أرسنال و مانشستر سيتي (2-2):
كان بداية قوية جدا للأسبوع
الرابع بماتش ما نقدرش نقول ان في فريق كان أحق بنقط الماتش... ولو ان فرص مانشستر
سيتي كانت الأخطر وكان أقرب انه يخلص الماتش خصوصا في أخر ربع ساعة... في تطور الي
حد ما في أداء أرسنال ولكن مازال ارسين فينجر مش واخد باله من العيوب المزمنة في
الفريق... وعلي الجانب التاني مانشستر سيتي لتاني أسبوع علي التوالي بيقدم أداء مش
علي المستوي المطلوب ولا بمعايير حامل اللقب.
مانويل بيلليجريني اختار انه
يصعب الماتش علي نفسه بانه يلعب بفرانك لامبارد وميلنر... ميلنر بالتحديد من
اللاعيبة اللي بستغرب ازاي لسه موجودين في مانشستر سيتي!! بس الاتنين خلال الماتش
كانوا زي عدمهم ولا ساعدوا في الدفاع ولا الهجوم... وفضل يريح نصري ودزيكو بدون
مبرر الا لو كان بيفكر في ماتش بايرن ميونيخ يوم الاربعاء ولكن ده أرسنال برضه
وكده خسر 5 نقط في مبارتين فقط... محمود فتح الله الكرة الأرجنتينية
"ديميكيليس" باحرازه هدف التعادل ممكن حد يفتكر انه بطل ولكن ده كان من
أكبر أسباب خسارة مانشستر سيتي للنقطتين بالاشتراك مع خط الدفاع كله وفيرناندينهو
لما تركوا ويلشير يتفسح براحته بينهم ويشوط من غير أي مضايقة وفي لقطة تانية لما
تركوا سانشيز لوحده في قلب منطقة الجزاء عشان يسجل أحد اجمل اهداف الموسم...
فيرناندينهو أداءه الدفاعي مش هو نقطه تميزه وبالتالي ماينفعش في غياب يايا توريه
تبني الخطة كلها ان فيناندينهو لوحده هو اللي هيغطي الجزء الدفاعي في وسط الملعب
وأمام فرقة بحجم أرسنال بغض النظر عن مستواهم.
أرسنال لعب 30 دقيقة في الماتش
وكان علي وشك انه يخطف "الثلاثة بنط عشان يفرح الجامهور اللي جاله
النهارده" ولكن ماهانش عليه يكسب ورجع أرسنال الطبيعي في أخر ربع ساعة من
الماتش عشان يدي الفرصة للسيتيزن انه يتعادل ويخطف الماتش لو كان فيه حظ... أرسين
فينجر مصِر يعمل زحمة في نص الملعب علي الفاضي... ساعات انك تمتلك نص الملعب
بالكثرة العددية واللي كل واحد فيهم ليه دور مختلف بيكسبك ماتشات ويخليك مسيطر علي
اللعب بشكل كتير... ولكن في حالة أرسنال في 5 لاعيبة في وسط الملعب منهم 3 نسخة
طبق الأصل من بعض في طريقة اللعب و في التحركات في الملعب (أوزيل، ويلشير،
رامسي)... رامسي وويلشير في فورمة ومستوي عالي وبالرغم من غباء فينجر باستخدامهم
مع أوزيل في نفس الوقت، فهم بيقدروا يوجدوا الحل اللي يساعد الفريق زي اللي حصل في
هدف ويلشير... ولكن أوزيل في مرحلة "العالة علي الفريق"... معلومة: أوزيل صنع 6 أهداف في أول 10 مباريات له مع أرسنال ولكن في اخر 19
مباراة صنع 3 أهداف فقط... أما السؤال الأهم لفينجر، هو فلاميني ماسك عليك ذلة ولا
ايه؟ فينجر بعد الماتش قال "احنا مفتقدين توازن نص الملعب الدفاعي بعد رحيل
باتريك فييرا" طب وحضرتك مش حاسس ان الجملة دي متأخرة 9 سنين تقريبا!! وهو
أرتيتا مثلا هيكون أسوء من فلاميني؟... وتبقي بارقة الأمل لأرسنال في المستوي
المذهل اللي بيعيشه أليكسيس سانشيز اللي بيتحرك في كل مكان في الملعب وموجود دايما
في المكان المناسب ولكنه محتاج يشتغل علي استغلال الضربات الحرة بشكل أحسن.
مع اختلاف وجهات النظر علي أداء
مانشستر سيتي، يبقي امتلاكه للمهارات الفردية في كل الخطوط انقاذ وحل في وقت الضيق
واليأس ومن المهارات دي مثلا أجويرو وديفيد سيلفا... أجويرو لو مصاب أو مش مصاب في
الفورمة أو مش في الفورمة بيسجل أهداف في أي حال من الأحوال... معلومة: أجويرو مثلا سجل 9 أهداف في اخر 11 مباراة خارج ملعب الاتحاد... وسيلفا هو عنصر لا غني عنه في
خط وسط مانشستر سيتي... بيتحرك في كل مكان ونادر انه مايكونش مشترك في هجمة
لسيتي... سيلفا هو عنصر الالهام الهجومي في مانشستر سيتي... صنع 6 فرص، 4 مراوغات
ناجحة و84% تمريرات ناجحة من 78 تمريرة وحتي علي مستوي الدفاع قام ب 4 محاولات ناجحة
لاستخلاص الكرة.
خلاصة الكلام: أرسنال محتاج يذاكر ازاي نجح في أول نص ساعة
من الشوط الثاني ومحتاج حل دفاعي جذرى عشان مش معقول انك عايز تنافس علي الدوري
ومش عارف تكسب في أخر 3 ماتشات بسبب دفاع تايه طول الوقت... طبعا صفقة ويلبيك دي
لا هتقدم ولا تأخر مع أرسنال ولكنها بتعطي فينجر كثرة عددية من نفس نوع اللاعيب
"مجهود بدون انتاج"... أما مانشستر سيتي فكل اللي محتاجه هو بعض من
التركيز الدفاعي وجرأة أكثر من بيلليجريني انه يجرب مانجالا لأنه بالتأكيد مش
هيكون أسوء من ديميكيليس... يايا توريه لاعب ماينفعش يستريح في ماتشات مهمة حتي لو
كان عشان ماتش في دوري الأبطال يوم الأربعاء لأنك ممكن تعوض في مجموعة دوري
الأبطال لكن في الدوري كل نقطة بتخسرها بتبعدك عن اللقب خطوة.
رجل المباراة: أليكسيس سانشيز عمل ماتش هايل
وسجل هدف رائع ولكن تأثير ديفيد سيلفا في مانشستر سيتي يرشحه انه يكون رجل
المباراة بالتأكيد.
معلومات سريعة:
·
داني ويلبيك لعب 9 مباريات أمام
مانشستر سيتي ولم يستطع التسجيل.
·
أرسنال تلقوا 5 اهداف من 8 تسديدات
علي مرماهم في الموسم الحالي.
·
منذ الموسم الماضي، أرون رامسي هو
أكثر لاعبي أرسنال صناعة للأهداف (9).
·
أول مرة يصنع خيسوس نافاس هدف خارج
ملعب الاتحاد منذ انضمامه للسيتي.
·
مانشستر سيتي لم يخسر مبارتين
متتاليتين في الدوري الانجليزي من اكتوبر 2010.
·
من بداية الموسم الماضي، صنع الكسندر
كولاروف 8 أهداف كاكثر مدافعي الدوري الانجليزي صناعة للاهداف.
·
أرسنال هو أكثر فريق تلقي أهداف من
الضربات الراسية هذا الموسم ب 4 أهداف.
تشيلسي و سوانزي (4-2):
مباراة القمة في الدوري
"حاليا علي الأقل"... بين الأول والثاني في الترتيب قبل بداية
الأسبوع... بداية قوية للماتش من سوانزي والحماس أخدهم جامد... مورينهو كعادته في
فن قراءة المباراة، قلب الماتش تماما وعاقب سوانزي علي مجرد التفكير انهم ممكن
يكسبوا.
تشيلسي بدأ الماتش في حالة من
نسيان ان سوانزي هو رقم 2 في الترتيب وانهم فازوا بكل مبارياتهم في الدوري... و
مونك وفرقته استغلوا الوضع وسيطوا علي نص الملعب تماما وجون تيري كافأهم بهدف في
مرماه علي النص ساعة الحلوة اللي لعبوها... هدف يسأل عنه دفاع تشيلسي كله ولكن
بالتحديد ايفانوفيتش اللي نسي نفسه في الهجوم من بدري ونسي انه مدافع أولا وترك نيل
تايلور يمرر كرة بدون أي تعب عشان جون تيري يسجل في مرماه... دفاع تشيلسي عامة حتي
الاّن مش في أحسن حالاته ولولا كورتوا كانت نتائج الفريق هتتغير.
كلمة "الاستثنائي" لم
تطلق علي مورينهو من فراغ... في مدربين كبار ومنهم أنشيلوتي مثلا لو شاف سيناريو
الماتش ماشي في اتجاه غير اللي رسمه بيقف يتفرج عادي زيه زي الجمهور "اقرأ مقالي اللي فات عنه في هنا"... ولكن مورينهو من نوع المدربين
اللي ممكن يجازف بكل اللي الطرق وممكن يغير طريقه لعبه والخطة كلها بعد دقيقة
واحدة من بداية الماتش لو سيناريو الماتش مش علي مزاجه... امام سوانزي مورينهو بدأ
ب 4231 كالعادة ولكن بعد 25 دقيقة لما لقاها مش ماشية غيرها ل 433 وبين الوطين غير
شورلي براميريز للسيطرة أكتر علي وسط الملعب وده اللي حصل.
دييجو كوستا و سيسك فابريجاس هم
أحسن صفقات الموسم في الدوري الانجليزي بالتأكيد... كوستا ماكينة تسجيل الأهداف
اللي كان بيدور عليها مورينهو و سيسك مورينهو نفض من عليه تراب دكة برشلونة ورجعله
أيام عزه... تألق الاتنين كان ملفت للنظر في المباراة ولكن هازارد برضه بدأ يرجع
لمستواه وظهر نشيط بشكل ملحوظ في الماتش.
خلاصة الكلام: أسبوع ورا التاني تشيلسي بيثبت انه علي الطريق
الصح انه يفوز بالدوري... أكثر فرقة متكاملة حاليا في انجلترا... بتتفرج عليهم
وانت عارف ان الفوز بالماتش مسألة وقت مش أكتر... مازال في بعض اخطاء الدفاع اللي
بيغطي عليها التألق الهجومي المرعب.
رجل المباراة: دييجو كوستا.
معلومات سريعة:
· تشيلسي سجل 15 هدف في أربع مباريات
فقط الموسم ده بينما سجل نفس العدد في 9 مباريات الموسم الماضي.
·
دييجو كوستا أحرز 7 أهداف بعد أول 4
مباريات له مع تشيلسي في حين فيرناندو توريس احتاج 43 ماتش لتسجيل أول 7 أهداف مع
تشيلسي.
·
فابريجاس هو أول لاعب في تاريخ الدوري
الانجليزي يصنع أهداف في 6 مباريات متتالية.
·
جون تيري سجل 3 أهداف بالخطأ في مرماه
ورقم قياسي في تاريخ تشيلسي.
· دييجو كوستا هو تاني لاعب في تاريخ
الدوري الانجليزي يسجل في أول أربع مباريات له في الدوري "بعد ميكي
كوين".
· دييجو كوستا سدد 14 تسديدة في الموسم
الحالي منهم 10 علي المرمي وسجل منهم 7 أهداف.
· سيسك فابريجاس صنع 6 أهداف حتي الان
في أربع مباريات في حين أكثر لاعب صناعة للأهداف الموسم الماضي كان هازارد ب 7
أهداف طوال الموسم.
ليفربول و أستون فيلا (0-1):
أكثر المباريات مللا في الأسبوع
الرابع... أستون فيلا خطف هدف ونام باقي الماتش... وليفربول كان شبه عاجز طول
الماتش... تاني هزيمة لليفربول من أربع ماتشات شئ غير مبشر بالمرة... و 4 ماتشات
من غير هزيمة لأستون فيلا.
برندن رودجرز في الماتش ده عمل
زي عيل فرحان بلعبه الجديدة وقافش يلعب بيهم كلهم في نفس الوقت... 6 لاعيبة جدد
قرر رودجرز انه يبدأ بيهم الماتش بدون أي تفكير انهم أكيد غير متفاهمين ومنهم اللي
ماقضاش يومين علي بعض في فترة الاعداد حتي... في غياب ستوريدج ومحاولة اراحة
الجنيه "ستيرلينج" ظهر هجوم ليفربول زي أي هجوم فريق درجة تانية...
لالانا وماركوفيتش اتظلموا في الماتش ده ان رودجرز طلب منهم يشيلوا الفريق وده فوق
طاقتهم... وبالوتيللي أساسا عنده ال Leadership صفر ومحتاج حد يشغله دايما... يعني رباعي الهجوم (بالوتيللي،
كوتينهو، لالانا، ماركوفيتش) ده أول ماتش يلعبوه مع بعض.
ليفربول في الماتش سدد 18
تسديدة ولكن منهم واحدة فقط علي المرمي من مامادو ساخو... وصنع الفريق 32 كرة
عرضية ونسبة استغلالهم أو اكتمالهم صفر... ازاي ممكن تكسب ماتش بكل عدم الفعالية
دي؟ وبعدين لما تحب تعدل النتيجة تنزل (لامبرت وبوريني) وتطلع لالانا وماركوفيتش اللي
من الناس اللي بتفكر في الملعب وممكن تكسبك في اي وقت؟
خلاصة الكلام: رودجرز لسه في محاولات غريبة انه يلاقي
التوازن المطلوب في التشكيلة بعد رحيل سواريز... وده هيأثر بشكل كبير علي مسيرتهم
في الدوري اللي خسروا فيه 6 نقط حتي الاّن... رودجرز محتاج يعالج بالوتيللي نفسيا
عشان ياخد دور قيادي أكبر في الفريق والا هيكرر مسيرته القصيرة في كل الفرق
السابقة.
رجل المباراة: ولا لاعب يستحق اللقب.
معلومات سريعة:
· جابريل أجبونلاهور اشترك في 4 أهداف
أمام ليفربول في أخر 4 مباريات (هدف و3 تمريرات حاسمة).
·
أخر تسديدة لليفربول علي المرمي في
الماتش كانت في الدقيقة 11.
·
أستون فيلا عندهم 10 نقاط... أكتر من
عدد تسديداتهم علي المرمي طوال الموسم الحالي.
مانشستر يونايتد و كوينز بارك رينجرز (4-0):
مانشستر يونايتد يعلن رسميا عن
بدأ موسم 14/2015... اكتملت الصفوف... مفيش اصابات تقريبا... الصفقات الجديدة واضح
تأثيرها... تغيير في الخطة وعودة لرباعي في الدفاعي... الابداع والالهام الكروي في
قمته بوجود دي ماريا وماتا... كل ده اخرج ماتش بأداء من زمن اليكس فيرجسون.
فان جال علي غير عادته في
العند، بدأ الماتش ب 433 بدل من الاعتماد علي ثلاثي في خط الدفاع زي الماتشات اللي
فاتت... دي ماريا تألقه في وجوده في خط الوسط مش انه يكون طول الوقت علي الجناح
وده فرق كتير في أداء مانشستر في الماتشين اللي لعبهم دي ماريا... ومن أذكي
الخطوات اللي عملها فان جال انه بدأ بفالكاو علي الدكة... لأان أكيد روني وفان
بيرسي ممكن يقوموا بالدور المطلوب وفي نفس الوقت الملعب مش هيستحمل ناس جديدة أكتر
من كده (في 4 لاعيبة جديدة في الملعب منهم 2 بيلعبوا لأول مرة).
أكيد جزء من نجاح مانشستر
يونايتد في المباراة كان المستوي المتواضع لكوينز بارك رينجرز اللي تقريبا خلوا
الماتش في اتجاه واحد اللهم كورة واحده كان ممكن يخطفوا جول بسبب لقطة من دي خيا
في لبس عبدالواحد السيد... وأيضا دفاع مانشستر لم يختبر الاختبار اللي نقدر نقول
ان 4 في الدفاع فرقت عن 3... ولكن في فرق أكيد... وخصوصا في وجود بليند اللي ظهر
مستريح جدا علي الرغم انه بيلعب في غير مركزه ولكنه شكل حائط دفاعي ممتاز أمام
بلاكيت وايفانز... ومن ضمن نجاحات مانشستر في الماتش هي الاستغناء عن أشلي الصغير
و فالنسيا اللي مش بيضيفوا أي جديد في اي ماتش بيلعبوه.
دي ماريا أتوقع انه هيكون لاعب
الموسم في مانشستر يونايتد و هيخطف الضواء من كل نجوم الفريق... نشاط منقطع النظير
ورؤية ذكية للملعب ومفتاح لعب صعب لأي منافس يسيطر عليه... اصلا معظم اللاعيبة في
مانشستر لسه مش قادرين يجاروه في اللعب وسرعة البديهة... مكانه في وسط الملعب
بيفتح خيارات كتير لابداعه علي عكس لما اتحط علي الجناح بس... أما هيريرا فأظهر
قدرات عالية جدا لو استمر بنفس المستوي ماعتقدش فان جال هيفكر في فيدال تاني... هيريرا
يعني 91% نسبة تمريرات صحيحة، 3 تسديدات علي المرمي، صنع 4 فرص للتهديف، 6 محاولات
ناجحة لاستخلاص الكرة، وهدف.
خلاصة الكلام: مانشستر يونايتد رجع لهيبته من تاني... مش من مجرد
ماتش واحد أكيد بس الأداء و لمسات فان جال في الملعب تدل ان مانشستر بدأ طريق تاني
في الموسم وشكله هو الطريق الصح... اقروا الاحصائيات اللي تحت عشان تتأكدوا...
ومازال الدفاع محتاج لاعب "بني أدم" مش نص كم لأن توقعي ان لو مانشستر قابل
فريق زي تشيلسي مثلا أو مانشستر سيتي هيواجه مشاكل كبيرة بدفاعه ده.
رجل المباراة: في خناقة علي اللقب ده في
دماغي بين روني وهيريرا و دي ماريا... ولكن ابداع دي ماريا وكونه المحرك الأساسي
للفريق يحسم الجدل.
معلومات سريعة:
·
ريو فرديناند لم يرتكب أي خطأ في اخر
23 ماتش علي ملعب أولد ترافورد.
·
دي ماريا هو اللاعب الارجنتيني رقم 31
اللي يسجل في الدوري الانجليزي.
· واين روني بهدفه في كوينز بارك رينجرز
أصبح لديه 175 هدف في الدوري الانجليزي في المركز الثالث في هدافي الدوري عبر
التاريخ بالاشتراك مع تيري هنري.
·
خوان ماتا سجل 8 أهداف في أخر 10
مباريات له بقميص مانشستر يونايتد في الدوري الانجليزي.
· مانشستر يونايتد حقق نسبة 91% تمريرات
صحيحة في المباراة وهي النسبة الأعلي في موسم الدوري الانجليزي الحالي.
· دالي بليند سجل 112 تمريرة صحيحة في
المباراة وهو خامس أعلي رقم في الموسم الحالي.
· نسبة استحواذ مانشستر يونايتد علي
الكرة في المباراة كانت 62% وهي أعلي نسبة استحواذ في الدوري حتي الان.
تابعوني على:
