موسم الإنتقالات – أتليتيكو مدريد

 14/2013 هو موسم الحلم لأتليتيكو مدريد... حلم الفوز بالدوري اللي اتحقق بعد 18 سنة من اخر لقب والوصول لنهائي دوري أبطال أوروبا بعد الاصاحة بمنافسين من كبار أوروبا وخسارة النهائي في الوقت الاضافي... الفوز بالدوري بيكمل عقد بطولات ونجاح متواصل (كأس أوروبا في 2010 و 2012، كأس الملك في 2013 واخيرا الدوري في 2014)... اللي وصله أتليتيكو مدريد ده نتيجة عمل متواصل خلال السنتين ونص اللي فاتوا...وبالتحديد نتيجة مجازفة محسوبة ونظرة ثاقبة بتعيين دييجو سيميوني والثقة فيه لبناء فريق قوي... ونتيجة لاعيبة بتموت نفسها عشان فريقها وعشان تبني المجد لفريقها... لاعيبة مستعدة تضحي بأي حاجة عشان الفوز وعشان الفريق مش مجد شخصي.

أتليتيكو مدريد خلال مؤخرا وبالتحديد تحت قيادة دييجو سيميوني هو مثال علي اللعب الجماعي والروح القتالية وهو ما يمثل الصفات المثالية في الكورة... سيميوني حول اتليتيكو مدريد من فريق عايش علي تأدية ماتش حلو في كل ديربي والفوز ببطولة كل 15 سنة إلي فريق بينافس علي كل بطولة وفريق مرعب لكل أوروبا وقادر يكسب أي فرقة مهما كان حجمها ومهما كان اسم ال 11 لاعب اللي لابسين قميص أتليتيكو... سيميوني قدر يخلق جوا كل لاعب في أتليتيكو مدريد "سيميوني صغير" فأصبح كل اللاعيبة بتلعب بنفس الروح اللي كان بيلعب بيها سيميوني نفسه وأصبحوا اكتر فهما لخططه وبينفذوا بكل سهولة... سيميوني ببساطة عرف يطلع من كل لاعب أحسن مستوي ليه في حياته الكروية ويغطي علي أي فراغ تركه لاعب مشي من الفريق "ماعتقدش حد سال عن فالكاو بعد مستوي دييجو كوستا" ودي موهبه مش موجودة الا في عدد قليل من المدربين

الموسم اللي فات فريق أتليتيكو مدريد كان عنده تشكيلة قوية ما بين الأساسيين والبدلاء وده كان سبب استمرارية أدائهم بنفس المتوسط في طريق الفوز بالدوري مهما كانت الغيابات ولكن علي العكس كان في بعض المراكز وبالتحديد بعض اللاعيبة صعب تعويض غيابهم نظرا لموهبتهم الغير عادية زي "دييجو كوستا" و "أردا توران" وده كان سبب من أسباب خسارتهم في كأس الملك ونهائي دوري الأبطال... وبعد الموسم الماضي الرائع وطمع كل الأندية الكبيرة في أوروبا في نجوم أتليتيكو أصبحت مهمة دييجو سيميوني أصعب... السنة مش محتاج يعوض نجم واحد زي فالكاو... السنة دي محتاج يعوض 4 ركائز أساسية في الفريق رحلت عن الفريق (كوستا، فيليبي لويس، كورتوا، فيا) وكمان بعض البدلاء اللي كانوا بيقدموا له حلول (دييجو، أدريان، سيرجيو أسينخو، روبين بيريز)... ممكن نشوف ان رحيل الاسماء دي غلط كبير عمله النادي ولكن طبعا لم يكن في امكان ادارة النادي انها تحافظ علي النجوم دي أمام اغراءات الفلوس واسماء النوادي الكبيرة ورغبة اللاعبين. 

ولكن أهم خطوة صحيحة عملها أتليتيكو مدريد انه حافظ علي بقاء مدربه دييجو سيميوني من محاولات خطفه من أندية أكبر "تاريخيا"... الثقة في سيميوني هي أول خطوات اعادة بناء أو تدعيم الفريق للمحافظة علي شكله القوي والمنافسة علي بطولات الموسم القادم... سيميوني هو اللي عمل الجيل ده بعد أسماء كبيرة مشيت واعتقد انه قادر علي اعادة التجربة في الموسم القادم ودليل علي كده صفقاته الذكية في فترة الانتقالات الحالية.

أيضا الحفاظ علي كوكي و أردا توران من أهم الإنجازات اللي عملها دييجو سيميوني في ظل رغبة أندية زي برشلونة ومانشستر يونايتد في التعاقد معاهم وفي ظل رحيل اربعة من أهم الأسماء في أتليتيكو كان لازم يحافظ علي عمود فريقه الفقري... وبالتالي تعاقدات أتليتيكو مدريد ال 7 حتي الاّن كانت في خط الدفاع والهجوم...

 

·   أول صفقات الأتليتي الصيف ده كانت مع مهاجم منتخب كرواتيا ماريو ماندزوكيتش من بايرن ميونيخ... ماندزوكيتش مشي علي طريق ابراهيموفيتش وطلع بصوت عالي يلعن في ايامه مع جوارديولا وان طريقة المهاجم الوهمي دي مش ماشيه معاه وانه عايز يمشي... في موسم معظمه احتياطي بالنسبة لماندزوكيتش احرز 26 هدف في 48 ماتش و اعتقد انه مع الاعتماد الأساسي عليه في أتليتيكو مدريد مستواه هيتحسن كتير.

·         أتليتيكو خلال السنوات الماضية طلع 2 من احسن حراس المرمي في ملاعب أوروبا... دي خيا اللي بأدائه أقنع اليكس فيرجسون انه قادر علي تحمل مسئولية انه يخلف فان دير سار في مانشستر يونايتد... وكورتوا اللي بسببه مورينهو بيفكر يبيع بيتر تشك وهو مطمن عشان كورتوا الموسم الماضي من اثبت انه من احسن 3 حراس مرمي في أوروبا حاليا... لتعويض رحيل حارسي أتليتيكو "كورتوا و اسينخو" سيميوني تعاقد مع حارسين واحد للخبرة وواحد للمستقبل... أنجل مويا "30 سنة" من خيتافي ممكن يكون بيمثل الخبرة ولكنه مخاطرة كبيرة لأتليتيكو خصوصا انه تلقي 54 هدف في شباكه مع خيتافي الموسم الماضي... وجان أوبلاك السلوفيني "21 سنة" من الفريق التاني لبنفيكا هو مغامرة أتليتيكو مدريد الجديدة في محاولة لتكرار تجربة نجاح الحراس الصاعدين زي "دي خيا و كورتوا"

·         من أهم اعمدة الفريق الموسم الماضي هو الظهير الأيسر لويس فيليبي واللي كان غلطة كبيرة عدم اختياره في منتخب البرازيل في كأس العالم... ولتعويض رحيله لتشيلسي تعاقد سيميوني مع ظهير جرانادا والمعار الي بنفيكا "سيكويرا 28 سنة"... سيكويرا فاز مع بنفيكا بالدوري البرتغالي ووصل لنهائي الدوري الأوروبي وكان محط انظار أندية كتير الصيف ده... أتليتيكو ايضا تعاقد مع الأرجنتيني كريستيان أنسالدي "27 سنة" من زينت الروسي عشان يكون بديل لسيكويرا ولكن كان عندهم خيار احسن بكتير زي "روخو" لاعب منتخب الأرجنتين في كأس العالم واللي كان ممكن يكون اضافة كبيرة لهم واساسي حتي علي سيكويرا.

·         جريزمان هو أحد المواهب الشابة والواعدة في منتخب فرنسا... 30 مليون يورو مش خسارة في لاعب عنده 23 سنة وأحرز 20 هدف الموسم الماضي في 49 مباراة لعبها مع ريال سوسيداد... 16هدف مع سوسيداد في الدوري من اجمالي 62 هدف سجلها الفريق وهو اصلا بيلعب علي الجناح الأيسر... جريزمان تحت قيادة مدرب زي سيميوني من المنتظر يتطور أكتر ويكون من أبرز اللاعبين في الدوري الأسباني وفي أوروبا الموسم القادم.

جودين وميراندا من أهم أسباب ظهور أتليتيكو بالشكل الممتاز ده في الموسم اللي فات وبالذات جودين اللي أحرز هدف التعادل مع برشلونة في اخر مباراة وكان هدف الفوز بالدوري وأيضا هو اللي سجل هدف التقدم لأتليتيكو في نهائي دوري الأبطال وكان ممكن يكون بطل أتليتيكو مدريد للأبد لولا راموس والدقيقة 94... ولكن عدم وجود بديل كفئ والاعتماد عليهم في موسم طويل ممكن يأدي ان مستواهم مايكملش بنفس القوة أو اصابة حد فيهم وبالتالي أعتقد ان استقدام مدافع بنفس الكفاءة ولكن أصغر سنا لازم يكون من أولويات سيميوني في محاولة تجديد الفريق... استعادة سيلفيو المعار إلي بنفيكا الموسم الماضي ممكن يساعد ولكن سيلفيو مش علي مستوي فريق أتليتيكو الحالي بدليل عدم لعبه بانتظام مع بنفيكا.

التعاقد مع ماندزوكيتش غير كاف لمساعدة أتليتيكو علي الاستمرار في كل المنافسات الموسم القادم خصوصا ان أدريان اللي كان بيحل أزمة السنة الي فاتت رحل الي بورتو واعتقد سيميوني لسه بيدور علي مهاجم تاني لتفادي مواقف زي اصابة كوستا الموسم الماضي في أحرج أوقات الموسم.

الموسم القادم أصعب بالتأكيد لأتليتيكو مدريد... بأداء الموسم الماضي سقف طموح الجماهير ارتفع ومش هيقبلوا بأداء أقل... ريال مدريد و برشلونة عملوا صفقات كبيرة وأصبح عندهم دكة بدلاء "ممكن تكون أقوي من فرق كتير في الليجا"... أتليتيكو مدريد سلاحهم هو اللعب الجماعي والالتفاف حول بطل... البطل الموسم الماضي كان سيميوني... سيميوني رسخ أسلوبه وفكره في النادي وداخل كل لاعب وبالتالي الموسم ده مهمته هتكون أسهل في قيادة الفريق ولكن قدوم 7 لاعبين جدد للفريق مش أمر سهل خصوصا لو منهم 4 هيلعبوا أكيد في التشكيل الأساسي... ومباراة كأس السوبر الأسباني هتكون أول اختبار صعب للفريق خصوصا انها أمام ريال مدريد اللي أثبت في مباراة السوبر الأوروبي انه في حالة رائعة.

تابعونا على:

·         تويتر Twitter     @MO_ELSADEK

·         فيس بوك Facebook   www.facebook.com/FootballCollage

Follow @MO_Elsadek