خاميس و اوهام عودة الجلاكتيكوس

ما لبث ان اعلن ريال مدريد عن نجاحه فى ضم خاميس رودريجيز الى صفوفه مقابل 80 مليون يورو حتى بدأ الملايين من مشجعى بطل اوروبا فى جميع انحاء العالم بشكل عام و فى مصر بشكل خاص بالتهليل للصفقة و التفاؤل بمستقبل النادى عن طريق المقارنة بين الفريق الحالى بنجومة و فرقة الجلاكتيكوس الشهيرة التى ضمت بعض من الاساطير التاريخية للعبة لبضع مواسم فى بداية هذا القرن.

لا شك فى ان كل مشجع لاى ناد او منتخب يريد ان يرى افضل نجوم الكرة يرتدون قميص فريقه و لكن فى بعض الاحيان ربما يكون جلب العديد من النجوم للعب ادوار متشابهة بل و متعارضه فى بعض الاحيان بلاء على بعض الفرق اكثر منه نعمة – و لنا فى ريال مدريد و فريق الجلاكتيكوس بالاخص كل العبر.

بطل اوروبا استقدم تونى كرووز عقب كاس العالم مباشرة لتدعيم خط وسط الفريق و هى صفقة يتمناها اى فريق خاصة لما يتمتع به كرووز من لياقة ممتازة و قدرة على التسديد من بعيد و بناء الهجمات بالاضافة للمساندة الدفاعية ان اقتضى الامر. لاعب سرعنه اكثر من مقبولة و رسخ نجوميته بثبات على مدار عدة مواسم اكثر من ممتازة مع كل من بايرن ميونيخ و منتخب المانيا بطل العالم (من الاخر دة لاعب "سينترال ميدفيلدر" عظيم كما يعرفه مجاذيب الفوتبول مانيجر اللى زى حالاتنا).  

فيما يتعلق بخاميس، فالجميع رأى كيفية تأقلم دى ماريا فى موقعه الجديد كلاعب وسط مهاجم الموسم الماضى و هو نفس الموقع المفترض ان يلعب فيه خاميس و السؤال هنا: لية بجيب لاعيب ب80 مليون يورو لسة محتاج وقت يتأقلم مع الفريق و ضغوطات اللعب لمدريد عشان يلعب مكان دى ماريا اللى برضه ب80 مليون و اكثر سرعة و خبرة من رودريجيز و ان كان اقل مهارة فى الفرديات و انهاء الهجمات من نظيره الكولومبى؟! و كل دة غير ان اصلا كرووز ممكن جدا يلعب فى مكان دى ماريا ذات نفسه! و ازاى بدفع الملايين دى كلها و انا عندى خط الوسط الدفاعى بيعانى من تقدم سن زافى الونسو اللى اصلا عمره ما كان مدافع صرف و عندى ظهير زى مارسيلو بيهاجم بس و ظهير تانى زى كارباخال مجتهد لكنه مش على المستوى اللى يؤهله انه يكون اساسى فى مدريد و مباراة برشلونه فى البيرنابيو الموسم اللى فات اظهرت كتير من عيوبه قدام الفرق القوية.

و كل الملايين دى بتتصرف و انا عندى مهاجم زى بنزيمة بيجيب جون من كل ثلاث او اربع فرص محققة. سيقول البعض ان بنزيمة احرز 17 هدفا و 11 هدفا فى الدورى الموسمين السابقين على التوالى لكن لنكن واقعيين هل هذه الارقام هى من يبحث عنها نادى فى حجم ريال مدريد من مهاجمه الاساسى؟! علما بان جميع مباريات الليجا اصبحت ضد خصوم ضعفاء جدا باستثناء مواجهات برشلونة و اتلتيكو مدريد و ممكن معاهم بلباو و فالينسيا. و دة فى الوقت اللى مهاجمين اقوى زى سواريز الصيف اللى فات و كافانى الصيف دة كانوا متوافرين للشراء و باسعار اقل كثيرا من ثمن صفقة رودريجيز.

يقول البعض ان انشيلوتى ليس بالمدرب المبتدئ و انه سيتمكن من توظيف جميع النجوم التى يملكها النادى لكن لماذا اقوم بشراء لاعب سيتطلب تغيير مراكز لاعبين على الاقل ليجد مكانا فى التشكيلة الاساسية؟ و من قال ان كرووز و مودريتش سينجحوا فى لعب مراكز اكثر دفاعية؟! و ليه كل دة و انا عندى مراكز تانية محتاجة تدعيم اصلا!

اما فيما يتعلق بالحنين للجلاكتيكوس فدعنى اذكركم ان هذا الجلاكتيكوس فى عز عنفوانه من 2003 الى 2006 لم يفز سوى ببطولة يتيمة و كانت كاس السوبر الاسبانى المؤلف من مبارتين ذهابا و ايابا حيث تعاقب على الفريق خمسة مدربين فشلوا فى الفوز باى بطولة حقيقية بلاعبين امثال زيدان و فيجو و رونالدو و روبرتو كارلوس و بيكام و غيرهم ممن اتوا و ذهبوا ولا نعرف لما اتوا و لما ذهبوا بل كل ما نعرفه ان تواجد العديد من نجوم المهاجمين افقد الفريق توازنه على مدار سنوات كاملة!

هل هذا هو نجاح الصفقات التى يتمناها اى مشجع او رئيس نادى لفريقه ولا هو الموضوع موضوع ادينى 100 حباية و خلاص عشان انا معايا فلوس كتير؟!

تابعوني على:

·         تويتر Twitter     @AHASSAN83

·         فيس بوك Facebook   www.facebook.com/FootballCollage

Follow @ahassan83