موسم الانتقالات – تشيلسي

حاجة غريبة علي فريق بيدربه مورينهو انه يعدي موسم من غير اي بطولات... خسارة السوبر الاوروبي... منافسة علي بطولة الدوري انتهت في الاسابيع الاخيرة والاكتفاء بالمركز الثالث... خروج بدري من كاس الاتحاد... ربع النهائي كاس الدوري... وخروج محبط من نصف نهائي دوري الابطال امام اتليتيكو مدريد في وسط ملعب ستامفورد بريدج... كل ده كان ليه سبب واحد مالوش تاني... مهاجمين كسر و عرَه.

ممكن وجهات النظر تختلف في الاقتناع بطريقة لعب مورينهوانها دفاعية وانه بيلجئ لتقفيل المباريات خصوصا امام الفرق الكبيرة وده حقيقي... وتشيلسي فعلا هو صاحب اقوي دفاع في الدوري الانجليزي الموسم الماضي واستقبلت شباكه 27 هدف فقط... ولكن طريقه مورينهو الدفاعية دي ليها سبب وهو ان المهاجمين اللي عنده مش علي قدر اسم تشيلسي وماقدروش ينقذوا الفريق في وقت الحاجة...  واحد فاقد الذاكرة وحاس ةالتهديف بعد رحلة روسيا "ايتو" وواحد ربنا كرمه في موسم فجابوه تشيلسي بالغلط ولو انه مجتهد جدا "ديمبا با" وواحد فاقد الاهلية والنداهة ندهاه لسبب غير معروف "توريس"... والدليل علي كده ان مورينهو مع ريال مدريد كان نسبة اهداف الفريق بتعمل ارقام قياسية كل موسم... ولكن في ظل وجود السبب القهري ده فطريقة لعب مورينهو احرز بيها تشيلسي 100 هدف في كل البطولات منهم 71 في الدوري وهو ثالث اقوي هجوم في انجلترا متفوق علي فريق زي مانشستر يونايتد بمهاجمين من نوعية فان بيرسي و روني.

الثلاثي الهجومي لتشيلسي احرزوا مع بعض 31 هدف من كل اهداف تشيلسي... ايتو 12... توريس 11... ديمبا با 8... طبعا دي نسبة ضعيفة للتهديف من لاعب مهاجم في فريق بحجم تشيلسي... ده بنزيمة اللي بيسجل هدف من كل 10 فرص احرز 24 هدف الموسم الماضي... حتي هازارد اللي بيلعب كجناح احرز 17 هدف وهو كان هداف تشيلسي الموسم اللي فات.

طبعا ده كان سبب كافي ان مورينهو مايفكرش في اي مغامرة او تعاقد غير محسوب واتجه علي طول لبطل الدوري الاسباني بعربية وحمل فيها اهم 3 لاعيبة في الفريق واللي كانوا سبب كبير في الموسم الرائع اللي مر بيه اتليتيكو مدريد... اهمهم هو دييجو كوستا "اللي عامل فيها اسباني"... كوستا قضي موسم خيالي مع اتليتيكو مدريد و كان احسن بديل ليهم بعد رحيل فالكاو و احرز 36 هدف في 52 مباراة لعبها... مهاجم قوي وفعال امام المرمي والاهم بالنسبة لمورينهو انه بيساعد في الادوار الدفاعية وبينفذ كل الخطط التكتيكية باتقان... مورينهو لم يكتفي بالحل ده وقرر التخلص من ديمبا با اللي لم يقنع مورينهو انه علي قدر حجم تشيلسي ولوكاكو اللي لم يقنع مورينهو تكتيكيا وعرض ايتو للبيع وشكله هيصبر علي توريس كمان موسم ولكننه قرر يرجع لمهاجمه المفضل والمهاجم اللي كسب دوري الابطال لتشيلسي "ديديه دروجبا"... دروجبا هيلعب موسم واحد كبديل في محاولة لمسعدة مورينهو علي سد نقطة الضعف في الهجوم وافادة المهاجمين بخبرته وبعدين في اخر الموسم هينضم لجهاز مورينهو التدريبي كمساعد مدرب.

تقدم سن اشلي كول و اسطورة النادي فرانك لامبارد ورغبتهم في الانتقال لدوري اقل تنافسا من اجل الحصول علي فرصة في اللعب بشكل اساسي وايضا سن مارك شوارزر"41 سنة" مايؤهلوش انه يكون بديل المستقبل لبيتر تشك... كل ده كان سبب تاني لمورينهو للبحث عن بديل مناسب واصغر سنا وعلي نفس المستوي من الكفاءة.... وباالتالي استعاد ثيوبت كورتوا "احسن حارس مرمي صاعد في أوروبا" بعد 3 سنين اعارة لاتليتيكو مدريد... كورتوا هو بالتاكيد احسن بديل لتشك وان كان ممكن جدا نشوفه هو الحارس الاول بداية من الموسم ده... لويس فيليبي في نظري هو افضل ظهير ايسر في أوروبا الموسم الماضي وكان احد غلطات سكولاري انه ماضموش لتشكيلة البرازيل في كاس العالم... لويس فيليبي مدافع قوي جدا وقتيل وفي نفس الوقت مهارته بتساعده في النصف الهجومي وكراته العرضية متقنة ولاعب سريع... من افضل الخيارات اللي كانت متاحة في السوق لخلافة أشلي كول.

تعويض فرانك لامبارد مهمة مش سهلة بالمرة... اقل حاجة تتقال علي لامبارد انه هداف النادي علي مر التاريخ برصيد 211 هدف 648 مباراة لعبها لتشيلسي... وبالتالي كان لازم اختيار البديل او بالتحديد "المرشح لدور بديل لامبارد" يكون بعناية... مورينهو اختار انه يطلع فابريجاس من تلاجة برشلونة ويراهن انه يقدر يرجع فابريجاس للمستوي اللي كان عليه في أرسنال... فابريجاس عاش في برشلونة لحظات في قمة المستوي و لحظات اكتر علي الدكة وبالتالي الانتقال لتشيلسي بالنسبة له حياة من اول وجديد... فابريجاس من احسن اللاعبين في العالم في تمرير الكرة ومحاولة ضرب الدفاع وبرضه بيحاول باجتهاد في الدفاع في نص الملعب ولكن بيعيبه انه بطئ نوعا ما.

معلومة: تشيلسي اشتري لاعيبة ب 77.5 مليون و باع 2 لاعيبة فقط  بنفس المبلغ (ديفيد لويز 49.5 و روميل لوكاكو ب 28.0)... ولكن تشيلسي باع 4 لاعيبة بمجموع 85.2 مليون بالاضافة الي اشلي كول ولامبارد اللي سابوا النادي ببلاش لانتهاء عقدهم... وهو من الاندية القليلة جدا اللي عملت فرق مالي ايجابي في فترة الانتقالات حتي الان.

الموسم الماضي مورينهو وجد احسن توليفة دفاعية هي ما بين جاري كاهيل وجون تيري ومكانش مقتنع باداء ديفيد لويز في مركز قلب الدفاع جنب اي حد فيهم... ديفيد لويز من اللاعيبة اللي مخها نظيف في الكورة وعنده حسن توقع ممتاز للعب وشويط علي المرمي سواء من اللعب المفتوح او من الضربات الثابتة ولكن اندفاعه الهجومي في المباريات بيأثر كتير علي تركيزه في الدفاع  والكلام ده ماياكلش مع مورينهو خالص حتي لو كان في كل المميزات دي... فبدأ مورينهو يلعبه في وسط الملعب جنب راميرس منها انه يستغل حسن توقعه للعب في قطع الكرات ونزعته الهجومية وفي نفس الوقت يسوقه ويظهر امكانياته للاندية الاخري... والصراحة نجحت خطة مورينهو اكبر نجاح بان باريس سان جيرمان دفع 49.5 مليون في ديفيد لويز عشان يكون اغلي مدافع في التاريخ حتي الان.

  

تشيلسي تقريبا سد احتياجاته في فترة الانتقالات حتي الان ولكن من اجل عمق اكتر في التشكيلة محتاجين يفكروا في استقدام مدافع سنة صغير عشان يكون بديل مستقبلي لتيري وكاهيل وايضا لاعب خط وسط مدافع كل تركيزه يكون في الدفاع فقط... و من ناحية تانية فاحد نقاط قوة تشيلسي هي اطراف ملعبه... تشيلسي يمتلك 4 لاعبين احسن من بعض علي اطراف الملعب منهم واحد لسه فائز بكاس العالم الصيف ده... شورلي الموسم الماضي كان بديل في معظم المباريات ولكنه كان بديل منقذ للفريق في معظم الاوقات وحتي في كاس العالم كان "محمد ناجي جدو" بتاع المانيا كل مابينزل بيسجل او بيساعد بتمريرة حاسمة لهدف... بالاضافة لهازارد وويليان و في وسط دول كلهم هتكون مهمة محمد صلاح صعبة جدا في حجز مكان في التشكيل الاساسي او حتي الاحتياطي.

الموسم القادم هو التاني في فترة تدريب مورينهو التانية والاسطورة بتقول ان موسم مورينهو التاني هو فترة تالق فريقه... الموسم القادم المنافسة علي اللقب هتكون عنيفة خاصة مع وجود لويس فان جال في مانشستر يونايتد والتدعيم اللي ارسين فينجر بيعمله في ارسنال ولكن تشيلسي مع مورينهو فرصتهم كبيرة انهم يفوزوا باللقب خصوصا انه حل مشكلة الفريق اللي خسرته اللقب الموسم الماضي.

تابعوني على:

·         تويتر Twitter     @MO_ELSADEK

·         فيس بوك Facebook   www.facebook.com/FootballCollage

Follow @MO_Elsadek