موسم الإنتقالات – ريال مدريد

هدف راموس في الدقيقة 93 في نهائي دوري الأبطال هيفضل محفور في ذاكرة كل مشجع لريال مدريد لأنه فتح الباب لحلم بحث عنه ريال مدريد لمدة 12 سنة وأخيرا اتحقق في 2014... حلم اتكون عشانه الجالاكتيكوس وفشل... اتغير عشانه 10 مدربين منهم واحد من أحسن المدربين في العالم وواحد فاز السنة اللي فاتت بالدوري الانجليزي... موسم 14/2013 من المواسم الكروية اللي مش هتتنسي في تاريخ ريال مدريد... الموسم اللي فازوا بيه بالكأس العاشرة في دوري أبطال أوروبا... الفرحة بالفوز بكأس الملك كانت فرحة بهزيمة برشلونة أكتر... ولكن الفوز بدوري الأبطال هو الحدث الرئيسي في موسم الفريق الملكي.

عقد من الزمان عاشه ريال مدريد في فترة من التخبط الكروي بعد الفوز بدوري الأبطال التاسعة في موسم 02/2001... الفوز مرة والخسارة مرة... موسم يفوز بالدوري أو الكأس وموسم من غير ولا حاجة... بدأت مرحلة سيطرة برشلونة علي الكرة الأوروبية في ظل محاولات يائسة من ادارة النادي في كسر السيطرة دي... لحد موسم 11/2010 اللي شهد تعيين الاستثنائي جوزيه مورينهو... ناس كتير هتختلف في مدي تأثير مورينهو في ريال مدريد ولكن الأكيد ان مورينهو حط قواعد النجاح في ريال مدريد وأرسي النظام Discipline اللي كان محتاجه الفريق... فعلا ريال مدريد فاز فقط ب 3 بطولات في 3 مواسم مع مورينهو ولكن مورينهو كسر بيهم عقدة دور ال 16 لدوري الأبطال وأصبح ريال مدريد ضيف اساسي في المربع الذهبي... مورينهو كسر عقدة وسيطرة برشلونة... مورينهو هو اللي دق أول مسمار في نعش التيكي تاكا.

في أول مواسم كارلو انشيلوتي مع ريال مدريد فاز ب بطولتين من 3 خاضهم في موسم ناجح بالتأكيد ولو كان أنشيلوتي جازف أكتر في الدوري بعدم إراحة اللاعبين الاساسيين في الاخر كان ممكن يحقق ثلاثية تاريخية للفريق الملكي... وبدأ الموسم الحالي ببطولة السوبر الأوروبي... سر نجاح أنشيلوتي السريع انه اكمل وابتكر اللي بناه مورينهو مع الحفاظ علي نفس النظام Discipline ويمكن أقوي كمان... من أكبر التحديات اللي واجهت أنشيلوتي الموسم الماضي هو رحيل أوزيل و ومحاولة ايجاد طريقة تستوعب بيل وكريستيانو ودي ماريا في نفس الوقت... وفعلا بتوظيفه لدي ماريا في مركز صانع اللعب بدلا من الجناح واللامركزية في مراكز الهجوم، توصل للخطة السحرية للنجاح واللي بسببها مافيش حد افتكر أوزيل بعد نجاح دي ماريا وبيل.

خطة أنشيلوتي توجت ريال مدريد بأقوي بطولات العالم للأندية وقهر بيها عقدة ريال مدريد الألمانية وتفوق علي برشلونة في حسم كأس الملك... تفوق هجومي كاسح لريال مدريد علي كل فرق أوروبا... ولكن مافيش فريق من غير نقطة ضعف مهما كانت قوته... نقط ضعف ريال مدريد الموسم اللي فات كانت كالاّتي:

                                        i.     من بعد رونالدو "الكرش" وفان نيستلروي الله يرحمهم ماجاش مهاجم بمستواهم لريال مدريد... بنزيمه مهاجم قوي وهداف وذكي ولكنه مش حاد أمام المرمي... بنزيمه بيسجل هدف من كل 4 أو 5 فرص وده مش كافي مع فريق بحجم ريال مدريد بيقابل فرق معظمها بيكون مقفل دفاعه ومحتاج مهاجم يستغل أقل غلطة.

                                       ii.     خط الوسط الدفاعي عاني كتير الموسم الماضي بعد إصابة سامي خضيرة... فعالية الهجوم غطت في أوقات كتير علي العيب ده و مودريتش وألونسو حاولوا يطوروا أدائهم الدفاعي بشكل كبير وايارامندي لسه بدري عليه.. بسبب عدم وجود لاعب خط وسط مدافع قوي خسر ريال مدريد مواجهات مهمة في الدوري بالتحديد كان ممكن يفوز بالدوري لوكسبها.

                                     iii.     قلب دفاع ريال مدريد يمتلك 3 من أحسن مدافعي العالم حاليا... ولكن راموس وبيبي بتنتابهم بعض لحظات التوهان في لحظات بتصدف انها تكون مؤثرة... الحقيقة دي مش نقطة ضعف علي قد ماهي نقطة محتاجة شغل مدرب... اصابة فاران الموسم الماضي تركت أنشيلوتي معظم الوقت مجبر يلعب براموس وبيبي حتي فأوقات هبوط مستوي اي واحد فيهم... ولكن في الربع الأخير من الموسم أنشيلوتي تدارك لحظات التوهان دي وانها الموسم بدفاع حديدي "بدليل مبارتي بايرن ميونيخ" وراموس بالتحديد كان بطل ومنقذ ريال مدريد في نهاية الموسم.

ريال مدريد حتي الان بيعيش واحدة من أنجح فترات الانتقالات في تاريخ النادي... حصل علي 3 من نجوم كأس العالم منهم بطل وهداف لكأس العالم وحتي الان لم يتخل عن أي من نجومه... ريال مدريد صرف حوالي 116 مليون يورو وحصل علي 23.5 يورو من بيع موراتا واعارة كاسيميرو... ولكن ريال مدريد هو أعلي الاندية الرياضية دخلا في العالم ولسه عنده القدرة علي تعاقدات اضافية الصيف ده. 

التعاقد مع توني كروس من وجهة نظري من أنجح صفقات ريال مدريد في ال 10 سنين الأخيرة... لاعب ذكي بيتمتع بقدرة غير عادية علي التمرير و ال Trough passes "في أول ماتش ليه مع ريال مدريد حقق نسبة 96% تمريرات صحيحة"... تسديدات قوية و من كل مكان في الملعب... مساند جيد للدفاع... وفهم تكتيكي وقراءة ممتازة للملعب... كل مدرب في العالم يتمني لاعب بالمواصفات دي... الموسم الماضي كان موسم مودريتش اللي كان نجم الفريق ولكن الموسم ده أتوقع ان النجم هيكون كروس.

صفقة خايمس رودريجيز لريال مدريد هي صفقة تسويقية أكتر منها سد احتياج للفريق... الفريق في نفس مكان صانع اللعب ده عنده ايسكو، دي ماريا وممكن مودريتش وكروس يقوموا بالدور ده كمان... قيمة الصفقة بالتأكيد مبالغ فيها ولكن كل الناس قالت كده علي صفقة بيل الموسم اللي فات و بيل اثبت من غير شك انه يستاهل كل مليم ادفع فيه بعد ما أحرز هدفين الفوز بالكأس ودوري الأبطال... ولكن خايمس هو هداف كأس العالم ومهارته ممكن تكون اضفة قوية لريال مدريد... في ماتش السوبر الأوروبي ظهر مرتبك مع لحظات من المهارة  ولكن مع الوقت ممكن يبدأ يثبت نفسه... ولكن الأهم انه يستوعب انه عشان يتألق في ريال مدريد لازم يظهر مهاره ومجهود بحجم النجوم اللي بيلعبوا جنبه لأنه مش في موناكو أو بورتو ومش هو نجم الفريق.

دييجو لوبيز امضي موسم ونصف في حراسة مرمي الفريق وكان متألق في معظم الأوقات... ولكن لوبيز الموسم الماضي كان السبب في ضياع بعض النقاط من الفريق الملكي في الدوري... كاسياس ممكن يكون متألق لمدة 5 ماتشات وفي ماتش تاني يغلط غلطة ساذجة  بمستوي حارس مبتدئ... أما لوبيز لو بيكون متألق طوال الموسم  بييجي في كرات مهمة أو صعبة ويفشل في صدها ودي نقطة قوة كاسياس... الاختيار والمقارنة بين الحارسين صعبة جدا ولكن الموسم الماضي كاسياس أثبت انه لا غني عنه في ريال مدريد بالرغم من مشاركته فقط في دوري الأبطال "من 13 ماتش حافظ 6 مرات علي نظافة شباكه"... مستوي ايكر كاسياس في كأس العالم كان سئ للغاية ودي حاجة محدش يختلف عليها ولكن ده لأن الفريق ككل كان في أسوء الحالات الفنية والبدنية... في حين مستوي كايلور نافاس لفت الأنظار لدرجة ان فلورينتينو بيريز قرر يستبدل دييجو لوبيز بيه... نافاس مع ليفانتي لعب نفس عدد المباريات اللي لعبها لوبيز مع مدريد في الدوري ولكنه عمل ضعف عدد التصديات اللي عملها لوبيز... اعتقد مستواه هيكون أقوي كمان مع دفاع بمستوي ريال مدريد.

ملحوظة: القرار الأمثل كان الحفاظ علي دييجو لوبيز مع كاسياس وبدأ اعطاء الفرصة لخيسوس فيرنانديز خصوصا انه أظهر مستوي رائع في الدقائق اللي لعبها في المباريات التحضيرية للموسم القادم... ريال مدريد أعطي الفرصة لكاسياس انه يكون الحارس الأول للفريق وهو عنده 18 سنة... أعتقد التجربة دي لازم تتكرر.

ريال مدريد بحسب كلام فلورينتينو بيريز هيفضل موجود في سوق الانتقالات لحد اخر يوم... الأولوية لازم تكون التعاقد مع رأس حربة من النوع اللي مبيهزرش قدام المرمي وللاسف النوع ده مش موجود منه كتير... كان الأولي يصرفوا فلوس رودريجيز علي سواريز مثلا... السماح لموراتا بالرحيل ليوفينتوس هيفيد ريال مدريد مستقبليا خصوصا في ظل شرط الأولوية للريال في شرائه مرة تانية ولكن في الموسم القادم هيكون محتاج مهاجم بديل جيد لبنزيمه... فالكاو بالتأكيد حل جيد لريال مدريد علي الرغم من الشكوك حول مستواه بعد اصابته بالرباط الصليبي الموسم الماضي.

صداع شغال في رأس جماهير وإدارة النادي الملكي من بداية فترة الانتقالات الحالية اسمه "رحيل دي ماريا وسامي خضيرة"... بغض النظر عن فشل المفاوضات في اخر لحظة (أرسنال مع خضيرة بسبب المرتب وباريس سان جيرمان مع دي ماريا بسبب ال Financial Fair Play)... سواء دي ماريا ولا خضيرة، بتلعب في أكبر نادي في العالم وكسبت معاه كل البطولات الممكنة ولسه كنت بتلعب في نهائي كأس العالم وخضيرة كسبه كمان... محتاج ايه تاني؟؟ عايز تلعب أساسي؟؟ طب مانت أساسي و لوقعدت احتياطي بيبقي ماتش ولا اتنين... محتاج فلوس؟؟ هو في نادي هيديك فلوس اكتر من مدريد؟؟... ريال مدريد المفروض يعمل المستحيل انه يحافظ علي الاتنين دول عشان يستفيد بمهارتهم الخاصة وعشان يعمل العمق المطلوب في التشكيل مابين الأساسي والإحتياطي. أما من ناحية اللاعبين، دي ماريا لو أصر علي الرحيل فهيكون عديم الطموح خصوصا لو راح باريس سان جيرمان وهيتحول ل "روبينهو" تاني... وسامي خضيرة بسهولة جدا ممكن يحجز مكان أساسي في تشكيل اي فريق بسهولة بسبب امكانياته الهائلة ولكن الحقيقة مش قادر أفكر في سبب واحد مقنع يخليه يرحل عن ريال مدريد.

تشكيلة ريال مدريد الحالية هي تقريبا الأقوي والأكثر اكتمالا في كل أوروباو بالطبيعي ان الفريق يكون المرشح الأول لكل البطولات الموسم القادم... ريال مدريد أمامه 6 بطولات الموسم ده فاز بواحدة حاليا "السوبر الأوروبي"... التحدي الأكبر هو دوري الأبطال عشان مفيش فريق قدر يكسب البطولة مرتين متتاليتين من وقت لما بدأت بمسماها الحالي في 1992. تشكيل ريال مدريد الحالي هو النسخة الثانية من الجالاكتيكوس... جالاكتيكوس أصغر سنا وأكثر فعالية... جالاكتيكوس من نوع مختلف.

تابعونا على:

·         تويتر Twitter     @MO_ELSADEK

·         فيس بوك Facebook   www.facebook.com/FootballCollage

Follow @MO_Elsadek