موسم الانتقالات - أرسنال

عدي تقريبا نص فترة الانتقالات الصيفية... فرق ابتدت موسم الانتقالات بدري... وفرق نسيت تبدأ اصلا... وفرق بتشتري اى حد ماشي في السكة... وفرق سدت احتياجاتها فعلا اللي كانت نقصاها الموسم اللي فات... بعد تالت سنة من تطبيق الاتحاد الاوروبي لسياسة ال  Financial Fair Play بمعني السياسة المالية العادلة للعب... واضح ان تأثيرها بدأ يظهر في تحجيم الصرف علي انتقالات اللاعبين من الاندية اللي معاها فلوس بسبب اصحابها ومعندهاش ايرادات كافية.

معلومة: ال Financial Fair Play باختصار من غير رغي كتير... هي ان النادي لازم يحقق كشف حسابات سنوي بفائض ايجابي او بفائض سلبي بسيط ومحدد حسب الدرجة اللي بيلعب فيها النادي والا تعرض النادي لعقوبات منها الحرمان من اللعب في المسابقات الاوروبية، خصم نقط منه في الدوري، حرمانه من اجراء انتقالات للاعبين أو حتي حرمانه من الجوائز المالية نتيجة مشاركته في المسابقات المختلفة... بمعني ان ايرادات النادي ودخله من كل المصادر لازم يغطي كل مصروفات النادي والا اطبق عليه عقوبات... وطبعا اهم مصروفات اي نادي هم المرتبات و تمن انتقالات اللاعيبة فلو عايز يشتري لاعيبة يبقي لازم ايراداته تكون مغطية تمن اللاعب ومرتبه والا اتعرض للعقوبات اللي قلناها... الاتحاد الاوروبي بدأ في تطبيق السياسة دى تدريجيا بداية من موسم 2011/2012 والموسم القادم 2014/2015 هيكون تطبيقها بشكل اوسع. لو عايزين تفاصيل اكتر هتلاقوها في الملف اللي تحت ده...

http://www.financialfairplay.co.uk/resources/FFP%20Press%20Kit%20EN_FINAL_en%20_1_.pdf

ما علينا... هنتكلم علي موسم الانتقالات واحداثه حتي الان وتاثيره بالنسبة للفرق الكبيرة في أوروبا... هنبدأ النهارده بأرسنال وبعدين هيكون في مقال مخصص لكل فرقة نناقش فيهم اداء واستراتيجيات فرق انجلترا واسبانيا وايطاليا في موسم الانتقالات... 

من بعد جيل هنري وفييرا وبيريس... مشكلة ارسنال بتتلخص في الاتي... تبدأ فترة الاعداد للموسم... احنا هنجيب لاعيبة نجوم واحسن لاعيبة في مراكزها في العالم...فترة الانتقالات تقرب تخلص ولسه مفيش حد جه... تنتهي فترة الانتقالات وفينجر يطلع يقول احنا لينا سياسة وفكر معين والبركة في اللي موجود... جماهير ارسنال تقتنع ويقولك رامسي هو اللي هيشيل الفرقة وهيكون نجم انجلترا وهياخد بينا الدوري... يبدأ الدوري... 8 انتصارات متتالية لأرسنال ورامسي يجيب كام جول... تبدأ الجماهير تتراهن مين هيكون في المركز التاني بعد أرسنال... و يبدأوا يفكروا يحبوا يلاعبوا مين في دور ال 16 في دوري الابطال... شهر يناير يخلص مع سلسلة تعادلات وتذبذب في المستوي... يقولك معلش الاجهاد واخد حقه مع اللاعيبه... رامسي يصاب بالصليبي للمرة ال 13... نبدأ مرحلة ماتش خسارة وماتش تعادل... تبدي لعبة الحسابات وعايزين مين يخسر عشان يوصلوا للمركز الاول... وبعدين مرحلة يارب نلحق مكان في الاربعة الاوائل عشان نلم قرشين من دوري الابطال... وهكذا مع كل موسم...

ولكن السنة دى أرسين فينجر قرر يشرب بيريل و يعمل اللي معملوش من سنين و في أول يوم تقريبا في فترة الانتقالات كان دافع 38 مليون ومخلص في سانشيز... فينجر اخيرا بيدي جماهير ارسنال "اللي مقنعه بيه" واللي مش طايقينه انه حط ايده وهرش العيوب اللي كانت في الفرقة السنة اللي فاتت او بمعني اصح المراكز اللي كانت مسببه قلق طول الموسم... مهاجم محترم، خط وسط مدافع صريح وحارس مرمي.

ارسنال السنة اللي فاتت اشتري اوزيل في صفقة قياسية في تاريخ النادي "طبعا في اخر يوم انتقالات بعد مانشف ريق الجمهور" ولكن شغل اوزيل وصحابه في خط الوسط معظمه كان بيروح هدر بسبب جيرود الا لو لاعب من خط الوسط قرر ينهي الهجمة بنفسه زي ما كان بيحصل من ويلشير و رامسي وأوزيل نفسه... طبعا اليكسيس سانشيز مش هيحل المشكلة دي ولكنه هيكون مفتاح لعب مهم لارسنال وممكن يدي حلول وطرق لعب مختلفة لفينجر وده ممكن يساعده في الماتشات اللي بتكون معقربة... سانشيز صفقة قوية وهيكون احد احسن لاعبي الدوري الانجليزي الموسم القادم... ولكن تبقي مشكلة المهاجم الصريح... بودولسكي مش نافع وجيرود مش شايل الفريق...في كلام ان فينجر عايز يجيب بالوتيللي من ميلان...ولكن من رايي ارسنال محتاجين يخرجوا بره الكادر الفرنساوي او التقليدي شوية... ممكن يشوفوا جاكسون مارتينيز مثلا مهاجم بورتو... مهاجم طول بعرض وحيطة وهداف الدوري البرتغالي والاهم انه عايز ياكل عيش مش بتاع مشاكل ولا غريب الاطوار زي بالوتيللي.

مع ان فينجر بدأ يكون فنجري ويطلع الفلوس اللي تحت البلاطة ويصرف على لاعيبة جديدة لكن لما حد يجيبله سيرة مرتبه وانه عايز ياخد فلوس اكتر بيعمل شحات وتاخده الجلالة ويفتحله باب النادي ويقوله الباب يفوت جمل زي كل النجوم اللي مشاهم السنين اللي فاتوا وزي بكاري سانيا اللي مشي ببلاش بعد نهاية عقده لمانشستر سيتي ولكن الصراحة فينجر جاب باك يمين محترم مكانه هو ديبوشي... برضه المرتب كان نقطة الخلاف بين فينجر و سامي خضيرة بعد ما اتفق مع ريال مدريد علي السعر وكل حاجة... سامي خضيرة كان هيضيف حاجة لأرسنال مش موجودة عندهم دلوقتي وصعب يلاقوها في لاعيب تاني... كان هيضيفلهم لاعيب خط الوسط الاتوبيس اللي طاقته في اول الماتش زي في اخره بنفس التركيز وكمان تمريراته ومساعداته الهجومية فعالة.

أرسنال بعد رحيل ينز ليمان تقريبا ماشافش يوم عدل من حراس مرماه اللهم الا لحظات تجلي قليلة منهم كانت غير مؤثرة... والصراحة فينجر في فترة الانتقالات دي اختار واحد من احسن حراس مرمي مونديال 2014 وهو اوسبينا حارس كولومبيا... اوسبينا في رايي هيكون نقطة تحول في دفاع ارسنال الموسم الجي لو كمل بنفس مستواه في كاس العالم... ولكن لا دفاع ارسنال ولا ميزانيته هيستحمل انهم يفرطوا في لاعب زي فيرمايلين لان بديله اللي موجود هو ميرتساكر وده بطئه وسنه يخلى اي مهاجم يعدي منه وعشان يتعاقدوا مع عليه القيمة دلوقتي من نوعية هوملز او بن عطية والناس دي لو كان ينفع اصلا فهيدفعوا كتير.

اعتقد لو أرسنال قدروا يخطفوا مهاجم هداف هيكون عندهم القدرة على الاستمرارية في المنافسة علي بطولة الدوري للاخر اما من ناحية الاداء فمافيش شك ان ارسين فينجر هيقدر يدخل اللاعيبة الجديدة دي في الخلطة بتاعته اللي دايما بتطلع احسن مافي اللاعيبة و بتحولهم الي نجوم ويستمر اداء ارسنال كواحد من افضل الفرق اداءا في الدوري الانجليزي ولكن مش نتيجة.

تابعوني على:

·         تويتر Twitter     @MO_ELSADEK

·         فيس بوك Facebook   www.facebook.com/FootballCollage

Follow @MO_Elsadek