موسم الانتقالات – أي سي ميلان

لو كانوا قالوا لمالدينى بعد ما رفع كأس دورى ابطال اوروبا فى 2007 إن بعد سبع سنين الميلان مش هيعرف يصعد لدورى ابطال اوروبا او لأى بطولة اوروبية اصلاً أكيد كان هيتهم اللى قاله كدا بالجنون ... , اللى حصل للميلان ده نتيجة سبع سنين متواصلة من الأخطاء المركبة التى تزايدت و تراكمت حتى اصبح الميلان الفريق الذى ارعب اوروبا كلها يوماً ما و ضم تشكيلة من احسن تشكيلات التاريخ , هذا الفريق المعتمد على اللاعيبة الكسر و بواقى اوروبا ليحملوا قميصاً حمله قبلهم عظماء لن يتكرر مثلهم فى الساحرة المستديرة .

بداية الأخطاء طبعاً كانت بضياع التشكيل و نجوم الفريق إما ببيعهم المباشر لفرق اخرى (بعضها قد يكون منافساً مباشراً لها) و لك ان تتخيل أن فى موسم واحد قام الفريق ببيع جوهرة دفاعه (تياجو سيلفا) و جوهرة خط وسطه (بيرلو) لليوفنتوس !!! و جوهرة هجومه (ابراهيموفيتش) و إما بالإعتزال و فى كل الحالات كان يجب على الفريق التفكير ببديل مناسب لتعويض الراحلين

عزز ذلك الخطأ سلوك عجيب فى سوق الإنتقالات بعدم التعاقد مع لاعبين بمستوى الميلان قادرين على حمل شعار النادى و الدفاع عن الأسود و الأحمر يفتقروا للقدرات الفنية و البدنية لفريق من المفترض انه ينافس على جميع البطولات التى يلعب بها... و من هذا المنطلق وعملاً بمبدأ "ابو بلاش كتر منه" قدم جاليانى فى سوق 2014/2015 سوق انتقالات مثالى لرفع ضغط مشجعى النادى نستعرضه فيما يلى... 

طبعاً زى ما احنا شايفين اكتر كلمة اتكررت فى سوق انتقالات الميلان هى كلمة "انتقال حر" و اللى بتلخص سلوك الميلان فى الفترة الأخيرة فى سوق الإنتقالات .

مركز حراسة المرمى كان صداع كبير جداً بالنسبة لمشجعين الميلان فى الفترة الأخيرة خصوصاً فى ظل مستوى ابياتى الضعيف جداً فى الفترة الأخيرة خاصة فى المباريات الكبيرة و عدم قدرة اميليا على سد حاجة الفريق فى هذا المركز جاليانى بص على السوق , دوّر على افضل ما يمكن جلبه بصفقة انتفال حر طبعاً و تعاقد مع ديجو لوبيز , بعيداً عن ادائه الباهت فى ماتش فالنسيا و هدف باكو الكاسير اللوب ضده , ديجو لوبيز هيأتى بقدر كبير من الأمان للميلان فى مركز حراسة المرمى اولاً و اخيراً ده الحارس اللى اقنع مورينهو انه يقعد كاسياس بجلال قدره على الدكة سنة و نص تقريباً يمتاز بمعدل تصديات ممتاز بالإضافة لثبات مستواه معظم فترات الموسم صفقة ممتازة للميلان من وجهة نظرى .

معلومة: ديجو لوبيز فى موسم 2013/2014 قام بــ 87 تصدى خلال 36 مبارة شارك بها الموسم الماضى .

عانى الميلان طوال الموسم الماضى على مستوى جميع الخطوط بداية بخط الدفاع ... قدم الرباعى دى تشيليو – ميكسيس – عادل رامى – كونستانت و حتى بدلائهم زاكارادو و بونيرا و زاباتا آداء باهت جداً طوال الموسم لا يشفع لأى احد منهم كى يلعب لقميص الميلان اللهم إلا دى تشيليوا الذى كان يظهر بمستوى جيد إلى حد ما لم يكن مصاباً .... سوء دفاع الميلان يتضح من عدد الأهداف التى استقبلها (49 هدف) فى حين إن يوفنتوس بطل الدورى عليه (23 هدف) فقط !!! .... خلل دفاعى كان لا بد له من حل  و قد دعم الميلان دفاعه كالآتى :

 

·         عادل رامى: رفع ضغط جمهور الميلان الموسم الماضى بغلطاته الساذجة و الهدايا اللى قدمها للفرق المنافسة الموسم الماضى ,... جاليانى يعمل ايه ؟ ...يروح يتعاقد معاه بشكل دائم من فالنسيا , عادل رامى لاعب بأمكانيات جيدة ..جيد فى الالتحامات الهوائية يستخلص الكرة بشكل جيد من المهاجمين ..عيبه هو البطء الشديد فى تعامله مع الكرة و عدم قدرته على التمركز الصحيح ..ما يحتاجه عادل - ما يحتاجه دفاع الميلان بشكل عام - هو لاعب يقوم بدور قائد الدفاع ... لعل هذا الدور كان افضل من يقوم به تياجو سيلفا و هو ده سبب انهيار دفاع الميلان بعد رحيله , قائد ربما يعوضه قدوم اليكس اللى بيلعب على عامل الخبرة و الشخصية اكتر من عامل القدرة الجسدية و السرعة و ربما يعيد للسانسيرو الروح التى افتقدها برحيل تياجو سيلفا .

·         ارميرو: من وجهة نظرى هى افضل صفقات الميلان هذا الصيف , ارميرو باك شمال سريع ممتاز بدنياً و فنياً , سنه ممتاز , هيغطى إلى حد كبير على الشارع اللى كان فاتحه كونستانت على البحرى الموسم اللى فات صفقة كان الميلان فى اشد الحاجة إليها و هترجع للجبهة اليسرى رونقها فى ظل عودة الشعراوى من الإصابة .

·         اليكس: صفقة ذات وجهين , بمعنى ان لها جانبين جانب إيجابى هيأثر على ادء الميلان الدفاعى بشكل جيد , و جانب سلبى نتناولهم فيما يلى... على الجانب السلبى اليكس  قلب دفاع "كسر" ببلاش ... اللى جابه الميلان انه مبقاش ليه مكان للعب اساسى او حتى بديل فى باريس سان جيرمان فى ظل وجود تياجو سيلفا و ماركينيوس و استقدام ثانى اغلى قلب دفاع فى التاريخ (دافيد لويز) سنه كبير إلى حد ما لكنه اكيد مش هيكون اسوأ من زاباتا او ميكسيس الموسم اللى فات لكن رغم كدا ..  اتوقع انه فى ظل الخيارات الدفاعية الموجود لدى الميلان حالياً ستظل المشكلة الدفاعية قائمة ما لم يتم استقدام مدافع جاهز مش جاى يتعلم او جاى يعتزل ...مدافع جاى عشان يلعب كرة , و اعتقد انه كابوس الميلان الموسم القادم هو اللعب امام الفرق السريعة او التى تعتمد على الهجمات المرتدة او اللعب فى المساحات بين  قلبى الدفاع و الظهيرين... اما على الجانب الإيجابى فما يحسب لأليكس انه مدافع خبرة و اكيد خبرته الكبيرة هتساعد على ضبط الإيقاع الدفاعى بشكل كبير , هيساعد عادل رامى بشكل كبير الموسم القادم و هيغطى على اخطائه و سيكون قائد خط الدفاع و بالتأكيد الميلان هيقبل اهداف اقل إلى حد ما باستقدامه .

اما خط الوسط فهو قصة اخرى اعتمد الميلان على الخماسى دى يونج و مونتليفو كإرتكازين امامهم  عادل تعابرات و بولى كأجنحة و كاكا صانع العاب يلعب تحت المهاجم الوحيد ماريو بالوتيلى فى ظل غياب الشعرواى طول الموسم تقريباً للإصابة و مستوى مونتارى و كيسوكى هوندا الغير ثابت و تراجع مستوى إيسيان و كاكا للتقدم فى السن و علامات الإستفهام الكتير حول مستوى مونتيليفو الموسم اللى فات , فكان لابد من تدعيم خط الوسط و قد كان تدعيم الميلان كالتالى:

·         جيريمى مينيز: ببساطة شديدة دينامو فى نصف الملعب الهجومى ... متعدد المواهب سنه ممتازة (27 سنة) بالنسبة انه صفقة ببلاش .. ميزته الكبيرة هى انه يقدر يلعب مهاجم متأخر او جناح وسط ملعب او جناح هجومى أو حتى تحت المهاجم بنفس الكفاءة و ده اللى بيخليه اضافة جيدة جداً لأى فريق بيلعب فيه اكسب الميلان عمق كبير التشكيلة  و اعتقد انه هيعوض رحيل تعابرت بشكل جيد .. عيبه الوحيد انه مش بيجيب اهداف كتير بالنسبة للاعب مركزه هجومى اصلا (مينيز أحرز موسم 2013/2014 هدفين فقط فى 26 مباراة لعب فيهم !!! ) و ده اللى اللى خلى لوران بلان يستغنى عنه بسهولة خاصة فى ظل وجود حلول كثيرة جاهزة عنده قادرة انها تأدى بشكل ممتاز... مشكلة اكيد الجهاز الفنى بقيادة فيليبو إنزاغى هيشتغلوا عليها معاه و اتوقع تحسن كبير فى مستوى مينيز الموسم القادم خاصة فى ناحية تسجيل الأهداف .

·         حكيم مستور: موهبة تألقت مع فريق الناشئين لاعب ايطالى من اصول مغربية تم تصعيده للفريق الأول محتاج يكتسب خبرة المباريات و عنده حاجات كتير اوى لازم يتعلمها من مدربه و بديل مجانى للمتذبذب ماريو بالوتيللى و للحاضر الغائب باتزينى .

ملحوظة: انا لحد دلوقتى مش عارف ازاى الميلان يتخلى عن مهاجم زى ماترى لصالح جنوى فى حين انه (فى رأيى) افضل بمراحل من بقايا باتزينى اللى بتلعب للميلان حالياً ... لاعب قادر على صناعة الفارق و تخلّى الميلان عنه عليه الف علامة استفهام .

عادل تعابرت: لاعب غير موجود على قائمة انتقالات الميلان حتى الآن , و المشكلة هنا انه مش موجود فى حسابات جاليانى , لاعب نجح جداً مع الميلان الموسم الماضى خلال فترة اعارته ..اثبت نفسه و اثبت انه افضل من معظم اللاعيبة الكسر اللى بتلعب فى الميلان حالياً ,... رغم انه كان جاى فى إعارة لعب بروح الفريق كأنه كان بيلعب فيه من سنين , قدم الكثير من الحلول الهجومية لسيدورف الموسم الماضى و صنع الفارق فى معظم المباريات التى لعبها , انتهت فترة اعارته و عاد لفريفه ..تعمل ايه يا جاليانى ؟ ..ايوا بالظبط ..تسيب اللاعب طبعاً و متجيبهوش تانى لأنه بفلوس.

بالوتيلى: " اليوم هو اليوم الأخير لى فى الميلان " ..هكذا قال مهاجم الميلان بالوتيلى لسكاي ايطاليا اليوم... كل التقارير تتحدث عن قيمة ما بين 16 إلى 22 مليون يورو , بالوتيلى أو " المجنون " كان بارقة الأمل فى هجوم الميلان , رغم استهتاره و اداءه الباهت فى البرازيل إلا انه يبقى واحد من افضل مهاجمى ايطاليا ..ظلمه الميلان بإجباره على اللعب فى مركز غير مركزه .. بالوتيلى مهاجم تبدأ خطورته بعد استلامه للكرة , فهو مهاجم يحب التحرك خارج منطقة الجزاء و الهروب من الرقابة ليس كما فرض عليه فى الميلان بإجباره على اللعب كرأس حربة وحيد داخل منطقة الجزاء , اعتقد انه سيكون لهذه الصفقة تأثير سلبى جداً على الميلان الموسم المقبل بالوتيلى احرز 16 اهدلف فى 31 ظهور بقميص الميلان الموسم الماضى ..معدل قد يراه البعض ضعيفاً بالنسبة لمهاجم , لكن معظم هذه الأهداف كانت اهداف حاسمة حددت جزء كبير من مصير الميلان الموسم الماضى , اعتقد ان اكثر من سيفتقد بالوا فى الميلان هم الجماهير انفسهم , و متأكد بأن الميلان سيعانى جداً هجومياً الموسم القادم ما لم يقم بجلب صفقة مهاجم قوية يغطى بها على رحيل بالوتيلى و إعارة ماترى و بقايا باتزينى التى تلعب حالياً للميلان , الحديث الآن فى الميلان عن استقدام "جاكسون مارتينيز " مهاجم ممكن يكون حل مؤقت لمعاناة الميلان هجومياً .

و فى النهاية تبقى اهم صفقة ينتظرها مشجعى الميلان و هى صفقة التعاقد مع فريق طبى و مدرب احمال جديد للنادى بعدما اثبت الفريق الحالى انه مينفعش يبقى فريق طبى لنادى بيلعب فى دورى الدرجة الرابعة الإيطالى مش نادى معاه سبع بطولات دورى ابطال اوروبا , بملف اصابات اكبر من ملف مصابين الحرب العالمية الثانية ... جمهور الميلان نفسه يعرف يعنى ايه لاعب يلعب ماتش واحد بس يتصاب فيه اصابة تبعده عن الملاعب طول الموسم ... يعنى ايه لاعب يغيب شهر لأصابة عضلية و فى اول ماتش يلعبه بعد رجوعه يتصاب اصابة عضلية يغيب بسببها شهرين عن الملاعب ؟ !!! ...فين الفريق الطبى ؟ فين مدرب الأحمال ؟!! ... الميلان دفع ثمن التقصير ده غالى جداً بغياب لاعبين مهمين فى مباريات حساسة جداً فى الموسم , لو حضروا لربما رأينا الميلان هذا الموسم يلعب فى احد البطولات الأوروبية .

كرة القدم لا تعترف بالتاريخ ولا بالألقاب ... كرة القدم تعترف بمجهود 11 لاعب يقدمون كل ما لديهم من اجل شعار ناديهم ... كرة القدم تعترف بإدارة ناجحة بأمكانيات مادية قوية تعرف ما يحتاجه الفريق و تعمل على تلبيته و سد حاجات الفريق ... كرة القدم تعترف بمن يقدم لها كل شئ... هذا هو الدرس يا جاليانى

طبعاً يبقى الحكم النهائى هو المردود الحقيقى للاعبين على مدار الموسم الذى يوشك على البدء ... لكن لا اعتقد انه لو لم يتم التعاقد مع مهاجم عنده القدرة على اقتناص انصاف الفرص – خصوصاً و إن آخر الأخبار بتتكلم عن اهتمام الليفر بالتعاقد مع بالوتيلى - و جناح يعطى المزيد من العمق للتشكيلة زى تشيرشى مثلاً اللى جاليانى مهتم بيه بقاله اكتر من شهر و نص لا اعتقد انه على مشجعى الميلان التفاؤل كثيراً بالمستقبل القريب للفريق فعلى الأغلب هم لن يستطيعوا التأهل لدورى الأبطال الموسم المقبل خصوصاً فى ظل صحوة روما و قوة اليوفى و صفقات نابولى.

  

تابعونا على: 

·         فيس بوك Facebook   Mahmoud Hassaan

·         فيس بوك Facebook   FootballCollage