موسم الانتقالات – مانشستر يونايتد

بداية طويلة بس لابد منها... بعد الكابوس اللي شافه كل مشجعي مانشستر يونايتد في موسم 2013/2014 بانهاء الدوري في المركز السابع وعدم التاهل لدوري الابطال والخروج من كل البطولات ابيض يا ورد ماعدا بطولة الدرع الخيرية اللي بيعتبروها في انجلترا "حلاوة روح" وكانت امام ويجان "مش فرقة جامدة بالمعني يعني"... للعلم والتذكير فقط، اخر مرة مانشستر يونايتد انهي الدوري بره الثلاث مراكز الاولي كان من 23 سنة في موسم 90/91 وحتي في الموسم ده كسبوا دوري الابطال.

احسن مدرب في تاريخ مانشستر يونايتد

مفيش اتنين يختلفوا ان الفريق محتاج شغل كتير... واحسن حاجة بدأت بيها ادارة النادي فترة الانتقالات هي اقالة "الكفتجي" ديفيد مويس في اخر الموسم اللي فات وتعيين لويس فان جال بداية من الموسم ده... مانشستر من النوادي اللي المدربين بيعمروا فيه وأخر مرة اقالت فيها ادارة النادي مدرب بعد موسم واحد فقط كان من 42 سنة في موسم 71/72... سير اليكس فيرجسون اعظم مدربي النادي قادهم لاول بطولة في عهده في الموسم الرابع ولكن المقارنة مع ديفيد مويس ماتنفعش... الزمن بقي مختلف والخسائر المالية المترتبة علي النتائج السيئة صعب تتعوض وكمان قبل ما سير اليكس يمسك النادي مانشستر يونايتد كان نادي عادي يكسب الدوري  مرة ويغيب 10 سنين وكان ملطشة في اوروبا لكن في خلال ال 27 اللي فيرجسون درب فيهم النادي حوله لقوة مرعبة في انجلترا وأوروبا كلها وكل الفرق بتعمله الف حساب وماينفعش مدرب عادي يحل محله. ازاي نادي بحجم مانشستر دلوقتي يعين مدرب "مويس" ماكسبش ولا بطولة توحد ربنا في 16 سنة تدريب وحتي موصلش باي فريق دربه للمراكز الاربعة الاولي في الدوري.

ملاحظة: فيرجسون بنفس قائمة اللاعبين الحالية ومن غير فيلايني وماتا خد الدوري في اخر موسم ليه مع مانشستر يونايتد ولكن مش كل المدربين "سير اليكس فيرجسون".

فان جال... اسم غني عن التعريف في عالم التدريب... ومش هقارنه بديفيد مويس عشان خسارة فيه المقارنة... ولكن فان جال يعني 19 بطولة في 23 سنة تدريب... يعني مدرب لاربعة من اكبر الفرق في اوروبا... يعني الفوز باخر بطولة دوري ابطال لأياكس... يعني الفوز بالدوري في هولندا، اسبانيا و ألمانيا...يعني نسبة فوز 62% من 790 مباراة كمدرب... واعتقد كاس العالم 2014 كان احسن دليل علي مدي خبرة وذكاء وواقعية فان جال.

مشكلة مانشستر الاساسية الموسم اللي فات هي عدم وجود خطة واضحة للعب من مويس لتوظيف كل لاعب علي قد امكانياته... وايضا اختيار اسماء غير مناسبة "فنيا" لتدعيم الفريق في فترات الانتقالات... يعني مع كل التقدير لخوان ماتا والاضافة اللي ممكن يقدمها للفريق واللي معرفش مويس يطلعها منه لكن شبنجي كاجاوا يقدر يعمل نفس الاضافة...  مانشستر يونايتد عنده اتنين من احسن مهاجمي العالم في الوقت الحالي "روني وفان بيرسي" وبدائل ليهم علي مستوي عالي كمان... ولكن مشكلة مانشستر الاساسية موجودة في قلب الدفاع والجناح الايمن وخط الوسط المدافع.

فان جال وادارة مانشستر حتي الان عاملين حملة نظافة كويسة للاعيبة لاسباب مختلفة... فرديناند وفيديتش سنهم كبر وادائهم بدأ في مرحلة الكنافة... ايفرا "33 سنة" اداءه معقول في ظل تدهور مستوي الفريق ولكن السن له احكامه وقرر يروح يوفينتوس حيث ايقاع اهدي في ايطاليا... واعتزال الاسطورة جيجز وانضمامه لجهاز فان جال التدريبي... الكسندر بوتنر من ضمن لاعيبة كسر كتير وكان لازم يمشي... ولسه محتاجين يخلصوا من لاعيبة عالة على النادي وغير مفيدين بالمرة مؤخرا زي اندرسون، ناني، فالنسيا على سبيل المثال... التعاقد مع لوك شاو خطوة ناجحة جدا لتدعيم الدفاع بواحد من المواهب اللي هتكون اساسية في منتخب انجلترا بغض النظر عن مرتبه المبالغ فيه خصوصا ان عنده 19 سنة بس... شاو بيلعب ظهير ايسر في الاصل ولكن ممكن يلعب كقلب دفاع في وقت ازمة... برضه اندير هيريرا هيقدم اضافة كبيرة لخط الوسط من تمريرات سليمة وتغطية وعقل موجود في نص الملعب "الدور اللي كاريك بيعمله بس بحكم السن مبقاش كاريك بتاع زمان". 

في اشاعات كتير علي هوملز، فيدال، دي ماريا، فيرمالين وان فان جال هيبعت عربية تحمل رجالة من هولندا "بليند، كلاسي وايندي" ولكن الاكيد ان فترة الانتقالات بالنسبة لمانشستر يونايتد لسه ماخلصتش لان من اول مبارتين في استعدادات الموسم الجديد اتضح ان فان جال بيفكر يلعب بنفس طريقة وخطة هولندا في مونديال البرازيل 352 و تطبيقاتها المختلفة 532 و 3412 عشان يحط روني في مكانه المفضل كراس حربة  جنب فان بيرسي و في نفس الوقت يستغل طاقة روني انه يساعد في بناء الهجمات... وعشان الخطة دي تنجح محتاج يدعم اللاعيبة اللي موجودة عنده ب:

·         لاعب خط وسط مدافع تانى... في مرحلة بناء خط الوسط "مش ترميم" محتاج لاعب بمواصفات خاصة جنب اندير هيريرا واستخدام كاريك وفليتشر كبدائل... طبعا لوعرفوا يخلصوا صفقة فيدال يبقي وصلوا لحل لمدة 5 سنين قدام ولكن في حلول تانية كتير منها توظيف فيلايني في المركز ده و يشيل منه اى اعباء هجومية ولكن ده حل صعب خاصة فان جال مش مقتنع بقدراته اصلا و عايز يبيعه باي شكل... وحل تاني انهم يفكروا في صفقة غير فيدال لو سعرها هيكون غالي زي سامي خضيرة مثلا... خضيرة ممكن يكون حل مثالي في نص ملعب مانشستر خصوصا انه بيساعد هجوميا بدون التاثير علي دوره الاساسي في الدفاع.

·         جناح ايمن... اللاعب اللي مانشستر محتاجه في المركو ده لازم يكون عنده القدرة انه يساعد بشكل كبير في الدفاع والمرونة انه يغير مركزه حسب ظروف الماتش... طبعا مفاوضاتهم مع دي ماريا مشكلتها السعر العالى اللي طلبه ريال مدريد... لكن لو السعر مشكلة، في لاعيبة تانية ممكن تعمل نفس الدور وبسعر اقل اكيد زي بيدرو اللي عايز يمشي من برشلونة او كوادرادو من فيورينتينا او شاكيري من بايرن ميونيخ.

·         قلب الدفاع... اللاعيبة اللي موجودة حاليا في المركز ده في مانشستر "جوني ايفانز، سمالينج و بول جونز" اخرهم يبقوا بدلاء او اساسيين في فرقة في منتصف جدول الدوري لكن مانشستر محتاجين مدافع يعرف يشيل الفرقة ويعتمد عليه في قيادة الفريق في البطولات الكبيرة... طبعا معظم الاسماء اللي تنفع غير متاحة دلوقتي لتمسك نواديها بيها ولكن لسه معاهم شهر في فترة الانتقالات عشان يحاولوا مع هوملز "اللي صعب دورتموند يسيبه" و فيرمالين "اللي لو دفعوله مرتب كويس هيكسر لفينجر قلة ويسيبه" و في بن عطية من روما بس محتاجين يدفعوا كتير ومعتقدش الميزانية هتسمح. 

اسلوب مانشستر يونايتد عامة في اي فترة انتقالات انه بيركز في لاعب واحد او اتنين بالكتير ويدفع فيهم اي مبلغ مهما كان كبير ولكن الموسم ده مختلف... بضغط من فان جال، الادارة اجبرت انها تغير فكرها الموسم ده بسبب الفترة العصيبة من التخبط الخططى وهبوط المستوي الحاد اللي شافوها في فترة ديفيد مويس وبالتالي الحل الاجباري انهم يكملوا البحث خلال فترة الانتقالات عن لاعيبة من طراز عالمي يقدروا ينافسوا باقي فرق انجلترا الكبيرة مش يكونوا سد خانة.

تابعوني على:

·         تويتر Twitter     @MO_ELSADEK

·         فيس بوك Facebook   www.facebook.com/FootballCollage

Follow @MO_Elsadek