدأها في الفريق الملكي.

تابعوني على:

·         تويتر Twitter     @MO_ELSADEK

·         فيس بوك Facebook   www.facebook.com/FootballCollage

Follow @MO_Elsadek