موسم الانتقالات - مانشستر سيتي

بجدارة واستحقاق بطل الدوري الانجليزي للمرة الرابعة في تاريخه والمره التانية في اخر 3 سنوات و بطل كأس الدوري الموسم الماضي  للمرة الثالثة في تاريخه... بطل بسبب تركيزهم لاخر لحظة في المسابقة... بطل بسبب وجود تشكيلة قوية من اللاعبين وبدلاء بنفس الكفاءة في كل الخطوط تقريبا... بطل بسبب مدرب مجتهد ومبيتكلمش كتير وبيركز انه يقدم كوره حلوة مع الفوز... مدرب بيحقق اعلي نسبة فوز في تاريخ مدربين مانشستر سيتي 71%... فريق كسب ارسنال وتوتنهام بال 6 وكسب جاره يونايتد بال 4... فريق احرز 156 هدف في موسم واحد في كل البطولات... ولكن في ظل كل الارقام دي، الموسم الاوروبي للسيتيزن انتهي بدري من دور ال 16 في دوري الابطال بخروج سهل جدا امام برشلونة.

لو اتكلمنا عن نقاط قوة مانشستر سيتي مش هيكفينا يوم كامل ولكن ابرزها كان خط الهجوم، دكة البدلاء القوية و يايا توريه... هجوم مان سيتي في اربع مهاجمين علي مستوي عالي لدرجة ان ستيفن يوفيتيتش هداف فيورينتينا السابق كان الاختيار الرابع طوال الموسم اللي فات في تشكيلة بيلليجريني... ودكة بدلاء فيها لاعب قوي وعلي نفس كفاءة اللاعب اللي في الملعب في كل المراكز تقريبا... ويايا توريه... مش هتكلم كتير علي يايا وقدراته بس كفايه اقول ان مركزه هو خط وسط واقرب للدفاع ولكنه كان هداف الفريق في الدوري ب 20 هدف واحرز 24 هدف في كل مباريات الموسم الماضي (اجويرو احرز 28 هدف)... يايا هو لاعب خط الوسط المتكامل والمثالي واللي بيلعب (FIFA Ultimate Team) هيكونوا عارفين قيمته اكتر... انا اخترت اشاركم واحد من اهداف يايا توريه امام استون فيلا اللي كان سايق 4 مدافعين قدامه بكل سهولة من قبل نص الملعب وبينهي الهجمة بكل سهولة في وسط محاولات يائسة من المدافعين انهم يوقفوا او يوقعوا الوحش الايفواري...ازاي برشلونة فرطوا في اللاعب ده؟

ولكن مافيش فريق من غير نقطة ضعف... من وجهة نظري نقطة ضعف مانشستر سيتي في الموسم الماضي كانت معدل الاعمار المرتفع في الفريق... عدد اللاعبين تحت 25 سنة في الفريق يتعدوا علي صوابع اليد الواحدة... التشكيلة الحالية بتعكس خبرة كبيرة مافيش كلام ولكن في بعض المراكز وخصوصا خط الدفاع عامل السن كان مؤثر جدا وده كان من الاسباب اللي خرجتهم من دوري ابطال أوروبا... قلب دفاع مانشستر سيتي في 4 لاعبين (2 في مرحلة الشيخوخة الكروية، وواحد هو احسن مدافع في الدوري الانجليزي وواحد لسه محتاج خبرة ولكنه بارقة امل)... لو كومباني مش موجود في مانشستر سيتي كان دفاعهم مش هيفرق عن دفاع فرقة بتصارع الهبوط...  ليسكوت من 3 سنين كان من احسن المدافعين في انجلترا ولكن دلوقتي العظمة كبرت ومبقاش حمل مرمطة وتركيزه قل... ديميكيليس "33 سنة" سنة أثر كتير علي سرعته وهو اصلا بطئ وبقي في مرحلة انه بيلعب ماتش قوي باداء عالي و 5 ماتشات بعده يكون السبب الرئيسي في استقبال مرماه لأهداف... اما امل دفاع السيتي هو ناستاسيتش اللي لسه عنده "21 سنة" واداءه كان قوي في الماتشات القليلة اللي لعبها الموسم اللي فات.

علي غير العادة في فترة الانتقالات الحالية، مانشستر سيتي يمر بمرحلة هدوء شديدة... 2 لاعيبة رحلوا بعد انتهاء عقدهم (ليسكوت والحارس بانتليمون) واتموا 5 صفقات جديدة في صمت... منهم صفقتين مع شابين في خط الوسط والهجوم واعتقد انهم ممكن يكونوا تدعيم كويس للمستقبل وان كنت اشك في حصولهم علي اي فرصة في وجود الكم الهائل من النجوم علي الدكة... و3 صفقات غريبة: 

·       ويللي كاباييرو: حارس مرمي ممتاز ولكنه ضحي بفرصة اللعب كأساسي في مالجا الاسباني عشان الفلوس "مالهاش تفسير تاني" ولكن من وجهة نظر مانشستر سيتي فهو تدعيم رائع لحارسهم الاول جو هارت وهيسد في اي ماتش في حالة غياب هارت وممكن يشكل منافسة ترفع من مستوي هارت "زي حو نادرالسيد والحضري كده"... ولكن السؤال هنا ايه الدافع ان نادي بحجم وفلوس مانشستر سيتي يشتري حارس مرمي عنده 32 سنة؟

·     بكاري سانيا: فتح كلام كده لازم تعرف ان سانيا عنده "31 سنة"... لاعب كويس وقدراته البدنية معقولة اكيد ولكن لو عملنا مقارنة مع زاباليتا في الاداء الدفاعي او حتي الهجومي فزاباليتا يتفوق بجدارة... وزاباليتا اصغر "29سنة"... لو عايز لاعب اساسي في المكان ده يبقي الاولي كنت تفكر تخطف ديبوشي "الاساسي مع فرنسا" قبل أرسنال لانه اصغر وادائه الدفاعي والهجومي احسن من سانيا... ولوكنت بتفكر تجيب لاعب احتياطي يبقي كان الاولي تفكر في لاعب صغير في السن وينفع يكون مستقبل المكان ده في الفريق وفي منهم كتير وادائهم احسن بكتير من سانيا (كايل واكر من توتنهام، ماتيا سيشليو من ميلان، مونتويا من برشلونة، داريل جانمات من فاينورد أو دانيلو من بورتو).

·      فرانك لامبارد: تفكير غريب من لامبارد ومن مانشستر سيتي... صفقة غريبة فعلا... اكيد اكيد لامبارد مش هيلعب اساسي في وجود اسماء زي يايا، سيلفا، نصري ولا حتي فيرناندينهو... فلو لامبارد بيدور علي فرصة للعب كاحتياطي او حتي فرصة للتدريب كان قدامه تشيلسي وخصوصا ان مورينيو و جماهير تشيلسي ماكانوش عايزينه يمشي... ومانشستر سيتي اصلا عنده زحمة في خط الوسط علي 3 اماكن فإيه الجديد اللي لامبارد ممكن يقدمه وهو عنده 36 سنة؟

تشكيلة مان سيتي الاساسية والاحتياطية الموسم القادم

الفريق الحالي لمانشستر سيتي قادر علي المنافسة علي البطولات المحلية لمدة موسم أو موسمين كمان علي الاكثر ولكن من اجل استمراريته في المنافسة وتوسيع نطاقها للمنافسة أوروبيا كان التفكير المنطقي في فترة الانتقالات الحالية لمانشستر سيتي هو التدعيم للمستقبل بشباب واعدين ممكن يكون عندهم القدرة في المنافسة للحصول علي  فرصة للمشاركة... لسه فاضل 3 اسابيع في فترة الانتقالات ومانويل بيلليجريني عنده العين الخبيرة لانتقاء الشباب وتلميعهم زي ايسكو مثلا. 

وايضا التعاقد مع قلب دفاع قوي وذكي وعنده الخبرة "جاهز مش لسه بيتعلم" عشان يكون خير مساند لكومباني لسد الثغرة الوحيدة في الفريق... مفاوضاتهم مع مانجالا لاعب بورتو البرتغالي مستمرة وغالبا هينهوا بالتعاقد مع اللاعب في مقابل حوالي 40 مليون يورو... مانجالا هو في حال انضمامه هيكون الصفقة المثالية... لانه لسه 23 سنة و سريع وقوي جدا في العاب الهواء واداءه قابل للتطور بشكل كبير. وايضا في خيارات تانية متاحة في السوق زي ماركينهوس من باريس سان جيرمان، ماتز هوملز برغم تمسك دورتموند بيه او محاولة خطف فاران من ريال مدريد.

مانشستر سيتي اصبح منافس مرعب في اخر 4 سنين لكل فرق انجلترا وكان السبب ان في اخر 4 سنين لقب الدوري ظل في مدينة مانشستر... ولكن التفكير في الحاضر القريب مش لازم ينسي ادارة النادي طموحات الجماهير اللي اترفعت في السماء واللي محتاجة تفكير اكتر في المستقبل.

تابعونا على:

·         تويتر Twitter     @MO_ELSADEK

·         فيس بوك Facebook   www.facebook.com/FootballCollage

Follow @MO_Elsadek