موسم الانتقالات - ليفربول

 جماهير ليفربول حالها من حال جماهير الزمالك "مع الفرق طبعا"... عايشين على امل ان فريقهم يكسب الدوري وفريقهم كل شوية يعشمهم وبرضه مايكسبش الدوري... ولو الزمالك مشهور بعشقه للمركز التانى فليفربول حالته اصعب... ليفربول اخر مرة كسب بطولة الدوري كان في موسم 1990/89 ومن وقتها وصل للمركز التاني 4 مرات فقط... ولكنه كان متواجد 14 مرة في المربع الذهبي في ال 24 موسم اللي فاتوا... جماهير ليفربول دايما بتتفاخر ان فريقها هو اكبر الاندية الانجليزية وانه اكتر فريق حصل علي دوري ابطال اوروبا "5 مرات" في انجلترا... ولكن الكلام ده اتحطم علي يد مانشستر يونايتد اللي اصبح بالارقام اكتر الاندية الانجليزية حصولا علي الالقاب وبالتالي اكبر الاندية في انجلترا... الواقع ده ممكن يكوم محبط لجماهير ليفربول ولكن بعد فترات كبيرة من المعاناة مع المدربين اعتقد ليفربول وجد ضالته في براندن رودجرز.

رودجرز عمل لليفربول شكل واضح وباداء قوي وجميل في الدوري الانجليزي وكان علي وشك الفوز بالدوري وتحقيق حلم كل مشجعي ليفربول ولكنه فشل في اخر جولتين في اكمال مسيرته الناجحة طوال الدوري... رودجرز تاريخه التدريبي حوالي 6 سنوات فقط ولكنه من المدربين المتميزين بفكرهم الهجومي و قدرتهم علي اخراج افضل ما في اللاعبين من   مستوي... 248 مباراة هي رصيده التدريبي واحرزت فيها الفرق اللي دربها 433 هدف...

وبالتالي في الموسم الماضي امتلك ليفربول خط هجوم مرعب بقيادة "Triple S" سواريز، ستوريدج و ستيرلينج... الثلاثة مع بعض احرزوا 61 هدف يعني في 5 اندية فقط في الموسم اللي فات احرزوا اكتر من العدد ده... مانشستر يونايتد بجلالة قدره وبكامل نجومه احرز 64 هدف في الدوري كله... ولكن خط الهجوم ده كان كان وراه خط دفاع في الكنافه استقبل 50 هدف في 38 مباراة في الدوري و ده رقم كبير مقارنة بتشيلسي مثلا اللي دخل مرماه 27 هدف فقط في الدوري كله... المشكلة تحديدا في قلب الدفاع اللي بيلعب فيه سكيرتل و دانيل اجير والاتنين لا يعتبروا باى حال من المدافعين ذو المستوي العالي ومن المتخصصين باحراز الاهداف في مرماهم.

خط وسط ليفربول لم يفتقد الابداع خلال الموسم الماضي في وجود كوتينهو وهندرسون وخبرة جيرارد... ولكنة افتقد التوازن الدفاعي بسبب تذبذب مستوي لوكاس ليفا وتقدم سن جيرارد... ليفربول الموسم اللي فات ماكنش عنده لاعب خط وسط دفاعي وفي نفس الوقت بيهاجم Box to Box (حاجة كده زي فيدال و يايا توريه) وحتي مفيش اللاعب اللي بيدافع بس...

الدوري ضاع من ليفربول بسبب اخطاء دفاعية سواء من المدافعين او من لاعبي خط الوسط (غلطة جيرارد في ماتش تشيلسي مثلا)... ولكن مازال الامل في موسم 2015/14 انهم يحققوا الحلم او انهم يوصلوا مراحل متقدمة في دوري أبطال أوروبا اللي هيشاركوا فيه بعد غياب 4 سنين... فكان من الطبيعي يكون التدعيم في فترة الانتقالات الصيفية بقلبين دفاع ولاعب خط وسط... ولكن تفكيرهم وخططهم الشرائية اتشتت بسبب اكبر غلطة عملها ليفربول وهي بيع احسن لاعبيهم وهدافهم "لويس سواريز" اللي احرز لهم 61 هدف في الموسمين الاخيرين... طبعا السعر اللي باعوه بيه ورغبة اللاعب كانوا سبب كبير ولكن ليفربول كان ممكن يقعده لو نعنشله مرتبه شوية.

معلومة: اخر مرة هداف الدوري كان من ليفربول كان من 15 سنة في موسم 1999/98... مايكل اوين ب 18 هدف.

ليفربول كان اكبر زبائن ساوثهامبتون في فترة الانتقالات بدفع 53.5 مليون استرليني في 3 لاعيبة من مجموع 95.5 مليون صرفهم ليفربول حتي الان... صفقات ليفربول ال 6 حتي الان تنوعت بين كل خطوط الملعب ولكن مافيهاش نجم يعوض سواريز ولا يسد حاجتهم الحقيقية في مراكز الضعف.

تعويض سواريز صعب وشبه مستحيل من وجهة نظري... وببيعه اضر ليفربول كتير بفرصه الموسم القادم في الفوز بالدوري...ولكن في محاولة لتعويض سواريز تعاقد ليفربول مع ريكي لامبرت من ساوثهامبتون... لامبرت "32 سنة"احرز 14 هدف الموسم الماضي في 39 ماتش لعبه لساوثهامبتون... اعتقد كان الافضل التعاقد مع لاعب اصغر في السن واثبت قدرات تهديفية اكتر خصوصا في دوري الابطال... وكان غريب التعاقد مع ديفوك أوريجي مهاجم ليل الفرنسي واعرته تاني لنفس الفريق!! أوريجي احرز 6 اهداف فقط في 35 ماتش لليل ولما كان مع منتخب بلجيكا في كاس العالم كان اى كلام برضه... ولكن بارقة الامل في التعاقدات الهجومية لليفربول هي "لازار ماركوفيتش" الجناح اللي بيتميز بسرعته وايضا قدراته التهديفية ولكن ليفربول محتاج مهاجم صريح... لو جابوا لامبرت رغم سنه ليه مافكروش في ديفيد فيا مثلا؟؟ وغير كده ماندزوكيتش كان متاح قبل مايروح اتليتكو مدريد... ممكن حاليا يفكروا في كافاني أو فالكاو أو حتي ستيفان يوفيتيتش اللي كان الخيار الرابع في مانشستر سيتي في الموسم الماضي.

ادم لالانا من احسن صفقات فترة الانتقالات كلها وكان عليه منافسة شرسة من معظم اندية القمة في انجلترا... لالانا المفروض انه هيزيد من ابداع ليفربول الهجومي لو عرف براندن رودجرز يوظفه في خطه مناسبة مع كوتينهو و جيرارد... ولكن الصفقة الاهم في خط وسط ليفربول من وجهة نظري هي "ايمري كان"... ايمري هو مستقبل خط وسط ليفربول... ايمري لاعب بايرن ميونيخ و بايرليفركوزن لسه عنده 20 سنة وهيقدم لليفربول مميزات لاعب خط الوسط الدفاعي اللي بيساند الهجوم في نفس الوقت وعنده القدرة علي صنع وتسجيل الاهداف... "ايمري" عنده احصائيات مشابهة جدا لجيرارد من حيث الاداء الدفاعي او التمريرات السليمة على الرغم من صغر سنة.

اما الصفقة الاغرب لليفربول الموسم ده هي الكرواتي ديان لوفرين... الغريب فيها هو تمن اللاعب نفسه... علي مستوي الاحصائيات فلوفرين بيقدم مستوي مشابه لمارتن سكيرتل... وسكيرتل محدش يدفع فيه تلاته جنيه ونص فمافيش مبرر لل 24 مليون استرليني اللي دفهم ليفربول لساوثهامبتون في لوفرين... ولكن ديان لوفرين قابل للتطور بشكل كبير تحت قيادة رودجرز خصوصا انه لسه 25 سنة واظهر شخصية قياديه رائعة مع ساوثهامبتون و المنتخب الكرواتي... بالاعتماد بشكل اساسي علي لوفرين وجنبه مامادو ساخو ممكن نشوف شكل دفاعي احسن لليفربول.

برغم المبلغ الهائل اللي صرفه ليفربول حتي الان ولكن من رايي انهم لسه محتاجين يركزوا جهودهم في التعاقد مع مهاجم قدراته التهديفية عالية لأن لامبرت مش هيسد مكان سواريز ووجود ستوريدج لوحده مش كافي خصوصا الموسم القادم في منافسات دوري الابطال... وعليهم انهم يطوروا و يحافظوا علي رحيم ستيرلينج لانه عنصر ابداع لايعوض في هجومهم.

في حالة عدم التعاقد مع مهاجم قوي، مشكلة ليفربول هتتنقل من خط الدفاع الي خط الهجوم ولكن في كل الاحوال اعتقد ان حظوظ ليفربول في الفوز بالدوري الموسم القادم صعبة جدا.

تابعوني على:

·         تويتر Twitter     @MO_ELSADEK

·         فيس بوك Facebook   www.facebook.com/FootballCollage

Follow @MO_Elsadek