الدوري الانجليزي – الجولة الثانية

جولة أخري من الدوري الانجليزي شهدت أولي مباريات القمة الانجليزية وشهدت تعثر لأكبر فريق انجليزي...

تشيلسي و ليسترسيتي (2-0):

بعد ماتش النهارده بيتر تشك لازم يبدأ يدور علي نادي تاني بشكل جدي... كورتوا بتصديات مبهرة منها انفراد صريح قاد تشيلسي لتاني فوز علي التوالي في الدوري وأثبت إن مورينيو عنده حق يلعبه ويركن تشك... تشيلسي أكما بدايته القوية للدوري بفوز اتاخر للشوط الثاني ولكنه مقنع علي ليسترسيتي اللي فضل صامد لمدة ساعة تقريبا ولكنه انهار بعد هدف كوستا.

ليسترسيتي ظهر بشكل متماسك في الساعة الأولي من اللقاء بسبب حارسه المتميز كاسبر شمايكل "ايوه ابن بيتر شمايكل" اللي كان عقبة أمام فرص محققة لتشيلسي ولكن الدفاع خذله في الهدفين واللاعب الممتاز الجزائري رياض محرز اللي شكل خطورة مستمرة علي مرمي تشيلسي وهيئ انفراد صريح لزميله نوجينت وأنقذها بكل شجاعة كورتوا في لحظة فاصلة للماتش حيث كانت النتيجة 0-0 وكان ممكن مجري الماتش يتغير تماما ولو سجلها نوجينت.

علي الرغم من مرور ساعة كاملة من اللقاء بدون تسجيل أهداف أمام فريق لسه صاعد للدوري ولكن تشيلسي كسب الماتش بالهدوء والثبات... مورينهو عنده مهارة "الكلام بين الشوطين" مع اللاعيبة بتحفيزهم وساعات استفزازهم وطبعا قراءته الممتازة للماتش وده اللي "نعنش" أداء تشيلسي في الشوط الثاني وأصبحوا اكثر خطورة وقربا للتسجيل.

هازارد مازال بعيد عن مستواه بالرغم من تسجيله لهدف...مش بنفس السرعة اللي كان عليها في المواسم السابقة وسايب أزبيلكويتا بدون مساندة دفاعية طوال الماتش... المنتظر منه انه يقود الفربق مش يكون مجرد لاعب عادي... في حين فابريجاس المنضم الصيف ده بيعطي الاحساس انه بيحرك الفريق وبيتحكم في ايقاع الماتش وبيلعب كأنه بدأ حياته في تشيلسي.

خلاصة الكلام: لسه بدري طبعا بس الاداء الواثق بيدل ان تشيلسي مازال المرشح الأول للبطولة... مورينهو محتاج يطلع اكتر من كده من هازارد... محمد صلاح محتاج يموت نفسه أكتر عشان يلاقي فرصة يدخل قائمة ال 18 علي الأقل بدا ما يفضل منتظر كأس الاتحاد عشان يلعب والا يفكر في موضوع الاعارة جديا لنادي يتيحله التألق ويرجع لمكان أساسي زي كورتوا كده... كمبياسو كان بيحضر الماتش النهارده من المدرجات دليل علي قرب انضمامه لليسترسيتي واللي ممكن يكون اضافي قوية تساعدهم علي استغلال قوة حارسهم ومهارة محرز لتفادي الهبوط الموسم ده علي الاقل.

لقطة: لحظة نزول دروجبا الملعب هي الدليل علي ان دروجبا هو تاني أحسن لاعب أفريقي في التاريخ بعد جورج ويا اللي لعب لتشيلسي في فترة برضه.

أرسنال و ايفرتون (2-2):

الماتش اللي فات الناس انتقدت أرسين فينجر علي لعبه بسانوجو وجيرود وعدم تعاقده مع مهاجم قوي فقرر يعاقب كل جماهير أرسنال في ماتش ايفرتون وبدأ من غير مهاجم أصلا واعتمد علي الجناح أليكسيس كمهاجم... وايفرتون قرر يعاقب ارسين فينجر بالتقدم بهدفين منهم واحد تسلل بس تقدم مستحق.

أسئلة لأرسين فينجر... هو انت مقتنع بمستوي جيرود وسانوجو؟ طب ولو انت مقتنع ليه لعبت بأليكسيس كمهاجم؟ هل انت مقتنع بمستوي فلاميني اللي انتهي كرويا من وقت انتقاله لميلان؟ هل ده خليفة فييرا وجيلبيرتو اللي بيسيطر علي نص الملعب وكابوس مهاجمي الفرق المنافسة؟ هل من الحكمة اللعب ب 4 لاعيبة في نص الملعب 3 منهم (رامسي، ويلشير، أوزيل) بيعملوا نفس الحاجة وبيلعبوا بنفس الطريقة تقريبا؟ ولما تحب تعدل الماتش تعاقب أليكسيس انه مش عارف يلعب في المكان اللي انت اجبرته عليه وتسيب أوزيل اللي لعب واحدة من أسوء مبارياته في أرسنال؟ هل تشيزني هو الحارس اللي هيساعدك تنافس علي الدوري؟

صحيح أرسنال الموسم ده مختلف بس ماعتقدش حاليا يقدر ينافس علي المركز الأول في الدوري... في أول ماتشين في الدوري أداء غير مقنع وخسارة نقطتين من ستة... كل مجهود خط الوسط بيروح هدر بسبب عدم وجود المهاجم اللي بيخلص... جيرود اكيد مهاجم جيد ولكنه مش فان بيرسي ولا أجويرو... تشيزني حارس عادي وبالتأكيد مش في مستوي كورتوا، هارت ولا حتي دي خيا.

اللي عايز يفهم قد ايه "ديفيد مويس" كفتجي ومدرب اكل عيش، يتفرج علي مستوي وطريقة لعب ايفرتون في الموسم اللي فات والموسم ده بقيادة روبيرتو مارتينيز... لولا التعب والخوف علي النتيجة بسبب عدم الخبرة واسم أرسنال، كان بمقدور إيفرتون الفوز بالماتش بسهولة... ولكن في اخر ربع ساعة من اللقاء تراجع إيفرتون غير المبرر سهل كتير مهمة تعادل أرسنال... إيفرتون لعب الماتش من غير نجمه الصاعد باركلي واللي لما يرجع من الاصابة هيدعم الفريق في بحثه عن مركز أوروبي في الدوري السنة دي للمرة الثانية.

خلاصة الكلام: عشان تنافس علي الدوري لازن يكون عندك لاعيبة تتميز في مراكزها عن باقي اللاعيبة اللي يمتلكها المنافسين وده متوفر في دفاع وخط وسط أرسنال ولكنه بالتأكيد غير متوفر في الهجوم ولا حراسة المرمي. أما إيفرتون فمتوقع انهم يكونوا في مركز متقدم في الدوري الموسم ده وبشوية طموح ممكن نشوفهم في المربع الذهبي... المهم القدرة علي موازنة الأداء بين الدوري الأوروبي ومحليا في الدوري والكؤوس.

مانشستر يونايتد و سندرلاند (1-1):

بداية غير مبشرة بالمرة للشياطين الحمر وملوك الدوري الانجليزي الممتاز... أسوء المتشائمين لم يكن يتوقع حصول مانشستر علي نقطة وحيدة من أول مبارتين في الدوري... نتيجة ماتش سندرلاند مش مفاجئة خالص... لو فرقة بحجم مانشستر يونايتد صنعت في 90 دقيقة 5 فرص تهديفية فقط وعندها أمل تكسب يبقر بيضحكوا علي نفسهم.

باستثناء ماتا، دي خيا وروني، كل ال 11 لاعب اللي اشتركوا في المباراة من جانب مانشستر كانوا في حاجة للتغيير... بأداء مغاير تماما للمباريات التحضيرية للموسم، مازالت خطة 352 لا توفر الحماية الدفاعية ولا المساندة الهجومية الكافية لمانشستر... مانشستر حقق نسبة 89% تمريرات سليمة في المباراة لكن كلها كانت بعيد عن الثلث الهجومي... اشتراك كليفرلي وفليتشر أفسد كل المجهود اللي ماتا وروني حاولوا يعملوه هجوميا... فان بيرسي كان هادي جدا علي غير العادة (فان بيرسي لم يسدد أي كرة في المباراة)... بالمناسبة، هو عدنان جانوزاي هيكون أسوء من أشلي يونج لو لعب؟

Van Gaal: "We lacked creative passes in the final third and missed passes too often – it was either too slow or too hasty." #MUFC
— SADEK (@MO_Elsadek) August 26, 2014

بالاعتماد علي بقايا مدينة مانشستر (براون، أوشيه، رودويل) استطاع سندرلاند الفوز بنقطة مرضية جدا بالنسبة له... تعاملهم في الضغط علي خط وسط مانشستر واجباره علي ارتكاب الاخطاء كان سبب من أسباب ظهور مانشستر بالشكل الضعيف ده.

أنتونيو فالنسيا أداءه كان جيد في الناحية الهجومية وصنع هدف مانشستر ولكنه دفاعيا لم يكن قوي بالشكل الكافي وعدم تركيزه في مراقبة رودويل في الضربة الركنية اللي أحرز منها رودويل التعادل... دفاع مانشستر يونايتد بعد بعد خروج سمالينج اصبح كالاتي (جونز، كين، بلاكيت) دفاع ماينفعش يلعب في فريق درجة تانية وحتي لو عدل فان جال الطريقة ل 4 في الدفاع اللاعيبة دي لا يعتمد عليها.

خلاصة الكلام: انضمام دي ماريا هيحل أزمة كبيرة لفان جال كحل هجومي رائع... ويبقي لفان جال الاختيار بين الاصرار علي خطة 352 ومحاولة استغلال دي ماريا في منتصف الملعب أو التحول ل 433 أو 4231 واستغلاله علي الجناح وساعتها أكيد أشلي يونج هيقضي وقت ظريف في التلاجة... ولكن في كل الأحوال لازم يفكر في حل جذري للدفاع... روخو صفقة كويسة بس قلب دفاع زي بن عطية هو الاحتياج الأهم.

معلومة: السوشيال ميديا اتقلبت ان دي أول مرة من موسم 92/93 اللي مانشستر مايكسبش أول ماتشين في الموسم... ولكن للمعلومة مانشستر فاز بالدوري في الموسم ده.

مانشستر سيتي و ليفربول (3-1):

أول قمة في الدوري الانجليزي الموسم الحالي انتهت بتفوق حامل اللقب علي وصيفه... الفارق في الماتش ده كان الفعالية الهجومية... الفارق بين فريق صنع 7 فرص تهديفية (مانشسترسيتي) وأحرز منهم 3 أهداف وفريق صنع 9 فرص تهديفية (ليفربول) أحرز منهم هدف... تشابه كبير في احصائيات الفريقين في الماتش من حيث التسديدات و الاستحواذ علي الكرة و التمرير السليم ولكن استغلال مانشستر سيتي لأخطاء دفاع ليفربول كان هو سبب الفوز وعلي العكس كان في بعض الاخطاء من دفاع مانشستر سيتي ولكن ليفربول لم يمتلك المهاجم اللي يخطف.

خط دفاع ليفربول عاش كارثة كروية في الماتش وكانت بداية كارثية لمورينو الظهير الأيسر اللي صُنعت من ناحيته كل أهداف مانشسترسيتي... مورينو حاول يكون نشيط في الهجوم ويساتد جو ألان ولكن نسي ان مهمته في الاساس انه يدافع... لوفرين ظهر تايه معظم الوقت لأنه كان بيحاول يغطي ورا سكيرتل من ناحية ومن ناحية تانية ورا مورينو... مساحات شاسعة ظهرت طوال الماتش بين جونسون وسكيرتل وبين مورينو ولوفرين والمساحات دي كانت أكبر هدية لوسط وهجوم مانشستر اللي استغلها أحسن استغلال.

مانشسترسيتي يمتلك واحد من أقوي المدافعين في العالم (كومباني) اللي كان مسيطر علي علي كل هجمات ليفربول خلال النصف ساعة الأولي من اللقاء... ولكن نجم اللقاء من جانب مانشستر سيتي كان (ستيفان يوفيتيتش) اللي بيثبت نفسه كل يوم في محاولة للبقاء أساسي بعد اكتمال شفاء أجويرو... خط وسط مانشسترسيتي كان بيعمل مجهود كبير في الدفاع ونفس الوقت مجهود كبير في صنع الفرص ولكن مانشسترسيتي عنده بدل المهاجم اللي يخلص "3"... دزيكو، يوفيتيتش و أجويرو... مانويل بيلليجريني لم يكن مهتم بعدد التمريرات في نصف الملعب أو نسبة الاستحواذ علي الكرة علي قدر ما كان مهتم انه يوصل الكرة في منطقة جزاء ليفربول بأقصر الطرق ومهاجمينه هيتكفلوا بالباقي.

علي عكس الانطباع اللي ممكن تتركه نتيجة اللقاء فليفربول كان بيهاجم بقوة طوال اللقاء ولكنهم افتقدوا اللمسة الأخيرة (الFinishing).. افتقدوا سواريز... ومع اعتراضي علي صفقة ريكي لامبرت الشهير بأيمن منصور فلما نزل الملعب فرق الي حد ما في خطورة ليفربول الهجومية... أعتقد بانضمام ليفربول هنبدأ نشوف حرية أكبر لستوريدج وانهاء أفضل للهجمات ولكن تحدي رودجرز انه يقدر يحافظ علي استمرار أداء بالوتيللي.

خلاصة الكلام: الفرق بين استغلال أجويرو لأاول كرة يلمسها بعد 23 ثانية من نزوله وتسجيله منها هدف ومحاولات ليفربول اللي بتنتهي واحدة ورا التانية علي حدود منطقة الجزاء هو الفرق بين البطل والوصيف... كل نقطة بتخسرها في مواجهات القمة في انجلترا هي نقطة بتبعدك أكتر عن المركز الأول.

ملاحظة: ازاي يكون عندك لاعب زي لازار ماركوفيتش بالقدرات دي كلها وتلعب بجو ألان!!؟؟

تابعونا على:

·         تويتر Twitter     @MO_ELSADEK

·         فيس بوك Facebook   www.facebook.com/FootballCollage

Follow @MO_Elsadek