موسم الانتقالات – انتر ميلان

طيب تمام اوى كدا ... الإنتر يفوز بثلاثية تاريخية فى 2010 ليصبح اول نادى ايطالى يحقق الثلاثية تحت قيادة الإستثنائى جوزيه مورينهو و بجيل ذهبى ربما لن يمر على الإنتر مثيل له , ها ؟!.. و بعدين ؟ ...لم يكن اكبر معاتيه و ثمالى العالم  وقتها يستطيع ان  يتخيل اللى هيحصل للفريق ده خلال الأربع السنين الجاية , عادة أى فريق بيدربه مورينهو و يسيبه , بيمر بمرحلة انحدار فى المستوى , لكن ده حصل مع الإنتر بشكل اعنف و اقسى بكتير , انحدار الإنتر تحول لإنهيار , و الإنهيار تحول لكارثة محدش كان يقدر يتوقع او مجرد يتخيل إن الفريق اللى سيطر على الكالتشيو لمدة ثلاث مواسم متتالية , هيكون كل طموحه فى المواسم اللى بعدها انه يتأهل للدورى الأوروبى.

انحدار مستوى الإنتر كانت نتيجته انه فى موسم 2013/2014 انهى الإنتر الموسم فى المركز الخامس برصيد 60 نقطة بارق 42 نقطة عن البطل يوفنتوس !! ..محققاً اكبر عدد من التعادلات فى الموسم  بـ (15 مباراة) فى موسم عانى فيه الفريق على الصعيد الهجومى بتسجيله 62 هدف , كان جيداً إلى حد ما دفاعياً بأستقباله 39 هدف  . فى موسم رفع من نسبة مصابى الضغط و السكر من مشجعى الإنتر للضعف , و كانت النهاية بإعتزال زانيتى و رحيل كامبياسو و ميليتو و صمويل ليرحل آخر رجال الثلاثية , و تنتهى بذلك فعلياً حقبة لن ينساها عشّاق النيرادزورى , و لتبدأ مرحلة جديدة بقيادة توهير و مادزارى.

بمناسية الحديث عن مادزارى : . أتمنى ألا يُكرر توهير خطأ موراتي بتعيين مدرب دون الرضا عن أفكاره الفنية !! مادزاري لن يغير 3-5-2 وإن غيرها قد لا يُجيد اللعب بغيرها، لا نريد جاسباريني جديد في النيرادزورى فبالنسبة لكثيرين مادزاى هو مدرب متوسط بإمكانيات متوسطة ... حقق نجاح مع نابولى بفضل إمكانيات فردية للاعبيه , اعطه فريق يتذيل الترتيب يصل به إلى وسط الجدول .. اعطه فريق بطل للدورى يصل به إلى وسط الجدول .. اعتقد ان الإنتر لا يمكن ان ينافس بجدية على الإسكوديتو طالما مادزارى موجود على قمة جهازه الفنى.

قدّم الإنتر لعشاقه – حاله كحال معظم الأندية الإيطالية – ميركاتو مخيب جداً للآمال و التوقعات اللتى صاحبت قدوم توهير على رأس الجهاز الإدارى للإنتر . , سوق إنتقالات نستعرضه فيما يلى: 

حراسة المرمي:

على مستوى حراسة المرمى يملك الإنتر واحد من افضل حراس المرمى فى اوروبا هو السلوفينى سمير هاندانوفيتش , و التعاقد مع توماس بيرينى من بارما هو مجرد تعاقد "سد خانة" للتأكد من وجود بديل جاهز للمشاركة فى حالة إصابة الحارس الأساسى او فى إذا أراد مادزارى ان يريح حارسه الأساسى لظروف المباريات او اعتبارات أخرى .

معلومة: قام سمير هاندانوفيتش بعمل 108 تصدى فى خلال 36 مبارة خلال موسم 2013/2014 معدل تصديات هو واحد من الأفضل فى أوروبا .

الدفاع:

بدفاع شبه متماسك , الإنتر مكانش محتاج تدعيم كبير اوى للخط ده و ده اللى فعلاً عمله الإنتر بصفقتين فقط على مستوى خط الدفاع هما  " دودو " و" فيديتش "

دودو: باك شمال روما الموسم اللى فات , فى الحقيقة فى علامات استفهام كتير على قدومه للإنتر , اولاً دودو باك شمال صغير تنقصه الخبرة و امكانياته متوسطة مينفعش يكون الظهير الهجومى الأساسى لفرقة المفروض بتلعب على لقب الدورى الإيطالى , خصوصاً و إن المالك الجديد توهير بقدراته المالية اللى الكل كان متوقعها منه كان يقدر يجيب بسهولة ظهير افضل من دودو بمراحل لو كان عنده استعداد يصرف فى سوق الإنتقالات , اعتقد ان ميزته ( دودو طبعاً مش توهير ) الوحيدة بجانب صغر سنه هى و إن عنده استعداد يكتسب خبرة المباريات هى انه بيضيف المزيد من العمق لتشكيلة الإنتر الموسم القادم .

فيديتش: البديل الصريح لرحيل رولاندو وصمويل عن الإنتر , بعيداً عن الأسماء الرنانة و إن فعلاً فيديتش فى يوم من الأيام كان واحد من افضل ثلاث مدافعين فى العالم , لكن ذلك المدافع تقريباً لا علاقة له ببقايا فيديتش اللى كانت بتلعب للمان يونايتد الموسم الماضى , اعتقد إن فيديتش صفقة تسويقية اكتر منها صفقة لحاجة الفريق له , صفقة لبيان إن الإدارة الجديدة بتصرف ( ده على اساس إن صفقته مكانتش ببلاش ) و تقدر تجذب نجوم للفريق , فى أرض الملعب و خلال الموسمين الماضيين , فيديتش كان لاعب زجاجى اصاباته كتير و غياباته اكتر , مستواه بينهار تقريباً فى المباريات الكبيرة أعتقد إن الحسنة الوحيدة اللى هيقدمها للفريق هى انه هيلعب دور قائد الدفاع بعد اعتزال زانيتى و رحيل صمويل .

خط الوسط:

هو اكبر خط عانى الإنتر بسببه الموسم الماضى , كثير من المباريات السهلة التى كان يمكن حسمها بدون جهد ضاعت من الإنتر و انتهت إما بالتعادل فى اغلب الأحيان و احياناً الهزيمة بسبب عدم قدرة خط وسط الإنتر على فرض اسلوبه و التعامل مع مجريات المباراة بالشكل المطلوب , فكم من مباراة شاهدنا خط الوسط مفككاً غير قادر على بناء الهجمة , او بطيئاً غير قادر على مجارة سرعة خط وسط الفريق المنافس, فبالنسبة لى : باعتقادي كل اللاعبين قابلين للبيع ويُمكن تعويض أي منهم، إلا واحد هو كوفاسيتش، على الإنتر الحفاظ عليه جيدًا إن كان يرغب بالعودة. ,لذا كان التدعيم واجباً ... و لكن الانتر تعاقد مع لاعب وفتح الباب لرحيل اخر...

جارى ميديل: بعد اداء اسطورى من منتخب تشيلى بشكل عام و ادء مبهر من ميديل بشكل خاص , الكل كان متوقعله انه اكيد الموسم الجاى هيلعب فى واحد من فرق المقدمة فى اوروبا خصوصاً ان مركزه ( لاعب خط الوسط الدفاعى ) من المراكز المهمة جداً و اللى كل الفرق بتحاول تدعمها بشكل دائم , بإعتقادى صفقة ناجحة جداً للإنتر .. ميديل عبارة عن طاقة لا تنضب , محرك بسعة 8 سليندر فى وسط الملعب , هو البديل الصريح و المباشر لكامبياسو , هيقوم بدور حلقة وصل ممتازة بين الدفاع و الهجوم , و فى نفس الوقت هيكون مسمار فى نص الملعب الفريق كله يقدر يرتكز عليه و هو مطمئن و صخرة تتحطم عليها مرتدات الخصوم , سنه 27 سنة يعنى فى مرحلة النضج الكروى مش محتاج يتعلم اساسيات . المشكلة الوحيدة بالنسبة له إن الـ 3-5-2 اللى مادزارى مصمم على انه يتبعها هتخفى جزء كبير اوى من قدراته و هتحد من حركته فى وسط الملعب بشكل عام , اعتقد أن على مادزارى التفكير فى 4-3-2-1 او 4-2-3-1 لو أراد ان يحقق الأستفادة القصوى من مجموعة اللاعبين المتوافرين لديه خصوصاً ميديل.

كمبياسو: من جيل الثلاثية بشكل عام , اكثر من حزنت الجماهير لرحيله بعد زانيتى هو كمبياسو , و المشكلة هنا الحقيقة إن كمبياسو كان يقدر يكمل مع الإنتر موسمين او ثلاثة على الأقل فى دور البديل المفيد اللى يقدر يصنع الفارق لفرقته و يضبط ايقاع خط الوسط فى المباريات المهمة , مش فى دور اللاعب الأساسى اللى يقدر يلعب 37 ماتش فى الموسم و يبقى مطالب انه يأدى بنفس المستوى طول الموسم.

الهجوم:

خط هجوم الإنتر كان أحد مآسى الفريق الموسم الماضى , افتقد الفريق طوال الموسم للمهاجم الحاد ذهنياً و جسدياً , المهاجم اللى بيقدر يخلص الهجمة و يجيب الجول من نص فرصة , ولسان حال مشجعى الإنتر هو "فينك يا ميلبتو و إيتو 2010 , ايام ما كانت الكرة فى رجلكم عند الـ 18 بجول " , و عشان كدا كان خط الهجوم من اهم الخطوط اللى ركز عليها الإنتر فى سوق الإنتقالات , و ما يحسب له انه ركز على اختيار جودة المهاجمين اكثر من انهم يجيبوا مجرد مهاجم لسد المركز و قد كان تدعيم الإنتر لهجومه باستعارة أوزفالدو من ساوثهامبتون:

أوزفالدو: تتفق ام تختلف , رغم مشاكله الكتير فى الفرق اللى بيروحها , دانى اوزفالدوا مهاجم متميز , يقدر يصنع الفارق لفرقته فى اى لحظة . هو خير خلف لديجو ميليتو , لو استطاع مادزارى انه يوظفه بالشكل الصحيح و يستغل امكانياته بالشكل الأفضل , هنشوف الموسم القادم واحد من افضل مهاجمى الكالتشيو , مهاجم هينافس بقوة على لقب هداف الدورى , و متأكد انه هيكّون شراكة قوية جداً مع بالاسيو , طبعاً صفقة اوزفالدو لوحدها مش هتكون كافية و انه لابد من صفقة او صفقتين اضافيتين لتدعيم الهجوم , خصوصاً فى ظل رحيل كاسانو اللى إدارة الإنتر شافت انه غير مناسب لإحتياجاتها الهجومية , الكلام دلوقتى على استقدام توريس من تشيلسى او ليما من بنفيكا و اللى لازم الإنتر يخلص مع واحد منهم لو كان عاوز ينافس على التأهل لدورى الأبطال الموسم القادم .

معلومة: قام اوزفالدو بتسجيل 6 اهداف و صناعة هدف واحد فى 31 مباراة شارك بها خلال موسم 2013/2014 معلد قد يبدو ضعيفاً بالنسبة لمهاجم , لكنه فى الحقية ممتاز بالنسبة لمهاجم مكانش اساسى فى الفرقة اللى كان بيلعب فيها و انه فى 90% من المباريات اللى لعب فيها كان بيلعب كبديل بينزل فى الدقيقة 80.

هيلينوا هيريرا

"من لا يقدم للإنتر كل شئ , لا يفوز بأى شئ "  هى الجملة الخالدة لهيلينوا هيريرا رئيس الإنتر فى أواحر الستينيات , تلك الجملة التى يحفظها كأسمه أى مشجع للإنتر , تلك الجملة التى يبدو أن الإدارة الجديدة بقياة إريك توهير لم تستوعبها بشكل كامل بعد , لم يستعبوا انه كونك إنتريستا فأنت قد قررت التخلى عن ماهيتك و كل ما انت عليه , تتخلى عنه عن طيب خاطر , لتصبح جزء من كيان الأسود و الأزرق , ذلك الجمهور ينتظر الكثير يا توهير , ذلك الجمهو لا يهتم بالبنوك و لا بالأموال , ذلك الجمهور كل ما ينتظره هو أن يرى النيرادزورى على منصات التتويج ثانية , عليك ان تدرك ذلك يا توهير.

بالنسبة لمشجعى الإنتر .. فأعتقد انهم يجب عليهم التفاؤل بموسم افضل من الموسم الماضى , اتوقع ان يصل الإنتر لمركز يأهله لدورى الأبطال إن ادار الوقت المتبقى من الميركاتو بالشكل الصحيح , لكن يجب ان يتحلوا بالواقعية و ان لا يتوقعوا فريقاً ينافس على لقب الدورى خصوصاً فى ظل توحش اليوفى و قوة صفقات نابولى و انتظر منهم تاكثير فى الدورى الأوروبى.

تابعونا على: 

·         فيس بوك Facebook    www.facebook.com/mahmoud.hassaan1

·         فيس بوك Facebook   www.facebook.com/FootballCollage