الدوري الانجليزي – ملخص الجولة الأولي

Football Collage هيحاول يقدملكم ملخص لكل جولة في الدوري الانجليزي بعد انتهائها... الملخص مش لأحداث الماتش علي قد ماهيكون وجهة نظر في مستوي الفرق ومدي تأثير الماتش علي مسيرتها في الدوري عامة... الكلام هيكون علي الفرق ال 5 الكبيرة لأانهم محط أنظار العالم كله واي فرقة تلفت النظر بشكل غير عادي.

الجولة الأولي كانت تسخين وهادية بشكل أو باّخر... النتائج كانت قريبة جدا والماتشات معظمها مقفول... كل الماتشات اتسجل فيها أهداف وماتشين بس انتهوا بالتعادل...

مانشستر يونايتد و سوانزي:

"الماتشات الودية حماده والدوري الإنجليزي حماده تاني خالص"... ده بالضبط حال مانشستر يونايتد في أول ماتش في الدوري... أول ماتش رسمي لفان جال بيتحطم فيه رقمين سلبيين... أول مرة مانشستر يخسر الماتش الافتتاحي في البيميرليج وأول مرة يخسر مانشستر علي ملعب أولدترافورد أمام سوانزي... فان جال قرر انه يكمل بنفس طريقته اللي جربها في الماتشات التحضيرية للموسم 352 مع الاعتماد علي خافيير هيرنانديز بدلا من فان بيرسي غير الجاهز ولينجارد علي الجناح اليمين.

بعد انتهاء الشوط الأول وضح بشكل كبير جدا ان اللاعيبة تايهة في الملعب مع خطة 352... فان جال نجح بالخطة دي في كأس العالم عشان كان عنده ديرك كاوت وبليند... 2 بيدافعوا بتركيز عالي وبأولوية أكتر من الهجوم وعندهم طاقة لا تنتهي للمساندة في كل هجمة... وكل الكلام ده مش موجود في مانشستر يونايتد... أشلي يونج، ناني، يانوزاي، لينجارد كلهم لاعيبة هجومية بحتة... وبالتالي مع كل هجمة لسوانزي اضطر بلاك أو سمالينج لمقابلة حد من أطراف الملعب وترك فيل جونز لوحده في قلب الدفاع وده اتكرر في هدفين سوانزي انهم قابلوا قلب دفاع وحيد وتغطية أندير هيريرا وفيلايني كانت اي كلام.

 

الجزء التاني من نجاح خطة 352 هي وجود مهاجمين متفاهمين، واحد سريع وواحد بيخلص... في هولندا روبن وفان بيرسي كانوا ناجحين بشكل كبير في الجزء ده... ولكن في ظل غياب فان بيرسي ظهر خافيير هيرنانديز تايه بشكل غامض واضطر روني انه يحاول يقوم بالدورين وده صعب مهمته أكتر... ماتا كمان اتحرك في كل حته في الملعب الا في نص الملعب خلف المهاجمين فكل مجهوده راح هدر.

خلاصة الكلام... فان جال بالتشكيلة الحالية من اللاعيبة مش هيعمل الفرق اللي جماهير مانشستر منتظراه... جناح زي لافيتزي ودي ماريا وكوادرادو مهم جدا للفريق خصوصا بعد رحيل ناني كمان اللي كان بيسد خانة... أيضا التعاقد مع قلب دفاع زي بن عطية أو هوملز أولوية كبيرة بالنسبة لمانشستر... فان جال لازم يعيد النظر في 352 في ظل امكانيات اللاعيبة المتاحة حاليا... جماهير مانشستر مش لازم تبالغ في طموحها الموسم ده خصوصا ان مرحلة بناء للفريق في ظل توحش من فرق تانية زي تشيلسي ومانشستر سيتي... من وجهة نظر واقعية أهم هدف لمانشستر الموسم ده المفروض يكون التأهل لدوري الأبطال الموسم القادم والفوز بأحد الكئوس المحلية لكن المنافسة علي المركز الأول في الدوري هتكون مهمة صعبة جدا.

ملحوظة: فان جال وجيجز هيبة برضه علي دكة مانشستر يونايتد وفرق عن الكفتجي مويس اللي كان غلطة سير أليكس الوحيدة تقريبا انه اختاره.

أرسنال و كريستال بالاس:

"الصرف باين علي أرسنال"... أرسنال بدأ الدوري بفوز مهم عشان يدي ثقة أكثر للاعيبة بعد الفوز علي مانشستر سيتي في كأس الدرع الخيرية... في المواسم الأخيرة الانتصارات اللي في أول الموسم دي كانت بتقلب بمعاناة بعد اصابة لاعب أو اتنين وينتهي الموسم بأرسنال في صراع على المركز الرابع... ولكن الموسم ده ما بين مباراة الدرع الخيرية ومباراة كريستال بالاس نقدر نقول إن أرسنال السنة دي مختلف... لسه طبعا الموسم طويل ومفيش حاجة مضمونة في الدوري الانجليزي بس في فرق... خط الوسط اللي كان صداع المواسم السابقة في حالة اصابة رامسي المعتادة والمتوقع تحصل خلال كام أسبوع أو اصابة ويلشير اصبح فيه لاعيبة كتير وكلهم علي مستوي عالي... وحتي الدفاع بعد قدوم ديبوشي وكالوم تشامبرز... أليكسيس سانشيز عامل فرق في هجوم أرسنال وتنويع اللعب علي أطراف الملعب وخطورة مستمرة.

ممكن حد يشوف أن أرسنال كسب الماتش بالعافية خصوصا بهدف رامسي اللي في الدقيقة 91 ولكن الحقيقة مكسب أرسنال هو النتيجة العادلة للقاء اللي أحرز فيه كريستال بالاس هدف بالصدفة ونام عليه... فرق رهيب بين احصائيات وضغط أرسنال وكريستال بالاس اللي بتبين ان أرسنال كان بيلعب جول مشترك علي كريستال بالاس معظم أوقات الماتش.

ولكن تفكير أرسنال فينجر لازم يتجه للتعاقد مع حارس مرمي "محترم" ومهاجم "عليه القيمة"... شيزني حارس جيد ولكنه عادي جدا ومش بيشيل الفرقة في وقت زنقة والأوقات دي هتقابل أرسنال كتير الموسم ده خصوصا لو عايزين يكملوا شوية في دوري الأبطال... هو ليه ماجابش دييجو لوبيز اللي كان ببلاش؟ ولا حتي نافاس قبل ريال مدريد ب 10 مليون؟... أما سانوجو وجيرود فمستحيل حد يقنعني ان دول مهاجمين علي مستوي عالي... جري بس عالفاضي وده وضح تماما في ماتش بشيكتاش... أحب اوضح ان جيرود و سانوجو كل واحد فيهم سدد مرة واحدة فقط في ماتش كريستال بالاس وكانت خارج المرمي أصلا.

خلاصة الكلام: عقدة السنين العجاف اتحلت في أرسنال و أرسين فينجر بدأ يصرف بقلب جامد وبدأ يكون عنده فرقة تقدر تستمر في المنافسة ولكن مهم انه يصرف شوية علي مركز المهاجم وحارس المرمي عشان يكون عنده فريق يقدر ينافس علي الدوري وباقي البطولات في نفس الوقت.

ليفربول و ساوثهامبتون:

"الحياة ما بعد سواريز"... ليفربول في مرحلة البحث عن بطل للفريق بعد سواريز... ليفربول صرف الفلوس اللي كسبها من بيع سواريز علي صفقات كتير في الدفاع والهجوم منهم 3 لاعيبة من ساوثهامبتون نفسه ولكن ولا صفقة ساعدته في الماتش ده... لوفرين كان متماسك وقوي خلال الماتش ولكن ربنا اختبر قوته وابتلاه بسكيرتل جنبه... لالانا مالعبش وأيمن منصور الشهير ب "ريكي لامبرت" عظمة كبيرة وخسارة الفلوس اللي اتدفعت فيه الصراحة.

ستوريدج كان هو منقذ الفريق في ماتش ساوثهامبتون بهدف في الدقيقة 79 وأعتقد تركيز رودجرز في الفترة الحالية هيكون مع ستوريدج أكتر وازاي يسد بيه فراغ سواريز ولكن ستوريدج من اللاعيبة اللي اصابتهم كتير Injury Prone Player ولو أصيب في أي لحظة خلال الموسم ده هتكون مشكلة لو مفيش مهاجم تاني بنفس القوة لأن "أيمن منصور" مفيش منه أمل.

كنت متوقع قبل الماتش ان برندن رودجرز هيكون أكتر جرأة و يشرك ايمري جان بدل لوكاس ليفا جنب جيرارد وريتشارسون ولكنه دفع تمن عدم جرأته بأداء سئ للغاية من لوكاس... كان أسوء لاعب في الماتش بدون مبالغة... أيضا أعتقد رودجرز لازم يركز شوية انه يلمع ستيرلينج أكتر... ستيرلينج كان بارقة الأمل الوحيدة في منتخب انجلترا في كأس العالم وعنده امكانيات هائلة تؤهله انه يكون هو نجم ليفربول الموسم ده والسنين الجاية لو حد استغله كويس.

بغض النظر عن النتيجة، أداء ساوثهامبتون تحت القيادة الفنية الجديدة لرونالد كومان مبهر مع الاعتبار عدد اللاعيبة اللي استغنوا عنهم خلال الصيف ده.

خلاصة الكلام: الموسم الماضي كان استثنائي لليفربول والموسم ده اختبار لقوتهم ومدي قدرتهم في المنافسة علي اللقب مرة أخري مش اللعب علي التأهل لدوري الأبطال فقط... سير أليكس فيرجسون قدر يخلق نجم جديد يشيل الفرقة في مرحلة "ما بعد كريستيانو" في مانشستر ولكن هل يقدر رودجرز يوجد النجم ده في ليفربول؟

ملحوظة: ليفربول في اخر 29 ماتش لم يفشلوا في التسجيل في مرمي المنافس أي كانت نتيجة الماتش الا في مباراة وحيدة واللي كانت أمام تشيلسي.

مانشستر سيتي و نيوكاسل:

"ريح الزبون"... ماشستر سيتي في الماتش دع فعلا كان بيريح الزبون... نيوكاسل كان فرحان بالصفقات الجديدة اللي عملها ونازل يهاجم في أرضه ووسط جمهوره ومانشستر سيتي سابهم يهجموا براحتهم ومن هجمتين خلص الماتش 2-0 بمنتهي الهدوء والثقة. بعد صدمة الخسارة أمام أرسنال في كأس الدرع الخيرية، مانشستر سيتي كان مهم انه يستعيد الثقة في بداية مشوار دفاعه عن اللقب وقد كان.

يايا توريه لسه ما دخلش في جو الدوري وشكله لسه قلبه اسود من ساعة ما ادارة النادي نسيت عيد ميلاده... كومباني بأداء جبار في الدفاع كان بطل الفريق في الماتش لأنه تحمل عبئ انه يحتوي كل هجمات نيوكاسل بمساعدة ديميكيلس اللي لسه واخد دفعة معنوية من كأس العالم و بياكل النجيلة عشان عارف ان أول ما مانجالا يجهز هيكون مكانه كأساسي في خطر... ستيفان يوفيتيتش اللي كان الاختيار الرابع الموسم اللي فات خدمته الظروف لتنقذ مستقبله الكروي باصابة أجويرو ونيجريدو والحقيقة في المباريات التحضيرية وماتش نيوكاسل كان بيعمل كل جهده انه يستغل الفرصة ولكن دزيكو هو اللي خطف الأضواء بأداءه الرائع خصوصا في صناعته لهدف سيلفا بالكعب.

كابيلا وسيسوكو من نيوكاسل ممكن ياخدوا الفريق لموقع كويس في الدوري السنة دي بس المهم الثقة في امكانياتهم وجرأة انهم يخلصوا الماتش.

خلاصة الكلام: مانشستر سيتي فرقة كاملة متكاملة خصوصا بعد انضمام مانجالا وهيكونوا منافس علي اللقب لحد اخر جولة في الدوري... ولكن الكلام الموسم ده علي دوري الابطال وهل يقدر مانويل بيلليجريني يقودهم لمراحل متقدمة والفوز بالبطولة؟

                

تشيلسي و بيرنلي:

"فوز مريح في بداية لموسم كبير لتشيلسي"... في مفاجأة بيسجل بيرنلي اللي لسه صاعد للدوري أول أهداف اللقاء وبيحاول كام محاولة علي مرمي تشيلسي... ولكن مورينهو استجمع قوي فرقته ورد بقوة ب 3 أهداف منهم أحلي أهداف الجولة الأولي لشورلي... مورينهو طبق في الماتش ده طريقة كان بيعملها كتير مع ريال مدريد في وقت الاجهاد أو بداية الموسم وهي انه يضغط بقوة في الشوط الأول ويسجل أكبر عدد من الأهداف عشان ينهي اللقاء عمليا و بعدين يريح في الشوط التاني ويعمل أقل مجهود عشان يحافظ علي نتيجة الماتش.

دييجو كوستا مع الوقت هيكون من أحسن المهاجمين الموسم ده في الدوري الانجليزي وأتوقع بشكل كبير انه يكون هداف الدوري... نجم اللقاء بلا منازع هو سيسك فابريجاس اللي يعتبر من أنجح صفقات الدوري الانجليزي في الموسم ده... فابريجاس هو المخ وماتيتش هو العضلات في خط وسط تشيلسي.. رؤية سيسك للملعب شئ كان مفتقده مورينهو الموسم الماضي ويفتقده أوسكار برضه... ولكن أوسكار لا غني عنه بالنسبة لمورينهو لسبب بسيط هو انه بيدافع بشكل فعال جدا (مع ان مشوار البرازيل في كاس العالم انتهي بفشل ذريع ولكن أوسكار كان أكثر اللاعبين في كأس العالم كله استخلاصا للكرة ب 37 مرة).

شورلي أحرز هدف هو الأجمل في الجولة الأولي... هدف يكفي نقول انه جه بعد 25 تمريرة لبناءه وده عدد أكثر من أي عدد تمريرات سبقت أي هدف في الدوري الموسم الماضي... تألق شورلي المتصاعد باستمرار في كل ماتش هو تحدي لفرص لعب محمد صلاح انه يلعب وللأسف شكل أبو صلاح هينور علي الدكة كتير ده لو لقي مكان فاضي عليها ولكن فرصته انه يلعب في كأس الاتحاد والرابطة الانجليزية. أيضا مستوي كورتوا في الماتش بيقول ان تشك هيدور علي نادي قريب جدا الا لو قبل انه يلعب في ماتشات الكأس بس.

خلاصة الكلام: تشيلسي هو أنجح الأندية الانجليزية في موسم الانتقالات الحالي باستقدام لاعيبة عملوا فرق ولضح في الفريق وبالتالي هو في رأييي المرشح الأول للفوز بالدوري الموسم ده... الفريق تحت الضغط انه طلع الموسم الماضي من غير بطولات ولكن ده الجو اللي بيبدع فيه مورينهو.

ملحوظة: مش عارف في حد لاحظ اللقطة اللي استلم فيها دروجبا الكرة من شوطة كورتوا ولف وشاط ازاي.. طبعا لو توريس قعد 50 سنة قدام يحاول يعمل زيها مش هيعرف.

وفي نهاية الملخص أحب اشارك معاكم لقطة الجولة الأولي لما مشجع لتوتنهام نزل الملعب وشاط الضربة الحرة قبل ايريكسن 

تابعونا على:

·         تويتر Twitter     @MO_ELSADEK

·         فيس بوك Facebook   www.facebook.com/FootballCollage

Follow @MO_Elsadek