بكره انشالله هاتكلم على ملخص نصف النهائي والمهزله اللي حصلت بين ألمانيا
والبرازيل أكيد... بس النهارده هنتكلم على أحوال الارجنتين وهولندا قبل ماتشهم المصيري
النهارده..
نصف نهائي نسخة
٢٠١٤ نصف نهائي خاص... المنتخبين إتقبلوا في أشهر ماتش ما بينهم في نهائي بطولة
١٩٧٨ ولي اقيمت فالارجنتين وفازت الارجنتين ٣-١ بقيادة كيمبيس... الارجنتين إتأهلت
قبل كده لنصف النهائي ٤ مرات وفي كل مره كسبت وإتأهلت للنهائي وكسبت النهائي مرتين
١٩٧٨ و-١٩٨٦... وهولندا برضه إتأهلت لنصف النهائي ٤ مرات إتأهلت منهم ٣ مرات للنهائي
وخسرتهم كلهم بعون الله "نحس نحس يعني".
من ٨ ماتشات لعبها
المنتخبين مع بعض، الارجنتين كسبت مره واحده فقط لكن المره د كانت في نهائي ١٩٧٨ وكسبتهم
الكأس... لكن هولندا كسبت الارجنتين في ٤ ماتشات من ال ٨... من أجمل الأهداف اللي بتيجي
في بالي بين الفريقين... هدف بيركامب في بطولة ١٩٩٨ اللى فلى نظرى احد اجمل اهداف
كاس العالم.
للمره الثانية
على التوالي بتأهل هولندا لنصف النهائي وده بيعكس مدى الاستمراريه اللي هولندا بتعيشها
حتى مع تغيير الأجيال والمدربين... ولكن الارجنتين بتستغل تألق جيل فذ من المهاجمين
بقيادة ميسي عشان يكرروا إنجاز جيل مارادونا ويتأهل لنصف النهائي بعد ٢٤ سنة.
هولندا خلال البطولة
قدمت أداء متوازن هجومياً ودفاعياً بقيادة مدرب هو الافضل في المونديال وبالإعتماد
على لاعبين معظمهم من الدوري الهولندي وأول مره يلعبوا كأس عالم... الارجنتين مشوارها
خلال البطوله بيعكس أداء متصاعد نسبياً وإن كانت لم تقابل منتخب من منتخبات الصف الاول
حتى الآن "زيها زي البرازيل" و كسبت كل مبارياتها ب فارق هدف واحد فقط..
هولندا لحد امبارح
كانت أقوى هجوم في البطوله بإحراز ١٠ أهداف بينما هجوم الارجنتين في وجود كل نجومهم
أحرز ٨ أهداف فقط... ولكن دفاعياً الارجنتين أفضل نوعاً ما باستقبال ٣ أهداف في مقابل
٤ أهداف استقبلتها هولندا. المنتخبين سددوا نفس عدد التسديدات على المرمى (٥٦) خلال
المونديال ولكن من عدد محاولات أقل لمنتخب هولندا.
معلومة غريبة...
هولندا وقعت في مصيدة التسلل ٢١ مره خلال ال ٥ ماتشات السابقه في حين الارجنتين تسللت
مرتين فقط.
التشكيل المتوقع:
هولندا بتعتمد
أكتر على اللعب المباشر وإستغلال سرعة مهاجميه وقوتهم وقدرة خط الوسط في إستعادة الكرات
بسرعة ولكن الارجنتين بتعتمد على محاولة السيطرة طول الوقت على الكره ولعب من أطراف
الملعب ما عدا ماتش بلجيكا اللي كان اللعب فيه مباشر أكتر ونتيجته انهم ظهروا بشكل
أقوى من أي وقت خلال المونديال.
الارجنتين بدأت
البطوله بخطة ٤٤١١ وبتحول ٤٢٢٢ حسب مجري اللعب ولكن الخطة دي كانت بتبعد لافيتزي ودي
ماريا عن نص الملعب فكانت الفرقة بتعاني دفاعيا في نص الملعب لم يفقد الكره... ولكن
في ماتش بلجيكا لعبوا ب ٤٢٣١ واعطتهم توازن كبير لأنهم من خلالها كان في حرية أكبر
لدي ماريا ولافيتزي وميسي وبالتالي ال-٣ لعبوا لعب مباشر من عمق الملعب ودة اللي حافظ
لهم على هدف المكسب وبعدوا عن فكرة العرضيات
اللي ماكنتش ماشيه معاهم من أول البطوله.
إصابة دي ماريا
هي أبرز غيابات الارجنتين... غياب مؤثر لواحد من أهم مفاتيح لعب الارجنتين ومن اللاعيبه
اللي بتعمل فرق في الملعب سواء بسرعته أو برؤيته للملعب والتمريرات المتقنه اللي بينفذها...
ولكن الخبر الكويس للارجنتين إن أجويرو جاهز وممكن يلعب... أليخاندرو مدرب الارجنتين
لازم يفكر كويس قبل ما يختار بديل دي ماريا... يلعب باتنين مهاجمين "أجويرو وهيجواين"
وتحتهم ميسي ولا يلعب بالطريقة اللي عملتله توازن في ماتش بلجيكا ٤٢٣١؟؟!!
هولندا بتقدم
كره قدم عملية وهجومية وبعتمد على خطة واحدة هي ٥٢٣ وساعات ٥٣٢ حسب السيطرة على اللعب...والنهارده
تشكيلها هيبقي متوقع بنفس الخطة... ٥٢٣ والإعتماد على سرعة روبن وديباي ومدى فاعلية
فان بيرسي اللي خد عين من ساعة هدفه في أسبانيا ومن ساعتها ومستواه مش قد كده.
الارجنتين لازم
تركز على اللعب المباشر من غير لف ودوران ومحاولات لعب كرات عرضية ملهاش لازمة... ماكسي
رودريجز أو بيريز ممكن يكونوا بدلاء كويسين لدي ماريا بس مش هيعملوا نفس اللي دي ماريا
بيعمله... العبء الاكبر هيكون على لافيتزي وميسي انهم يكونوا فعالين ويوصلوا
"هيجواين أو أجويرو" للمرمى بأقصر الطرق.
فان جال هو نقطة
قوة منتخب هولندا... مدرب ذكي و قوي الشخصية ومرن ومش بيكابر لو عمل غلط خلال الماتش
إنه يصلحه على طول وعارف يزرع الصفات دول جوه لاعيبته... حتى لم اتأخر في النتيجة أو
الفوز أمام أستراليا، تشيلي، المكسيك وكوستاريكا ماكانوش بيفقدوا اعصابهم بالعكس الإيمان
بقدرتهم على الفوز لأخر ثانية هو كان سر التفوق.
ملحوظة: تركيز لاعبي هولندا وقوتهم وهم بيشوطوا ضربات الجزاء أمام كوستاريكا
بيعرفنا كتير عن مستوى تركيزهم العام ومدى قوتهم الذهنية في أصعب اللحظات.
المهارات الفردية
هي نقطة قوة الارجنتين... ميسي ولافيتزي وأجويرو وهيجواين هجوم لايستهان بيه خصوصاً
في الماتشات المصيرية ولكن ازاي أليخاندرو سابيلا هيسخر كل المهارات دي في الحفاظ على
توازن نص ملعبه في الوقت اللي هيكون عايز يسجل فيه.
الماتش هيكون
هجوم ضد هجوم... اللي هيكون فعال أكتر على المرمى حيخلص الماتش... روبن بأداء رائع
خلال المونديال هو مصدر إلهام هولندا ولكن ميسي هو رمز كل الارجنتين واللي حاطين عليه
الامل إنه يقودهم للفوز بالكأس بعد ٢٨ سنة من أخر بطولة.
على عكس كل التوقعات بإستغلال الارجنتين لعبها في أمريكا الجنوبية ومهاراتهم...الثقة
في فان جال بتخليني اتوقع هولندا تتأهل للنهائي في ماتش ممكن يمتد للوقت الإضافي.
تابعوني على:
No comments:
Post a Comment